Bhí Misneach ag Nia Phóil

Cuirimis aithne ar fhear óg a shábháil a uncail ón mbás. Ba é an t-aspal Pól uncail an fhir óig seo. Cé nach bhfuil a fhios againn a ainm, tá a fhios againn go ndearna sé gníomh misniúil. Ar mhaith leat a fháil amach céard a rinne sé?—

Bhí Pól sa phríosún in Iarúsailéim. Gabhadh é de bharr a bheith ag craobhscaoileadh faoi Íosa. Bhí drochfhir ann a raibh an ghráin acu ar Phól agus rinne siad plean eatarthu féin é a mharú. Dúirt siad: ‘Iarrfaimid ar cheannasaí an airm ordú a thabhairt dá shaighdiúirí Pól a thabhairt chun cúirte. Beimidne i bhfolach le taobh an bhóthair, agus nuair a thiocfaidh Pól thar bráid, maróimid é!’

Chuala nia Phóil faoin bplean seo. Céard a dhéanfadh sé? Chuaigh sé go dtí an príosún agus d’inis sé an scéal do Phól. Lom láithreach, dúirt Pól leis insint do cheannasaí an airm faoin bplean marfach seo. Meas tú an raibh sé éasca ag nia Phóil labhairt leis an gceannasaí?— Ní raibh, mar ba dhuine mór le rá é an ceannasaí. Ach bhí misneach ag nia Phóil agus d’inis sé an scéal dó.

Bhí a fhios ag an gceannasaí go díreach céard a bhí le déanamh aige. Chuir sé arm de bheagnach 500 saighdiúir chun Pól a chosaint. Dúirt sé leo Pól a thabhairt go Céasaráia an oíche sin. Ar tháinig Pól slán?— Tháinig. Ní raibh na drochfhir in ann é a ionsaí! Chlis an plean marfach.

Céard atá le foghlaim agatsa ón scéal seo?— Is féidir leatsa freisin a bheith misniúil cosúil le nia Phóil. Teastaíonn misneach uainn le labhairt le daoine faoi Iehova. An mbeidh sé de mhisneach agatsa leanúint ort ag labhairt le daoine faoi Iehova?— Má bhíonn b’fhéidir go dtabharfá duine éigin slán.