Ester Here Ewebii Lɛ Ayiwala

No mli lɛ, Yudanyo oblayoo ko yɛ Persia maŋ ko ni atsɛɔ lɛ Shushan lɛ mli, ni egbɛ́i ji Ester. Ester weku lɛ fata mɛi ni Nebukadnezar mɔmɔ kɛjɛ Yerusalem lɛ ahe. Ester papa nyɛmi nuu bi ko ni atsɛɔ lɛ Mordekai lɛ ji mɔ ni tsɔse lɛ. Nakai beiaŋ lɛ, Mordekai miisɔmɔ Persia maŋtsɛ ko ni atsɛɔ lɛ Ahasweros.

Be ko lɛ, Maŋtsɛ Ahasweros miitao maŋnyɛ hee. No hewɔ lɛ, etsuji lɛ kɛ yei fɛfɛji fɛɛ ni yɔɔ emaŋtsɛyeli lɛ mli lɛ ba eŋɔɔ, ni Ester hu fata he. Yɛ yei nɛɛ fɛɛ ateŋ lɛ, maŋtsɛ lɛ hala Ester ni efee lɛ maŋnyɛ. Mordekai kɛɛ Ester akɛ ekakɛɛ mɔ ko mɔ ko akɛ Yudanyo ji lɛ.

No mli lɛ, nuu ko ni wóɔ ehe nɔ ni atsɛɔ lɛ Haman lɛ ji maŋ onukpai lɛ fɛɛ anɔkwɛlɔ. Nuu nɛɛ kɛɛ mɔ fɛɛ mɔ akoto lɛ. Shi Mordekai efeee. Enɛ hã Haman mli fu aahu akɛ, etao gbɛ ni ebaatsɔ nɔ egbe lɛ. Be ni Haman ná ele akɛ Mordekai lɛ, Yudanyo ji lɛ lɛ, ekpɛ eyiŋ akɛ ebaahã agbe Yudabii fɛɛ ni yɔɔ maŋtsɛyeli lɛ mli. Ekɛɛ maŋtsɛ lɛ akɛ: ‘Yudabii lɛ, gbɔmɛi gbohii ji amɛ; esa akɛ ohã agbe amɛ fɛɛ.’ Ahasweros kɛɛ lɛ akɛ: ‘Feemɔ amɛ bɔ ni sa ohiɛ.’ Kɛkɛ ni ehã Haman hegbɛ ni ewo mla. Haman wo mla akɛ, yɛ nyɔɔŋ ni ji Adar lɛ gbi ni ji 13 lɛ nɔ lɛ, maŋbii lɛ agbe Yudabii lɛ fɛɛ. Yehowa na nɔ ni Haman feɔ lɛ fɛɛ.

Ester leee akɛ awo mla ko. No hewɔ lɛ, Mordekai tsu ni akɛ eko yahã lɛ, ni ekɛɛ lɛ akɛ: ‘Yaa ni okɛ maŋtsɛ lɛ ayawie.’ Ester kɛɛ lɛ akɛ: ‘Mɔ fɛɛ mɔ ni baaya maŋtsɛ lɛ ŋɔɔ be ni atsɛko lɛ lɛ, abaagbe lɛ. Maŋtsɛ lɛ tsɛko mi akɛ miba eŋɔɔ gbii 30 sɔŋŋ nɛ! Shi maya. Kɛ́ ewó emaŋtsɛ tso lɛ nɔ etsɔɔ mi lɛ, miyi baaná wala. Shi kɛ́ efeee nakai lɛ, magbo.’

Ester tee he ni maŋtsɛ lɛ yɔɔ lɛ. Be ni maŋtsɛ lɛ na lɛ lɛ, ewó emaŋtsɛ tso lɛ nɔ etsɔɔ lɛ. No hewɔ lɛ, Ester tee eŋɔɔ. Kɛkɛ ni maŋtsɛ lɛ bi lɛ akɛ: ‘Ester, mɛni mifee mihã bo?’ Ester hã hetoo akɛ: ‘Miitao maŋmɛ bo kɛ Haman okpɔlɔ.’ Be ni amɛba lɛ, Ester saa etsɛ amɛ okpɔlɔŋmɛɛ kroko. Yɛ okpɔlɔŋmɛɛ ni ji enyɔ lɛ shishi lɛ, maŋtsɛ lɛ saa ebi Ester akɛ: ‘Mɛni mifee mihã bo?’ Ester hã hetoo akɛ: ‘Mɔ ko miitao egbe mi kɛ mimaŋbii lɛ. Ofainɛ, heremɔ wɔ.’ Maŋtsɛ lɛ bi lɛ akɛ: ‘Namɔ taoɔ egbe bo lɛ?’ Ester kɛɛ lɛ akɛ: ‘Haman, gbɔmɔ fɔŋ nɛɛ.’ Ahasweros mli fu waa, ni ehã agbe Haman amrɔ nɔŋŋ.

Shi mɔ ko mɔ ko nyɛɛɛ afo mla ni Haman wo lɛ mli. Maŋtsɛ lɛ po nyɛɛɛ afo mli. No hewɔ lɛ, nɔ ni efee ji akɛ, ewó Mordekai lumɛi lɛ anɔ onukpa, ni ehã lɛ hegbɛ ni ewo mla hee. Mla ni Mordekai wo lɛ hã Yudabii lɛ hegbɛ ni amɛfã amɛhe kɛ́ atutua amɛ. Yɛ Adar gbi ni ji 13 lɛ nɔ lɛ, Yudabii lɛ ye amɛhenyɛlɔi lɛ anɔ kunim. Kɛjɛ nakai gbi lɛ nɔ kɛyaa lɛ, Yudabii lɛ ye gbi jurɔ ko kɛkai kunimyeli nɛɛ.