Amɛfee yɛ Suɔmɔ Hewɔ

OKULAFO anɔkwafo ko ni sumɔɔ gbɔfeemɔ ni yɔɔ Canada miitsɔse gbekɛbii yei ejwɛ akɛ anɔkwa Kristofoi. Onukpai ni yɔɔ asafo lɛ mli lɛ yɔse akɛ ehe miihia ni asaa nibii pii yɛ eshia lɛ mli. Ebɛ shika loo hesaa ni akɛaatsu nitsumɔ nɛɛ lɛ diɛŋtsɛ. No hewɔ lɛ, yɛ shishitoo mla ni yɔɔ 1 Timoteo 5:9, 10 lɛ naalɛ,onukpai lɛ kɛ nilee to gbɛjianɔ koni atsu enɛ aha lɛ. Yɛ mɛɛ gbɛ nɔ?

Ato gbɛjianɔ koni okulafo lɛ kɛ ebii lɛ ashi shia gbii enumɔ. Asafo lɛ mli bii fe mɛi 80 jɛ amɛtsui mli amɛye amɛbua, amɛkɛ nibii, shika, kɛ be ha. Beni weku lɛ shi shia lɛ mli pɛ kɛkɛ ni nitsulɔi babaoo ni yɔɔ miishɛɛ ba shia lɛ mli tamɔ baalabii. Amɛsaa shia lɛ mligbɛ fɛɛ. Amɛtsimɔ gbogboi ni egbala lɛ ni amɛsha he. Amɛsha shikpɔŋ lɛ fɛfɛo. Akɛ tsu mli ŋtayaa hee kala tsu lɛ mli ni akɛ shikpɔŋ kuntu hee ha tsu lɛ mli. Amɛtsake sarawa hewalɛ kpãi kɛ kanei ni sa saamɔ lɛ fɛɛ. Akɛ sɛii to nɔ ni efite lɛ po najiaŋ. Amɛgbe tsu muu lɛ fɛɛ saamɔ naa yɛ gbii enumɔ pɛ mli!

Miishɛɛ kɛ nitsumɔ ni yaa nɔ lɛ hɛle akutsoŋbii lɛ shi. Odasefoi lɛ amɔdɛŋbɔɔ nɛɛ na akutsoŋnyo ko ni eye afii 80 lɛ nɔ hewalɛ aahu akɛ, ekɛ epɛnte brɔshi ba ni ekɛɛ ebaaye ebua. Nitsulɔi nɛɛ ateŋ mɔ kome nitsumɔtsɛ kɛ dade ko ni akɛbaama kpatashi latɛ nɔ koni lasu atsɔ mli ke. Nitsumɔtsɛ kroko kɛ kɔba hee ni akɛ kpatashi nibii toɔ mli ke. Nuu ko hiɛ sɔ enɛ aahu akɛ eesumɔ ni ekase Yehowa Odasefoi ahe sane babaoo. Ekɛ miishɛɛ he Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ekome.

Beni okulafo lɛ kɛ ebiyei lɛ ku amɛsɛɛ lɛ, ana nii ni feɔ mɔ naakpɛɛ diɛŋtsɛ yɛ amɛhiɛ. Yaafonui, ŋmɔlɔ, kɛ atuu loomɔ babaoo je kpo—Kristofoi asuɔmɔ kɛ henumɔ be ni hiɛ kpaŋ nɔ. Yɛ anɔkwale mli lɛ, suɔmɔ diɛŋtsɛ kɛ asafo lɛ mli bii lɛ ahiamɔ nii ni asusuɔ he ji anɔkwa Kristo jamɔ kadimɔ nii, ejaakɛ Paulo ŋma akɛ: “Belɛ akɛ nɔ ni wɔyɔɔ deka hewɔ lɛ, nyɛhaa wɔfea mɛi fɛɛ ejurɔ, shi titri lɛ, mɛi ni ji hemɔkɛyeli lɛ webii lɛ.”—Galatabii 6:10.