Mhair Maois i Midián ar feadh 40 bliain. Phós sé agus bhí clann air. Lá amháin nuair a bhí sé ag tabhairt aire dá chuid caorach in aice le Sliabh Shíonái chonaic sé rud a chuir iontas air. Bhí sceach trí thine, ach ní raibh an tine á dó! Nuair a chuaigh Maois chomh fada léi go bhfeicfeadh sé céard a bhí ag tarlú, chuala sé guth ón sceach ag rá leis: ‘A Mhaois! Ná tar níos gaire. Bain díot do bhróga mar tá tú i do sheasamh ar thalamh naofa.’ Ba é Iehova a bhí ag labhairt leis trí aingeal.

Chlúdaigh Maois a éadan, mar bhí eagla air. Dúirt an guth arís: ‘Tá an cruatan atá á fhulaingt ag na hIosraeilítigh feicthe agam. Saorfaidh mé ó na hÉigiptigh iad agus tabharfaidh mé go dtí tír bhreá thorthúil iad. Is tusa a threoróidh mo dhaoine amach as an Éigipt.’ Meas tú ar chuir sé seo iontas ar Mhaois?

D’fhiafraigh Maois: ‘Céard a déarfaidh mé nuair a fhiafróidh na daoine díom cé a chuir chucu mé?’ D’fhreagair Dia: ‘Abair leo gurb é Iehova, Dia Abrahám, Dia Íosác agus Dia Iacóib a chuir chucu thú.’ Dúirt Maois: ‘Céard a tharlóidh mura gcreideann siad mé?’ Chruthaigh Iehova do Mhaois go gcabhródh Sé leis. Dúirt sé le Maois a shlat a chaitheamh ar an talamh. Ansin déanadh nathair den tslat. Nuair a rug Maois ar eireaball na nathrach déanadh slat arís di. Dúirt Iehova: ‘Nuair a dhéanfaidh tú an mhíorúilt seo, creidfidh siad thú.’

Dúirt Maois: ‘Ní cainteoir maith mé.’ Gheall Iehova dó: ‘Cuirfidh mise na focail i do bhéal, agus cuirfidh mé chugat do dheartháir Árón chun cabhrú leat.’ Nuair a bhí a fhios ag Maois go raibh Iehova leis, thug sé leis a bhean agus a chlann mhac agus chuaigh siad ar ais go dtí an Éigipt.

Chuir na hÉigiptigh iallach ar na hIosraeilítigh oibriú go crua mar sclábhaithe. Dúirt Iehova le Maois agus le hÁrón an teachtaireacht seo a thabhairt d’Fharó: ‘Lig do mo dhaoine a dhul amach sa bhfásach agus mé a adhradh ansin.’ D’fhreagair Faró go mórtasach: ‘Is cuma liom céard a deir Iehova, ní scaoilfidh mé leis na hIosraeilítigh.’ Ansin mhéadaigh Faró an t-ualach oibre a bhí orthu. Bhí Iehova chun ceacht a mhúineadh d’Fharó. An bhfuil a fhios agat cén chaoi? Tharraing sé Deich bPlá ar an Éigipt. Dúirt Iehova le Maois: ‘Níl Faró ag éisteacht liom. Beidh sé ag Abhainn na Níle ar maidin. Téigh go dtí é agus abair leis go ndéanfar fuil d’uisce na Níle de bhrí nár scaoil sé saor mo dhaoine.’ Rinne Maois mar a dúradh leis agus chuaigh sé go dtí Faró. Bhuail Árón an Níl lena shlat i láthair Fharó, agus déanadh fuil den uisce. Is gearr go raibh boladh bréan ar an abhainn, maraíodh na héisc, agus níorbh fhéidir uisce na Níle a ól. Mar sin féin, níor scaoil Faró leis na hIosraeilítigh.

Seacht lá ina dhiaidh sin, chuir Iehova Maois ar ais go dtí Faró leis an teachtaireacht seo: ‘Mura ligfidh tú do mo dhaoine imeacht as an Éigipt, beidh an Éigipt lán le froganna.’ Chroch Árón a shlat agus clúdaíodh an talamh go léir le froganna. Bhí froganna i dtithe na ndaoine, ina gcuid leapacha, agus ina gcuid soithí. Bhí froganna i ngach áit! D’iarr Faró ar Mhaois impí ar Iehova an phlá seo a stopadh. Gheall Faró go scaoilfeadh sé leis na hIosraeilítigh. Dá bhrí sin, stop Iehova an phlá, agus rinne na hÉigiptigh carnáin mhóra de na froganna. Bhí an talamh bréan leo. Ach arís, níor lig Faró do na hIosraeilítigh imeacht.

Dúirt Iehova le Maois: ‘Abair le hÁrón a shlat a bhualadh faoin talamh. Ansin déanfar míoltóga beaga a bhíonn ag baint greamanna as daoine, den dusta.’ Bhí míoltóga beaga i ngach áit ar an bpointe. Dúradh le Faró: ‘Is ó Dhia atá an phlá seo ag teacht.’ Ach arís eile, níor scaoil Faró leis na hIosraeilítigh.