CUID 12
Eagna Dhiaga le hAghaidh an tSaoil
Is bailiúchán de chomhairle inspioráidithe atá i leabhar na Seanfhocal—scríofa ag Solamh den chuid is mó—a sholáthraíonn comhairle dár saol laethúil
AN RIALTÓIR críonna é Iehova? Tá bealach amháin cinnte le freagra na ceiste sin a fháil, sé sin, machnamh a dhéanamh ar an gcomhairle a thugann sé. An bhfuil sí éifeachtach? An mbíonn an saol níos fearr agus níos mó brí leis as ucht na comhairle sin a leanúint? Scríobh an Rí críonna, Solamh, na céadta seanfhocal. Déanann siad seo tagairt de gach gné den saol. Féach ar roinnt samplaí.
Muinín i nDia. Tá muinín ríthábhachtach más linn caidreamh maith a bheith againn le Iehova. Scríobh Solamh: “Bíodh muinín agat as an Tiarna, agus ná bíodh iontaoibh agat as do thuiscint féin; Bíodh aird agat air siúd cibé cúrsa ar a mbíonn tú, agus féachfaidh sé chuige go mbeidh do chosáin réidh.” (Seanfhocail 3:5, 6) Má léiríonn tú muinín i nDia tríd a chomhairle a lorg agus a dhéanamh tabharfaidh sé brí níos doimhne do do shaol. Cuireann an cúrsa seo ar chumas duine lúcháir a chur ar chroí Dé agus tugann sé an deis do Iehova freagra a thabhairt don té atá á mhaslú, Sátan.—Seanfhocail 27:11.
Ag caitheamh go maith le daoine. Tá comhairle an Bhíobla d’fhir chéile, do mhná céile agus do pháistí níos tráthúla inniu ná riamh. “Bíodh suáilceas agat i gcomhluadar na mná a phós tú i d’óige,” a chomhairlíonn Dia don fhear céile ag tabhairt treoir dó a bheith dílis dá bhean. (Seanfhocail 5:18-20) Tugtar tuairisc mholtach ar an mbean phósta chumasach i leabhar na Seanfhocal, bean a thuilleann meas a fir agus a clainne. (Seanfhocail, caibidil 31) Tugtar treoir do pháistí a bheith umhal dá dtuismitheoirí. (Seanfhocail 6:20) Léiríonn an leabhar seo freisin go bhfuil cairdeas ríthábhachtach, mar an té nach meascann le daoine eile bíonn sé leithleach. (Seanfhocail 18:1) Is féidir le cairde dea-thionchar nó drochthionchar a bheith acu orainn, mar sin ní mór dúinn iad a roghnú go ciallmhar.—Seanfhocail 13:20; 17:17.
Ag tabhairt aire duit féin. Tá comhairle den scoth i leabhar na Seanfhocal maidir le seachaint mí-úsáide alcóil, chun mothúcháin fholláine a chothú agus le dul i ngleic le mothúcháin dhochracha, agus chun a bheith i d’oibrí dícheallach. (Seanfhocail 6:6; 14:30; 20:1) Tugann sé foláireamh go bhfuil sé tubaisteach muinín a chur i mbreithiúnas an duine, beag beann ar chomhairle Dé. (Seanfhocail 14:12) Spreagann sé muid lenár gcroí a chosaint ar rudaí a thruailleodh é, ag meabhrú dúinn gur “[sa chroí] atá foinsí na beatha.”—Seanfhocail 4:23.
Tá sé faighte amach ag na milliúin duine ar fud an domhain gur fearrde a saol de bharr maireachtáil de réir na comhairle sin. Dá réir sin, tá cúis mhaith acu glacadh le Iehova mar a Rialtóir.
—Bunaithe ar leabhar na Seanfhocal.