Leigheasann Íosa Fear ar an tSabóid

Bhí an ghráin ag na Fairisínigh ar Íosa agus bhí siad ag cuardach leithscéal lena ghabháil. Dúirt siad nár cheart dó daoine tinne a leigheas ar an tSabóid. Lá Sabóide amháin, tháinig Íosa ar fhear dall a bhí ag iarraidh déirce. Bhí an fear seo dall nuair a saolaíodh é. Dúirt sé lena chuid deisceabail: ‘Fan go bhfeice sibh an chaoi a gcabhróidh cumhacht Dé leis an bhfear seo.’ Mheasc Íosa a sheile féin le cré chun taos a dhéanamh agus ansin chuir sé ar shúile an fhir é. Dúirt Íosa leis: ‘Téigh agus nigh do shúile i linn Siolóam.’ Rinne an fear amhlaidh agus don chéad uair ina shaol bhí sé in ann feiceáil.

Chuir sé seo an-iontas ar na daoine. Dúirt siad: ‘An é seo an fear dall a bhíodh ina shuigh anseo ag iarraidh déirce, nó nach é?’ Dúirt an fear: ‘Is mise an fear a bhí dall!’ D’fhiafraigh na daoine de: ‘Cén fáth nach bhfuil tú dall níos mó?’ Nuair a d’inis sé dóibh faoin méid a tharla thug siad go dtí na Fairisínigh é.

Dúirt an fear leis na Fairisínigh: ‘Chuir Íosa taos ar mo shúile agus dúirt sé liom a dhul agus iad a níochán. Nigh mé iad agus anois tá mé in ann feiceáil.’ Dúirt na Fairisínigh: ‘Má tá Íosa ag leigheas daoine ar an tSabóid, ní féidir gur ó Dhia a fhaigheann sé a chumhacht.’ Ach dúirt daoine eile: ‘Murach gur ó Dhia atá sé ag fáil a chumhacht, ní bheadh sé in ann aon duine a leigheas.’

Ghlaoigh na Fairisínigh ar thuismitheoirí an fhir agus cheistigh siad iad, ag rá: ‘Cén chaoi ar tharla sé go bhfuil bhur mac in ann feiceáil?’ Bhí eagla ar a chuid tuismitheoirí de bhrí go ndúirt na Fairisínigh go gcaithfí amach as an tsionagóg duine ar bith a chreidfeadh in Íosa. Mar sin dúirt siad: ‘Níl a fhios againn. Cuirigí ceist air féin.’ Cheistigh na Fairisínigh an fear arís, agus sa deireadh dúirt sé leo: ‘Tá gach uile ní inste agam daoibh. Cén fáth a bhfuil sibh do mo cheistiú?’ Chuir sé seo olc ar na Fairisínigh agus chaith siad amach as an tsionagóg é.

Chuaigh Íosa go dtí an fear agus d’fhiafraigh sé de: ‘An gcreideann tú sa Meisias?’ Dúirt an fear: ‘Chreidfinn, dá mbeadh a fhios agam cé hé féin.’ Dúirt Íosa: ‘Is mise an Meisias.’ Nach raibh sé an-chineálta ag Íosa é sin a dhéanamh? Ní hé amháin gur leigheas sé an fear, ach chabhraigh sé leis creideamh a bheith aige.