Ani Okaiɔ?

Ani ona Buu-Mɔɔ ni akalaa nyɛsɛɛ nɛɛ akɛ amɛhe yɛ sɛɛnamɔ waa kɛha bo? Belɛ mɛni hewɔ okɛ saji ni nyiɛ sɛɛ nɛɛ ekaaa ojwɛŋmɔ okwɛɛɛ:

▫ Mɛni ji yiŋtoo titri ni yɔɔ helai ni Yesu tsa lɛ sɛɛ?

Eji hewalɛwoo nɔ kɛha asafo babaoo ni tamɔ gwantɛŋi ni yɔɔ ŋmɛnɛ lɛ akɛ, abaatsa mɛi ni baaje Harmagedon mli lɛ ahelai lɛ mra yɛ Harmagedon sɛɛ. (Yesaia 33:​24; 35:​5, 6)​—12/15, baafa 12.

▫ Mɛni hewɔ be fɛɛ kaimɔ akɛ: ‘Nyɛhiɛa sɔlemɔ mli daa” lɛ he hiaa wɔ lɛ? (Romabii 12:⁠12)

Shihilɛ mli nɔnyɛɛi kɛ gbɛnaa nii baatsii yɛ wɔnɔ waa yɛ bei komɛi amli aahu akɛ wɔhiɛ baakpa nɔ po akɛ wɔɔsɔle. Aloo haomɔi baafa yɛ wɔnɔ aahu akɛ eeeha wɔkpa wɔmli ni filiɔ wɔ yɛ Maŋtsɛyeli hiɛnɔkamɔ lɛ mli Iɛ, ni wɔkpa sɔlemɔ kwraa po. No hewɔ lɛ kaimɔi ni baawo wɔ hewalɛ ni wɔsɔle ni yɛ nɛkɛ gbɛ nɔ lɛ wɔtsi wɔbɛŋkɛ Yehowa lɛ he miihia wɔ.​—12/15, baafa 14.

▫ Mɛni yeɔ odase akɛ Noa gbii lɛ amli Nu Afua lɛ shi kaimɔ nii ni anyɛŋ atsumɔ yɛ adesa weku lɛ jwɛŋmɔ mli?

Abu naa akɛ majianɔ wiemɔi kɛ gbɔmɛi fe 250 gbaa Nu Afuɔ lɛ he blema saji fe 500. Anaa shishijee nibii komɛi ni je amɛhe yɛ blema saji nɛɛ fɛɛ mli.​—1/15, baafa 5.

▫ Apasa gbalɔi ni yɔɔ ŋmɛnɛ lɛ tamɔ Yeremia gbii lɛ amli gbalɔi lɛ yɛ mɛɛ gbɛ nɔ?

Apasa gbalɔi ni yɔɔ ŋmɛnɛ lɛ kɛɔ akɛ amɛdamɔɔ Nyɔŋmɔ najiaŋ, shi amɛjuɔ Nyɔŋmɔ wiemɔi lɛ kɛtsɔɔ nibii ni gbalaa gbɔmɛi kɛjɛɔ nɔ ni Biblia lɛ kɛɔ diɛŋtsɛ he lɛ ni amɛshiɛɔ lɛ nɔ. Enɛ ji anɔkwale titri yɛ Maŋtsɛyeli tsɔɔmɔ lɛ he. (Yeremia 23:30)​—2/1, baafa 4.

▫ Kɛ abaptisi mɔ ko yɛ mumɔ krɔŋkrɔŋ lɛ gbɛi amli lɛ, mɛni no tsɔɔ?

Etsɔɔ akɛ mɔ ni abaptisiɔ lɛ lɛ etswa efai shi akɛ ekɛ mumɔ krɔŋkrɔŋ lɛ baakpa gbee, efeŋ nɔ ko ni ekɛaatsi enitsumɔ yɛ Yehowa webii ateŋ lɛ naa. No hewɔ lɛ, esa akɛ nakai mɔ lɛ kɛ tsulɔ anɔkwafo kɛ nilelɔ kuu lɛ kɛ onukpai agbɛjianɔtoo ni yɔɔ asafo lɛ mli lɛ afee ekome. (Hebribii 13:​7, 17; 1 Petro 5:​1-4)​—2/1, baafa 18.

▫ Mɛni hewɔ amaga jamɔ yeɔ ejalɔ lɛ awui waa lɛ?

Biblia lɛ tsɔɔ akɛ Yehowa Nyɔŋmɔ hiɔ amagai ni amɛnyɛŋ amɛye amɛbuɔ mɛi ni diɔ sɛɛ lɛ koni amɛbɛŋkɛ Nyɔŋmɔ. (5 Mose 7:​25; Lala 115:​4-8) Satan Abonsam “eshwila mɛi ni heee yeee lɛ ajwɛŋmɔi” koni anɔkwale lɛ “akakpɛ miiha amɛ.” (2 Korintobii 4:⁠4) No hewɔ lɛ, kɛ mɔ ko miija amaga lɛ, belɛ mɔ lɛ miifee daimonioi lɛ asuɔmɔnaa nii diɛŋtsɛ. (1 Korintobii 10:​19, 20)​—2/15, baafai 6-7.

▫ Mɛni hewɔ abuɔ gwantɛŋi akɛ kooloi ni sɛɛnamɔ yɔɔ amɛhe waa yɛ Biblia bei amli lɛ?

Anaa amɛhe tsɔi lɛ asɛɛ be fɛɛ be ni anyɛɔ akɛfeɔ atadei ahaa weku lɛ aloo ahɔ̃ɔ akɛnaa shika. Akpãa tooi agboi lɛ akolontoi lɛ akɛkadiɔ Nyamɔ Afi lɛ aloo abaanyɛ akpã ni akɛbɔ kɔkɔ aloo akɛkudɔ tawuu mli ŋaatsɔ̃ɔi. Akɛni tooi ji kooloi ni he tse ni lsraelbii lɛ baanyɛ aye hewɔ lɛ, tooi akuu ni mɔ ko yɔɔ lɛ tsɔɔ niyenii ni ebaana be fɛɛ be, ni anaa fufɔ ni anuɔ kɛjɛɔ amɛmli aloo nɔ ni akɛfeɔ keesuu.​—3/1, baafai 24-5.

▫ Mɛni mɛi ni sumɔɔ Nyɔŋmɔ lɛ biɔ kɛ amɛsɔle ni Nyɔŋmɔ Maŋtsɛyeli lɛ aba lɛ? (Mateo 6:⁠10)

Amɛmiibi ni Nyɔŋmɔ ŋwɛi Maŋtsɛyeli lɛ afee nii, kɛtsɔ adesa nɔyeli gbɛjianɔtoi fɛɛ, ni amɛnyɛɛɛ amɛye amɛshiwooi akɛ amɛkɛ toiŋjɔlɛ kɛ shweshweeshwe shihilɛ baaba lɛ ahiɛkpatamɔ kwraa nɔ. (Daniel 2:44)​—3/15, baafa 6.

▫ Namɛi ji Hemɔkɛyeli Hefalɔi lɛ, ni ani amɛtsɔɔ Triniti?

Hemɔkɛyeli Hefalɔi lɛ ji sɔlemɔ lɛ mlibii ni hi shi yɛ afii ohai enyɔ lɛ naagbee gbɛ. Amɛŋmala woji koni amɛkɛfa Kristojamɔ ni amɛle lɛ he ni amɛkɛte shi amɛwo jeŋ nilee ni ehiii ni yɔɔ Roma je lɛ mli lɛ. Amɛteŋ mɔ ko mɔ ko etsɔɔɔ Triniti tsɔɔmɔ lɛ.​—4/1, baala 24-9.

▫ Ani aha Zakaria, Yohane Baptisilɔ lɛ tsɛ lɛ tɔ mu ni ewieee ni enuuu nii hu, taakɛ Luka 1:62 taoɔ atsɔɔ lɛ?

Gabriel kɛɛ Zakaria baatɔ mu ni enyɛŋ ewie, jeee eninumɔ. (Luka 1:​18-20) Luka 1:64 kɛɔ akɛ: “Ni amrɔ lɛ nɔŋŋ lɛ [Zakaria] naabu gbele ni elilɛi fɛne, ni ewie.” Kadimɔ akɛ atsiii ta akɛ sane ba etoi he akɛ enuuu nii. “Okadi” ta ni atsi yɛ Luka 1:62 lɛ baanyɛ atsɔɔ akɛ afɔ nine ko koni akɛbi Zakaria yiŋkpɛɛ loo enɔkpɛlɛmɔ.​—4/1, baala 31.