“Nyɔŋmɔ Hejɔlɛni Fe Jwɛŋmɔi Fɛɛ Lɛ”

NYƆŊMƆ tsuji anɔkwafoi etsɔ henumɔŋ hejaramɔ bei ni naa wa waa mli yɛ yinɔsane be fɛɛ mli. Kwɛ bɔ ni enɛ ji anɔkwale ŋmɛnɛ, akɛni wɔyɔɔ “jaramɔ bei ni mli wa waa” mli lɛ hewɔ! (2 Timoteo 3: 1, NW) Bɔfo Paulo wo Kristofoi aŋaa ni amɛshɛ amɛ haomɔi fɛɛ amɛshwie Yehowa nɔ kɛtsɔ sɔlemɔ nɔ. Mɛni baajɛ mli aba? “Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛ tsuii kɛ nyɛ jwɛŋmɔi lɛ yɛ Kristo Yesu mli.” — Filipibii 4: 7.

Mɛni ji nɛkɛ “Nyɔŋmɔ hejɔlɛ” nɛɛ? Eji kpoofeemɔ ko ni baa kɛjɛɔ wekukpaa ni bɛŋkɛ kpaakpa ni akɛ Bɔlɔ lɛ naa lɛ mli. Nɛkɛ teemɔŋ ekomefeemɔ nɛɛ haa wɔnaa hekɛnɔfɔɔ akɛ, yɛ wɔ haomɔi lɛ fɛɛ sɛɛ lɛ, Yehowa “shɛŋ emaŋ lɛ efɔŋ, ni ekwaŋ egbɛfaŋnɔ lɛ.” — Lala 94: 14.

Enɛ etsɔɔɔ akɛ haomɔi baaa wɔ nɔ. Lalatsɛ lɛ ŋma akɛ: “Jalɔ amanehului faa babaoo.” (Lala 34:20) Shi Nyɔŋmɔ hejɔlɛ lɛ baanyɛ ekɛ heyeli aba. Yɛ mɛɛ gbɛ nɔ?

Paulo ŋma akɛ, Nyɔŋmɔ hejɔlɛ lɛ “fe jwɛŋmɔi fɛɛ” — aloo taakɛ atsɔɔ shishi yɛ Concordant Version lɛ mli lɛ, “enɔ kwɔ fe jwɛŋmɔŋ shihilɛ fɛɛ.” Yeyeeye-feemɔ baanyɛ aha wɔna henumɔŋ naagbai sɔrɔtoi babaoo. (Jajelɔ 7: 7) Ni kɛlɛ, Nyɔŋmɔ hejɔlɛ lɛ baanyɛ aha wɔfee shiŋŋ, titri lɛ yɛ be mli ni “hewalɛ ni fa kɛteke nɔ” lɛ he hiaa wɔ lɛ. — 2 Korintobii 4:7; 2 Timoteo 1: 7.

Agbɛnɛ hu, Nyɔŋmɔ hejɔlɛ lɛ ji hebuu nɔ̃. Ni taakɛ Paulo ŋma eyaha Filipibii lɛ, ebaanyɛ “[ebu] nyɛ tsuii kɛ nyɛ jwɛŋmɔi lɛ” ahe. Hela wiemɔ ni atsɔɔ shishi akɛ “aaato [aaabu]” lɛ ji asraafoi awiemɔ ni kɛ bulɔi ni damɔɔ shi amɛbuɔ jetsɛremɔ kɛ jenamɔ lɛ ahe mfoniri baa jwɛŋmɔ mli. Yɛ nakai gbɛ nɔ nɔŋŋ hu, Nyɔŋmɔ hejɔlɛ lɛ baanyɛ atsu nii akɛ ŋmɛlɛtswaa 24 bulɔ yɛ wɔtsuii kɛ jwɛŋmɔŋ nyɛmɔi ahe. — 1 Korintobii 10:13; okɛto Efesobii 4:26 he.

Kɛ osusu kaai ni tamɔ nɔnyɛɛ ni wɔkɛkpeɔ ŋmɛnɛ lɛ ahe lɛ, ani Nyɔŋmɔ hejɔlɛ lɛ jeee nɔ ko ni esa akɛ wɔda shi yɛ he lo? — Lala 18:3; okɛto 2 Mose 40:38 he.