Sailm

34 [34:2] Beannóidh mé an Tiarna i dtólamh

beidh a mholadh i mo bhéal i gcónaí.

2 [34:3] Bíonn m’anam ag déanamh mórtais as an Tiarna:

éistfidh daoine ísle agus beidh áthas orthu.

3 [34:4] Móraigí an Tiarna mar aon liom:

tugaimis adhradh dá ainm in éineacht.

4 [34:5] Bhí mé ag lorg an Tiarna agus d’éist sé liom

agus d’fhuascail sé ó m’eagla go léir mé.

5 [34:6] Féachaigí chuige agus loinnir oraibh

’s na bíodh luisne na náire in bhur leicne.

6 [34:7] Nuair a scairt an t-ainniseoir seo d’éist an Tiarna,

agus shaor sé óna chúngaigh go léir é.

7 [34:8] Bíonn aingeal an Tiarna i gcampa

thart ar lucht a eaglaithe, á bhfuascailt.

8 [34:9] Blaisigí is féachaigí a fheabhas atá an Tiarna:

is aoibhinn dá dtagann faoina dhídean.

9 [34:10] A dhaoine naofa an Tiarna, bíodh a eagla oraibh;

ní bhíonn díth ar an dream lenarb eagal é.

10 [34:11] Bíonn easpa agus ocras ar leoin óga:

ní bhíonn aon easpa ar lucht iarrtha an Tiarna.

11 [34:12] Téanaigí, a chlann ó, agus éistigí liom

go múinfidh mé eagla an Tiarna daoibh.

12 [34:13] Cé hé an duine a shantaíonn an bheatha?

agus fad saoil faoi shéan is faoi shonas?

13 [34:14] Coinnigh do theanga ón olc

agus do bhéal ó bhriathra éithigh.

14 [34:15] Seachain an t-olc agus déan an mhaith;

bí ag lorg na síochána agus lean di.

15 [34:16] Bíonn súile an Tiarna ar na fíréin

agus tugann sé aird ar a n-achainí.

16 [34:17] Iompaíonn an Tiarna ó lucht déanta an oilc

d’fhonn a gcuimhne a scriosadh den talamh.

17 [34:18] Éisteann an Tiarna nuair a ghlaonn na fíréin air:

fuasclaíonn sé óna gcúngaigh go léir iad.

18 [34:19] Bíonn an Tiarna i ngar don lucht coscartha

agus tarrthaíonn sé an dream atá do-mheanmnach.

19 [34:20] Is iomaí sin buairt ar an bhfíréan,

ach fuasclaíonn an Tiarna orthu uile é;

20 [34:21] cosnaíonn sé a chnámha go léir;

ní bhrisfear oiread is aon cheann amháin acu.

21 [34:22] Tiománfaidh an t-olc an t-éagráifeach chun a bháis,

agus daorfar lucht fuatha an fhíréin.

22 [34:23] Fuasclaíonn an Tiarna anamacha a shearbhóntaí:

ní dhaorfar a dtéann faoina choimirce.