Hebuu Diɛŋtsɛ—Oti ni Enámɔ Wa
ARNOLD ji gbekɛ ko ni sumɔɔ eshwɛmɔ nii ni afee lɛ kootsɛ ni akɛ mamai ehɔlɔ mli ni efũ waa lɛ. Ekɛyaa he fɛɛ he ni eyaa—shwɛmɔ he, niyeli be, ewɔɔ be. Yɛ egbɛfaŋ lɛ, kootsɛ lɛ kɛ miishɛjemɔ kɛ hebuu haa lɛ. Naagba ko ba gbi ko. Kootsɛ laaje!
Beni Arnold foɔ lɛ, enyɛ, etsɛ, kɛ enyɛmimɛi hii etɛ tao amɛ shia agbo lɛ mli koni amɛna kootsɛ lɛ. Yɛ naagbee lɛ amɛteŋ mɔ kome yana yɛ okpɔlɔ shishi adeka ko mli. Eyɛ faŋŋ akɛ Arnold kɛyato jɛmɛ ni ehiɛ kpa he ni ekɛyato lɛ nɔ. Akɛ kootsɛ lɛ ba, ni Arnold tsumɔ ehiɛ yaafonui. Enu miishɛɛnamɔ kɛ hebuu he ekoŋŋ.
Kwɛ bɔ ni ebaahi jogbaŋŋ kɛ aaana naagbai fɛɛ naa yɛ gbɛ ni waaa nɔ nakai—yɛ gbɛ ni yɔɔ mlɛo nɔ tamɔ anaa shwɛmɔ nii ni ji kootsɛ yɛ okpɔlɔ shishi adeka mli! Shi, kɛha mɛi pii lɛ, sanebimɔi ni kɔɔ hebuu he lɛ yɛ hiɛdɔɔ kɛ hwanyaŋŋ kwraa fe nakai. Etamɔ nɔ ni gbɔmɛi biɔ yɛ he fɛɛ he akɛ, ‘Ani mafee mɔ ni akɛ awuiyeli loo basabasa feemɔ baatutua lɛ? Ani oshara yɛ akɛ minitsumɔ baaje midɛŋ? Ani miweku lɛ baana niyenii ni fa kɛ̃? Ani mɛi krokomɛi baatsi amɛhe kɛjɛ mihe yɛ mijamɔ kɛ mijaku hewɔ?’
Gbɔmɛi ni bɛ hebuu lɛ ayi fa diɛŋtsɛ. Taakɛ Jeŋmaji Ekomefeemɔ lɛ tsɔɔ lɛ, jeee akɛ gbɔmɛi ni miihe ashɛ akpekpei toi akpekpei etɛ anine shɛɛɛ tsofafeemɔ ni amɛaana amɛha amɛ helai ni tsɛŋeɔ mɛi babaoo lɛ nɔ kɛkɛ, shi amɛnine shɛɛɛ tsofai ni he hiaa lɛ hu nɔ. Gbɔmɛi fe akpekpei toi akpekpe kome miipiŋ yɛ ohia futaa mli. Eyɛ mli akɛ mɛi ni miihe ashɛ akpekpei toi akpekpe kome yɛ ni amɛnyɛɔ amɛtsuɔ nii moŋ, shi eji nitsumɔ fãfãafãi ni heee mɔ be fɛɛ. Mɛi abɔ ni taoɔ abobaa he lɛ ayi miifa. Beni 1994 baa naagbee lɛ, no mli lɛ anyɛ gbɔmɛi ni yɔɔ shikpɔŋ nɔ lɛ ateŋ mɛi aaafee 115 fɛɛ mli 1 nɔ ni eha amɛjo foi kɛjɛ amɛshiai. Gbɔmɛi akpekpei abɔ ashihilɛ fiteɔ yɛ tsofai fɔji he jarayeli mli shika ni shɛɔ [$] dɔlai akpekpei toi akpekpei 500 daa afi ni teeɔ awuiyelii kɛ basabasa feemɔi babaoo ni anyɛɛɛ akane shi lɛ hewɔ. Tawuu kpatãa gbɔmɛi akpekpei abɔ awala hiɛ. Yɛ 1993 pɛ lɛ, maji 42 kɛ amɛhe wo béi wuji amli, ni 37 krokomɛi hu na maŋkwramɔŋ basabasa feemɔ.
Tawuu, ohia, efɔŋ feemɔ, kɛ nibii krokomɛi ni woɔ adesa hebuu he gbeyei yɛ tsakpaa, ni amɛyifalɛ miiya hiɛ. Kootsɛ ni hɔ okpɔlɔ shishi adeka mli he tsabaa bɛ kɛha nɛkɛ naagbai nɛɛ. Yɛ anɔkwale mli lɛ, adesai nyɛŋ ana tsabaa ko kwraa.
Nyɔŋmɔ Wiemɔ, Biblia lɛ, bɔɔ kɔkɔ akɛ: “Nyɛkaŋɔa nyɛhiɛ nyɛfɔa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.” Belɛ namɔ wɔkɛ wɔhiɛ baafɔ enɔ mɔ? Ŋmalɛ nɛɛ yaa nɔ akɛ: “Ajɔɔ mɔ ni Yakob Mawu lɛ ji ebualɔ, ni ehiɛ ka Yehowa, e-Nyɔŋmɔ lɛ nɔ lɛ; lɛ efee ŋwɛi kɛ shikpɔŋ kɛ ŋshɔ kɛ nɔ fɛɛ nɔ ni yɔɔ mli lɛ.”—Lala 146:3-6.
Mɛni hewɔ wɔbaanyɛ ni wɔkɛ wɔhiɛ afɔ Yehowa nɔ koni ekɛ hebuu abaha shikpɔŋ nɛɛ? Ani abaanyɛ ana miishɛɛ shihilɛ ni hebuu yɔɔ mli lɛ mli ŋɔɔmɔ bianɛ? Mɛɛ gbɛ nɔ Nyɔŋmɔ baatsɔ ajie nibii ni tsiɔ adesa hebuu gbɛ lɛ kɛya?