Ko honno laamu Alla ngun sifori ?

Heɓee ngurndan welɗan haa poomaa ! (jannde fii faamugol Deftere Alla nden)
- TOƁƁERE 31
  
  Ko honno laamu Alla ngun sifori ?
  Mas’ala ɓurɗo hittude on ka nder Deftere Alla ko fii laamu Alla ngun. Yahuwah Alla huutoray nguu laamu fii laatingol faale makko arano on fii leydi ndin. Ko honno laamu ngun sifori ? Ko honno anndirɗen hingu laamaade hannde ? Ko honɗun ngu laatini ? E ko honɗun ngu waɗoyta ko aroyta ? Ndee toɓɓere e toɓɓe ɗiɗi jokkituɗe ɗen jaaboyto ɗee lanndaale.
  
  1. Ko honno laamu Alla ngun sifori e ko hommbo woni lanɗo maggu ?
  
  Laamu ngun ko guwerneman mo Yahuwah Alla waɗi. Lanɗo maggu, annabi Iisaa, no laamaade gila ka kammu (Matta 4:17 ; Yuuhanna 18:36). Deftere Alla nden wi’i fii annabi Iisaa : « O laamoyto […] haa poomaa » (Luuka 1:32, 33). Annabi Iisaa, lanɗo laamu Alla ngun, laamoto yimɓe ɓen fow ka hoore leydi.
  
  2. Ko hommbo woni e laamodaade e annabi Iisaa ?
  
  Wonaa annabi Iisaa tun woni e laamaade. Yimɓe iwruɓe e « kala bolondaa e kala haala e kala jamaa e kala leɲol […] laamoto ka aduna » (Feɲɲinannde 5:9, 10). Ko ɓen njelo laamodoyto e Almasiihu on ? Gila ko annabi Iisaa ari ka hoore leydi, miliyonji yimɓe wonii taalibaaɓe makko. Kono ko 144 000 tun hakkunde maɓɓe laamodoyto e annabi Iisaa ka kammu (janngee Feɲɲinannde 14:1-4). Heddiiɓe ɓen fow wonoyay ɓii-leydi laamu ngun ka hoore leydi (Zabuura 37:29, VPFJ).
  
  3. Ko honno laamu Alla ngun ɓuriri laamu tagaaɗo ?
  
  Hay si lamɓe aduna no etaade waɗugol ko moƴƴi, ɓe alaa bawgal waɗugol kala ko ɓe faalaa. Ɓe sakkitoray lontinireede lamɓe goo ɓe faalantaake yimɓe maɓɓe ɓen ko moƴƴi. Kono lanɗo laamu Alla ngun, annabi Iisaa, lontinirtaake goɗɗo goo. Alla waɗii « laamu ngun muletaake » (Danu’iila 2:44). Annabi Iisaa laamoyto aduna on fow e o hollataa ɓurnindiral. Himo wondi e giggol, himo moƴƴi e himo feewi e o jannoyay yimɓe ɓen no ɓe joggondira wano nii e hoore giggol, moƴƴere e peewal (janngee Isaaya 11:9).
  LUGGINEE
  
  Ndaaree fii honɗun laamu Alla ngun ɓuriri kala laamu tagaaɗo.
  
  4. Guwerneman dolnuɗo laamoyto aduna on fow
  
  Annabi Iisaa no mari bawgal ɓuri kala lanɗo e nder taariika tagaaɗo. Janngee Matta 28:18 e yewton fii ngal lanndal :
  
  Ko honno bawgal Iisaa ngal ɓuriri kala lanɗo tagaaɗo ?
  
  Laamu tagaaɗo no wayloo saa’i kala e laamu kala no laamii nokkuure ka hoore leydi. E laamu Alla ngun goy ? Janngee Danu’iila 7:14 e yewton fii ɗee lanndaale :
  
  Fii honɗun hino moƴƴi laamu Alla ngun muletaake ?
  
  Fii honɗun hino moƴƴi ko ngu laamoytoo aduna on fow ?
  
  5. Laamu tagaaɗo no haani lontineede
  
  Fii honɗun laamu Alla ngun no haani lontaade laamu tagaaɗo ? Fijinee VIDIO on e yewton fii lanndal jokkitungal ngal.
  
  VIDIO : Ko honno laamu Alla ngun sifori ? (Suutannde) (1:41)
  
  Ko honɗun woni battane laamu tagaaɗo ?
  
  Janngee Waajotooɗo on 8:9 e yewton fii ɗee lanndaale :
  
  Hiɗon miijii laamu Alla ngun no haani lontaade laamu tagaaɗo ? Fii honɗun ?
  
  6. Laamu Alla ngun no mari lamɓe faamooɓe en
  
  Sabu ko annabi Iisaa, lanɗo men on, wuuriri wa aaden, himo waawi « faamude lo’ere men nden » (Yahuudiyankeeɓe 4:15). Yahuwah Alla suɓike 144 000 worɓe e rewɓe sella-finndeeɓe e « kala bolondaa e kala haala e kala jamaa e kala leɲol » laamodoytooɓe e annabi Iisaa (Feɲɲinannde 5:9).
  
  No ɓuttina on ɓernde anndugol annabi Iisaa e ɓe o laamodoytoo ɓen no anndi fii ngurndan tagaaɗo ? Fii honɗun ?
  
  Yahuwah Alla suɓike worɓe e rewɓe iwruɓe leyɗe sertuɗe e leƴƴi sertuɗi fii laamodagol e annabi Iisaa.
  
  7. Laamu Alla ngun no mari sariyaaji ɓurɗi moƴƴude
  
  Guwernemanji no waɗa sariyaaji nafayɗi e danndayɗi ɓii-leydi majji. Laamu Alla ngun kadi no mari sariyaaji ɗi ɓii-leydi mun haani ɗoftaade. Janngee 1 Korenti 6:9-11 e yewton fii ɗee lanndaale :
  
  E miijo mon, honno aduna on wa’irta si fow jokkii sariyaaji Alla ɗina ?
  
  Hiɗon miijii Yahuwah Alla no haani yamirde ɓii-leydi laamu Alla ngun teddingol ɗii sariyaaji ? Fii honɗun ?
  
  Ko honɗun hollata yimɓe ɓe ɗoftotaako ɗii sariyaaji no waawi waylaade ? (Ndaaree aaya 11).
  
  Guwernemanji no waɗa sariyaaji fii danndugol e nafugol ɓii-leydi maɓɓe. Laamu Alla ngun no mari sariyaaji ɓurɗi moƴƴude fii danndugol e nafugol ɓii-leydi mun.
  
  NO GASA WOƁƁE NO LANNDOO : « Ko honno laamu Alla ngun sifori ? »
  
  Ko honno jaabortoɗon ?
  RAWNOODE
  
  Laamu Alla ngun ko guwerneman wonɗo ka kammu laamoytooɗo aduna on fow.
  
  Ndartannde
  
  Ko homɓe woni lamɓe laamu Alla ngun ?
  
  Ko honno laamu Alla ngun ɓuriri laamu tagaaɗo ?
  
  Ko piiji honɗi Yahuwah Alla yamiri ɓii-leydi laamu Alla ngun ?
  
  Toɓɓere nden no timminaa :
  
  Faandaare
  Janngugol fii laamagol annabi Iisaa e nder Isaaya 11:1-10 e ndaarugol honno ɗun sertiri e laamu tagaaɗo.
  
  Huunde goo :
  Huunde goo
  
  TASKEE
  
  Ndaaree ko annabi Iisaa janni fii nokkuure ka laamu Alla ngun woni ?
  
  « Haray ko ka ɓernde mon laamu Alla ngun woni ? » (Winndannde ka jw.org)
  
  Fii honɗun Seedeeɓe Yahuwah ɓen no suɓoo wonugol sella-finndeeɓe e telemma laamu Alla ngun edii laamu tagaaɗo ?
  
  Ko laamu Alla ngun tun ɓe wonani (1:43)
  
  Ndaaree honɗun Deftere Alla nden holli fii 144 000 yimɓe ɓe Yahuwah Alla suɓii ɓen laamodagol e annabi Iisaa.
  
  « Ko hommbo yahata ka kammu ? » (Winndannde ka jw.org)
  
  Ko honɗun fellintini debbo wonunooɗo ka kaso wonndema ko laamu Alla ngun tun waɗata aduna feewuɗo ?
  
  « No mi anndiri goonga on fii anngal peewal » (Finee !, noofaambur 2011)
  a En yewtay fi goɗɗi e ɗii sariyaaji ka peccal 3.

Laamu Alla ngun no laamaade !

Heɓee ngurndan welɗan haa poomaa ! (jannde fii faamugol Deftere Alla nden)
- TOƁƁERE 32
  
  Laamu Alla ngun no laamaade !
  Laamu Alla ngun fuɗɗino laamaade ka kammu e hitaande 1914. Ko gila on saa’i kadi, ɲalaaɗe sakkitore laamu tagaaɗo fuɗɗii. Ko honno anndirɗen ɗun ? Ndaaree hiitanɗe Deftere Alla nden e ko woni e feƴƴude e nder aduna on gila 1914.
  
  1. Ko honɗun hiitanɗe Deftere Alla nden holli ?
  
  Deftere Danu’iila nden ka nder Deftere Alla wi’uno laamu Alla ngun fuɗɗotono laamaade ka lannoode saa’i noddaaɗo : « saa’iiji jeeɗiɗi » (Danu’iila 4:16, 17). Teeminanɗe ɓawto ɗun annabi Iisaa haaluno fii on saa’i wa « saa’iiji ɗi [leyɗe ɗen] happanaa ɗin » e o wi’uno kadi ɗi lannaali taho (Luuka 21:24). Wano yiiroyten non, ɗii saa’iiji jeeɗiɗi lannuno e hitaande 1914.
  
  2. Ko honɗun woni e feƴƴude e nder aduna on gila 1914 ?
  
  Taalibaaɓe annabi Iisaa ɓen lanndino mo : « ko honɗun wonoyta maande aroygol mon ngol e lannoode aduna on ? » (Matta 24:3). Annabi Iisaa jaabii, o haali fii piiji buy ko aroyta ɓawto ko o fuɗɗotoo laamaade ka kammu wa lanɗo laamu Alla ngun. Goɗɗi e ɗii piiji ko hareeji, heegeeji e dimmbanɗe leydi (janngee Matta 24:7). Deftere Alla nden haaluno kadi fii jikkuuji yimɓe ɓen ka « sakkitoode aduna » waɗayɗi ngurndan « satt[a] fota » (2 Timotee 3:1-5). Ɗii piiji no feƴƴude ko laaɓi pos tentinii gila 1914.
  
  3. Fii honɗun aduna on no satti gila laamu Alla ngun fuɗɗii laamaade ?
  
  Ɓawto ko annabi Iisaa woni Lanɗo laamu Alla ngun tun, o haɓiduno e Seytaane e jinnaaji makko ɗin ka kammu. Seytaane foolaano. Deftere Alla nden wi’i o « bugodaa e malaa’ikaaɓe mun ɓen ka leydi » (Feɲɲinannde 12:9, 10, 12). Seytaane no tikki fota ɓayri himo anndi neɓataa o mulee. Ko ɗun waɗi himo addude muuseendi e tampereeji buy e nder aduna on fow. Wonaa meere aduna on sattani fota ! Kono laamu Alla ngun ittoyay ɗii satteendeeji fow.
  LUGGINEE
  
  Ndaaree ko holli Laamu ngun fuɗɗike laamaade gila 1914 e ko honɗun ɗun firani en.
  
  4. Hiitannde Deftere Alla nden addii en haa 1914
  
  Fijinee VIDIO on.
  
  VIDIO : Laamu Alla ngun fuɗɗike laamaade e hitaande 1914 (5:02)
  
  Ɓaawo ɗoo Alla waɗuno Nabukodonozor lanɗo Baabiila on hoyɗugol. Ngol koyɗol e no Danu’iila firirnoo ngol non, no holli ko aroyta fii ardannde Nabukodonozor nden e fii laamu Alla ngun (janngee Danu’iila 4:17).a
  
  Janngee Danu’iila 4:20-26 e huutoron pirinti on fii jaabagol lanndaale jokkituɗe ɗen :
  
  A) Ko honɗun Nabukodonozor yi’unoo e koyɗol makko ? (Ndaaree aayeeje 20 e 21).
  
  B) Ko honɗun heɓunoo leggal ngal ? (Ndaaree aaya 23).
  
  C) Ko honɗun feƴƴoyta ka lannoode « saa’iiji jeeɗiɗi » ɗin ? (Ndaaree aaya 26).
  
  Ko honno koyɗol fii leggal ngal haaliri fii laamu Alla ngun ?
  
  HIITANNDE NDEN (Danu’iila 4:20-36)
  
  Ardannde
  
  A) Leggal njanal toowungal
  
  Ardannde dartinaande
  
  B) « Soppu leggal ngal » e accaa « saa’iiji jeeɗiɗi feƴƴa »
  
  Ardannde wattaande
  
  C) « Laamu maa ngun wonante kadi »
  
  E nder laatagol aranun ndee hiitannde...
  
  D) Ko hommbo leggal ngal lontii ? (Ndaaree aaya 22).
  
  E) Ko honno ardannde makko nden dartiniranoo ? (Janngee Danu’iila 4:29-33).
  
  F) Ko honɗun heɓunoo Nabukodonozor ka lannoode « saa’iiji jeeɗiɗi » ɗin ? (Janngee Danu’iila 4:34-36).
  
  LAATAGOL ARANUN
  
  Ardannde
  
  D) Nabukodonozor, lanɗo Baabiila on
  
  Ardannde dartinaande
  
  E) Ɓawto 606 ado saa’i men on, Nabukodonozor feetuno e o waawaano laamaade e nder duuɓi jeeɗiɗi
  
  Ardannde wattaande
  
  F) Nabukodonozor, hetti hakkil e o fuɗɗii laamaade kadi
  
  E nder laatagol ɗiɗaɓun ndee hiitannde...
  
  G) Ko hommbo leggal ngal lontii ? (Janngee 1 Fillande taariika 29:23).
  
  H) Ko honno ardannde maɓɓe nden dartiniranoo ? Ko honno anndirɗen ɗun dartinirano hay fewndo ko annabi Iisaa wonunoo ka hoore leydi ? (Janngee Luuka 21:24).
  
  I) Ko saa’i hommbo e ko honto ndee ardannde wattaa ?
  
  LAATAGOL ƊIMMUN
  
  Ardannde
  
  G) Lamɓe Isra’iila lontiiɓe ardannde Alla nden
  
  Ardannde dartinaande
  
  H) Yerusalaam lancaama, geyngol lamɓe isra’iila ɓen dartinaa fii duuɓi 2 520
  
  Ardannde wattaande
  
  I) Annabi Iisaa woni lanɗo laamu Alla ngun ka kammu
  
  Saa’iiji jeeɗiɗi ɗin ko duuɓi jelu ?
  
  Cenɗe ka nder Deftere Alla no wallude en fii no faamiren cenɗe goo. E piide misal, deftere Feɲɲinannde nden wi’i ɗii saa’iiji tati e feccere no fota e balɗe 1 260 (Feɲɲinannde 12:6, 14). Saa’iiji jeeɗiɗi ko laabi ɗiɗi ndee limoore maa balɗe 2 520. Wonnde Deftere Alla nden huutoray ɲalaande fii lontingol hitaande (Hazqi’iila 4:6). Ko ɗun woni fii saa’iiji jeeɗiɗi winndaaɗi fii mun ɗin ka nder deftere Danu’iila (ɗun no lontii duuɓi 2 520).
  5. Aduna on waylike gila 1914
  
  Fijinee VIDIO on.
  
  VIDIO : Aduna on waylike gila 1914 (1:10)
  
  Annabi Iisaa hiitino fii ko feƴƴata ɓawto ko o fuɗɗotoo laamaade. Janngee Luuka 21:9-11 e yewton fii ngal lanndal :
  
  Ko piiji honɗi yi’uɗon maa nanuɗon fii mun ?
  
  Sahaabaajo inneteeɗo Puulusa haaluno fii no yimɓe wa’irta ka sakkitoode ardannde tagaaɗo. Janngee 2 Timotee 3:1-5 e yewton fii ngal lanndal :
  
  Ko kuuɗe honɗe wonuɗon yi’ude hannde ?
  
  6. Ardannde laamu Alla ngun wakkilinay en
  
  Janngee Matta 24:3, 14 e yewton fii ɗee lanndaale :
  
  Ko golle hittuɗe honnɗe woni e hollude laamu Alla ngun no laamaade hannde ?
  
  Ko honno tawirteɗon e ɗee golle ?
  
  Laamu Alla ngun no laamaade hannde e saa’i ka ngu laamotoo aduna on fow ɓaɗike. Janngee Yahuudiyankeeɓe 10:24, 25 e yewton fii ngal lanndal :
  
  Ko honɗun mo kala e men haani waɗude ko fii « hiɗen yi’ude ɲalaande nden no ɓadaade » ?
  
  Si on janngii goɗɗun ko wallata maa danndata woɓɓe goo, ko honɗun waɗoton ?
  
  NO GASA WOƁƁE NO LANNDOO : « Fii honɗun Seedeeɓe Yahuwah ɓen no haala soono woo fii 1914 ? »
  
  Ko honno jaabortoɗon ?
  RAWNOODE
  
  Hiitanɗe Deftere Alla nden, ko woni e feƴƴude kon e ko aduna on satti kon no holli laamu Alla ngun no laamaade. En hollay hoolaare men nden e hoore waajagol fii mun e tawegol ka pottite moftal ngal.
  
  Ndartannde
  
  Ko honɗun feƴƴunoo ka lannoode saa’iiji jeeɗiɗi hiitanooɗii ɗin ka nder deftere Danu’iila nden ?
  
  Ko honɗun fellintini on laamu Alla ngun fuɗɗike laamaade e hitaande 1914 ?
  
  Ko honno hollirton hiɗon hoolii laamu Alla ngun no laamaade ?
  
  Toɓɓere nden no timminaa :
  
  Faandaare
  Wonugol waajotooɗo kibaaru moƴƴo on.
  
  Huunde goo :
  Huunde goo
  
  TASKEE
  
  Ndaaree ko taariikayankeeɓe e woɓɓe goo wi’i fii no aduna on waylori gila 1914.
  
  « Gila ka jikkuuji moƴƴi boni few » (Finee!, awril 2007)
  
  Janngee no hiitannde nden e nder Matta 24:14 wayliri ngurndan gorko.
  
  « Miɗo yiɗunoo bezbol ɓuri piiji ɗin fow ! » (Suudu Aynirdu ndun n° 3 2017)
  
  Ko honno anndirɗen hiitannde Danu’iila nden ka nder simoore 4 no haali fii laamu Alla ngun ?
  
  « Ko honnde tuma laamu Alla ngun fuɗɗii laamaade ? (Senngo 1) » (Suudu Aynirdu ndun, 1 ottombur 2014)
  
  Ko honɗun holli saa’iiji jeeɗiɗi haalaaɗi fii mun ɗin ka nder deftere Danu’iila nden simoore 4 lanniino gila 1914 ?
  
  « Ko honnde tuma laamu Alla ngun fuɗɗii laamaade ? (Senngo 2) » (Suudu Aynirdu ndun, 1 noofaambur 2014)
  a Ndaaree winndanɗe ɗiɗi ka senngo « Taskee » e nder ndee toɓɓere.

Ko honɗun Laamu ngun waɗoyta ?

Heɓee ngurndan welɗan haa poomaa ! (jannde fii faamugol Deftere Alla nden)

TOƁƁERE 33

Ko honɗun Laamu ngun waɗoyta ?

Laamu Alla ngun no laamaade hannde. Neeɓataa ngu wayla piiji buy ka hoore leydi. Ndaaren goɗɗi e piiji ɗi faaleteɗon ka laamu Alla.

1. Ko honno laamu Alla ngun wattiroyta ɓuttu e peewal ka hoore leydi ?

Annabi Iisaa, lanɗo laamu Alla ngun, muloyay ɓonɓe ɓen e laamuuji ɗin ka gere Har-Magadaana (Feɲɲinannde 16:14, 16). On saa’i ndee fodoore Deftere Alla nden laatoyto ko timmi. « Si neeɓii seeɗa nii haray bonɗo alaa. Ka o wonnoo, a yi’ataa » (Zabuura 37:10, VPFJ). Annabi Iisaa huutoray Laamu ngun fii no leydi ndin heewira peewal e ɓuttu (janngee Isaaya 11:4).

2. Ko honno ngurndan wa’iroyta ka hoore leydi si faale Alla on waɗii?

« Feewuɓe ɓen ronoyay leydi ndin, ɓe hoɗa e mayri haa poomaa » ka Laamu Alla (Zabuura 37:29, VPFJ). Miijitee wuurugol e nder aduna ka fow woni feewuɓe e fow no yiɗi Yahuwah Alla e no yiɗindiri ! Hay gooto nawnoytaa e fow wuuroyay haa poomaa.

3. Ko honɗun laamu Alla ngun waɗoyta si ɓonɓe ɓen muloyaama ?

Si ɓonɓe ɓen muloyaama, annabi Iisaa laamoyto fii duuɓi 1 000. E on saa’i ɗon, kanko e ɓe o laamodoytooɓe ɓen, ɗun ko yimɓe 144 000, walloyay yimɓe ɓen ka hoore leydi wonugol timmuɓe hara ɓe aldaa e junuubu. Ka lannoode on saa’i ɗon, leydi ndin wonoyay aljanna fotuɗo, heewuɗo yimɓe weltiiɓe ɓay hiɓe ɗoftii sariyaaji Yahuwah Alla ɗin. Annabi Iisaa jonnitoyay Yahuwah Alla, Ben makko, Laamu ngun. E innde Yahuwah nden ‘hormorte’ wa sifa mun waɗaali gila aduna dawi haa hannde (Matta 6:9, 10). Ɗun holloyay Yahuwah Alla ko lanɗo moƴƴo dankiiɗo jamaa makko on. Ontuma Yahuwah Alla muloyay Seytaane, jinnaaji ɗin e kala suɓiiɗo murtangol ardannde makko nden (Feɲɲinannde 20:7-10). Piiji moƴƴi ɗi laamu Alla ngun waɗoyta luttoyay haa poomaa.

LUGGINEE

Ndaaren fii honɗun hoolantoɗen Yahuwah Alla huutoray Laamu ngun fii laatingol fodooje Deftere Alla nden fii ko aroyta.

4. Laamu Alla ngun ittoyay laamu tagaaɗo

« Tagaaɗo no laamaade tagaaɗo fii bone makko » (Waajotooɗo on 8:9). Rewrude Laamu makko ngun, Yahuwah Alla ittoyay kala ko woni sabu anngal peewal.

Janngee Danu’iila 2:44 e 2 Thessalonii 1:6-8 e yewton fii ɗee lanndaale :

Ko honɗun Yahuwah Alla e annabi Iisaa waɗoyta laamu tagaaɗo e kala tammbitiiɗo laamu tagaaɗo ?
E nder ko jannguɗon kon fii Yahuwah Alla e annabi Iisaa, fii honɗun hiɗon felliti ko ɓe waɗoyta kon ko ko moƴƴi ?

Annabi Iisaa no laamaade aljanna ka hoore leydi.

5. Annabi Iisaa ko lanɗo timmuɗo

Annabi Iisaa waɗanoyay ɓe o laamoytoo ɓen ka hoore leydi piiji moƴƴi buy. Fijinee VIDIO on fii anndugol no annabi Iisaa holliri faale e bawgal ngal Alla okki mo ngal fii wallugol yimɓe.

VIDIO : Annabi Iisaa holluno ko laamu Alla ngun waɗoyta (1:13)

Fewndo ko annabi Iisaa wonunoo ka hoore leydi, o holluno ko laamu Alla ngun waɗoyta. Ko baraaji honɗi lintaaɗi ɗoo ɗin faaleteɗon yi’ude tigi tigi ? Janngee aayeeje yaaduɗe e ɗii baraaji.

KO O WONUNOO KA HOORE LEYDI, ANNABI IISAA...	GILA KA KAMMU, ANNABI IISAA...
huuruno henndu, waabiliire e piiji goo (Markuusa 4:36-41).	jittoyay ellaaji hunndaari ndin fow (Isaaya 35:1, 2).
waɗuno kawakke e hoore ɲammingol yimɓe ujune ujune (Matta 14:17-21).	ittoyay heege e nder aduna on (Zabuura 72:16, VPFJ).
ɲawnduno nawnuɓe buy (Luuka 18:35-43).	jonnoyay fow cellal timmungal (Isaaya 33:24).
immintinno mayɓe (Luuka 8:49-55).	wattoyay boneeji ɗi mayde waɗi ɗin fow (Feɲɲinannde 21:3, 4).

6. Laamu Alla ngun addoyay janngo fotuɗo

Laamu Alla ngun laatinoyay faale Yahuwah Alla arano on fii tagaaɗo. Yimɓe ɓen wuuroyay ka aljanna e hoore ndii leydi haa poomaa. Fijinee VIDIO on fii yi’ugol no Yahuwah Alla woni huutorde annabi Iisaa ɓiɗɗo makko on fii laatingol faale makko on.