Ani Obaabo Kɔkɔbɔɔ lɛ Toi?

YƐ May 19, 1997 lɛ, lasuogbele ko tswa yɛ Chittagong kpokpaa ni ji Bangladesh lɛ nɔ. Aŋma kɔɔyɔɔ ni naawalɛ yashɛ kilomitai 250 yɛ ŋmɛlɛtswaa kome mli lɛ afɔ̃ shi yɛ Cox Bazaar. Yɛ akrowai lɛ amli lɛ, sũtsũi ni akɛ jwɛi ewo yiteŋ lɛ laaje, ni eshwɛ ŋmɔtɔi bibii ni jwere shi yɛ hei ni tsutsu lɛ amɛmamɔ lɛ. Tsei kɛ tɛligraf tsei famɔ shwie shi; ekrokomɛi hu amli ku kpeŋ tamɔ bɔlɔwui. Saneyitso ni yɔɔ Bhorar Kagoj adafitswaa wolo lɛ mli lɛ bɔ amaniɛ akɛ, lasuogbele lɛ gbe gbɔmɛi 105.

Kɔɔyɔŋ tsakemɔ nitsumɔhe lɛ tswa he ni ahum lɛ baatswa kɛtsɔ lɛ he adafi ŋmɛlɛtswaai 36 kɛtsɔ hiɛ. Ŋwanejee ko bɛ he akɛ, abaa wala babaoo yi yɛ be mli ni gbɔmɛi akpei ohai abɔ yabaa abo yɛ teemɔhei ni akɛ kɔnkret fee kɛha lasuogbele tswaa mli lɛ, tamɔ mfoniri ni yɔɔ biɛ lɛ tsɔɔ lɛ.

Yehowa Odasefoi kɛ nɔ ni fe afii oha ejaje tsakemɔ ko ni yɔɔ gbeyei ni ebɛŋkɛ ni baafite nii babaoo fe lasuogbele fɛɛ lasuogbele ko ni ehi shi pɛŋ lɛ etsɔɔ. Biblia lɛ tsɛɔ lɛ “Yehowa gbi wulu ni yɔɔ gbeyei lɛ.” (Yoel 3:4) Kɛ wɔfee toiboo wɔha gbalɛ kɔkɔbɔɔ he shɛɛ sane ni anaa yɛ Biblia lɛ mli lɛ, ekolɛ wɔbaaje emlifu lɛ mli.—Zefania 2:2, 3.

Dabi, Yehowa Odasefoi jeee hiɛkpatamɔ he gbalɔi. Amɛnɔ lɛ ji hiɛnɔkamɔ he shɛɛ sane. Amɛmiisumɔ ni amɛye amɛbua gbɔmɛi koni amɛkase Nyɔŋmɔ Maŋtsɛyeli lɛ he nii, nɔ ni etsɛŋ ni ebaajie mɛi ni ejaaa lɛ fɛɛ kɛya lɛ. Nyɔŋmɔ Wiemɔ ni ji Biblia lɛ kɛɔ wɔ akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ́ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”—Lala 37:10, 11.

[He ni Sane lɛ Jɛ]

WHO/League of Red Cross