Maŋtsɛyeli Jajelɔi Bɔ Amaniɛ

Shiɛmɔ ‘yɛ Be ni Hi Jogbaŋŋ Mli kɛ Jaramɔ Be Mli’

BENI ta fɛ́ yɛ Bosnia kɛ Herzegovina maji lɛ amli lɛ, mɛi akpei abɔ kɛ shihilɛ ni mli wa waa diɛŋtsɛ kpe. Yɛ nakai kaa be lɛ mli lɛ, Yehowa Odasefoi bɔ mɔdɛŋ waa koni amɛkɛ ekãawoo kɛ hiɛnɔkamɔ aha gbɔmɛi lɛ. Nɔ ni nyiɛ sɛɛ nɛɛ ji nibii bibii ni jɛ wolo ko ni Odasefonyo ko ni sɔmɔ yɛ Sarajevo lɛ ŋma lɛ mli.

“Shihilɛ lɛ mli wa yɛ biɛ, shi gbɔmɛi hereɔ Biblia mli anɔkwale lɛ nɔ diɛŋtsɛ. Odasefoi ni yɔɔ jɛmɛ lɛ ji tsuishitoo he nɔkwɛmɔnɔ ni yɔɔ naakpɛɛ. Yɛ heloonaa nii gbɛfaŋ lɛ, nɔ ko fioo ko pɛ amɛyɔɔ, shi amɛyɛ ekãa jogbaŋŋ. Shwɛ fioo ni oblahii kɛ oblayei fɛɛ ni yɔɔ asafo lɛ mli lɛ kɛ amɛhe awo be-fɛɛ sɔɔmɔ lɛ mli. Akɛ ekãa nɛɛ woɔ shiɛlɔi heei lɛ ahewalɛ, ni efɔɔ kaa akɛ amɛkɛ ŋmɛlɛtswai 60 loo nɔ ni fe nakai yɛ nyɔɔŋ kome mli tsuɔ nii yɛ shiɛmɔ nitsumɔ lɛ mli yɛ amɛklɛŋklɛŋ shiɛmɔ yɛ nyɔɔŋ lɛ mli.

“Yɛ shia kɛ shia shiɛmɔ lɛ sɛɛ lɛ, wɔka gbɛ̀i srɔtoi krokomɛi koni wɔnine ashɛ gbɔmɛi lɛ anɔ. Ákɛ nɔkwɛmɔnɔ lɛ, Biblia he woji ni wɔkɛhaa yɛ fuuhei babaoo ni yɔɔ maŋtiase lɛ mli lɛ ewo yibii kpakpai.

“Aye odase hu yɛ helatsamɔhei. Yɛ Cardiology Department (He ni Akwɛɔ Tsui Hela Yɛ) ni yɔɔ Sarajevo helatsamɔhe ko lɛ mli lɛ, datrɛfonyo nukpa lɛ he December 8, 1996, Awake! lɛ, ni hiɛ saneyitso akɛ ‘Heart Attack​—⁠What Can Be Done?’ (‘Tsui Hela⁠—⁠Mɛni Abaanyɛ Atsu yɛ He?’) Ebi ni akɛ ekomɛi afata he aha lɛ bɔni afee ni ekɛha datrɛfoi krokomɛi. Aŋmɛ Odasefoi lɛ agbɛ koni amɛsara helatsɛmɛi fɛɛ ni yɔɔ ni ekwɛɔ amɛnɔ lɛ mli lɛ. No hewɔ lɛ, yɛ ŋmɛlɛtswaa kome kɛ be fioo ko mli lɛ, aja woji tɛtrɛbii 100 kɛjɛ saatso he kɛtee saatso he. Helatsɛmɛi babaoo kɛɛ akɛ no ji klɛŋklɛŋ be ni mɔ ko ebasara amɛ yɛ helatsamɔhe lɛ ní ekɛ ekãawoo kɛ hiɛnɔkamɔ eha amɛ.

“Yɛ be kroko mli lɛ, akɛ wolo tɛtrɛɛ lɛ mli saji ni kɔɔ gbekɛbii ahe yasara Pediatric Department (Nitsumɔhe ni Akwɛɔ Gbekɛbii Yɛ) lɛ. Datrɛfonyo nukpa lɛ hu he Mi-Wolo ni Gbaa Biblia Mli Saji lɛ fioo komɛi koni akane yɛ nikanemɔ tsũ lɛ mli. Amrɔ nɛɛ, nyɛmɛi ni yasaraa amɛbii lɛ yɛ helatsamɔhe lɛ kaneɔ Biblia mli saji lɛ amɛtsɔɔ amɛ daa gbi. Ato gbɛjianɔi hu koni ayasara datrɛfonyo nɛɛ yɛ eshia.

“Ayɛ NATO [North Atlantic Treaty Organization] asraafoi akpei abɔ ni jɛ maji srɔtoi amli yɛ Sarajevo. Aye mɛnɛɛmɛi hu odase jogbaŋŋ. Bei pii lɛ wɔkɛ dɛhiɛmɔ wolo ni ji Good News for All Nations kɛ Buu-Mɔɔ kɛ Awake! woji tɛtrɛbii ni yɔɔ wiemɔi srɔtoi amli lɛ tsuɔ nii kɛjɛɔ asraafoi atawuu tsɔne mli kɛyaa asraafoi atawuu tsɔne mli. Aja woji tɛtrɛbii ni fa fe 200 yɛ Italy asraafoi nsrai lɛ amli. Nɔ ni yɔɔ naakpɛɛ ji akɛ, Italy asraafoi babaoo kɛɛ akɛ amɛkɛ Yehowa Odasefoi egbako sane dã. Ojogbaŋŋ, wɔnine shɛ amɛnɔ yɛ Sarajevo.

“Gbi ko lɛ, akɛ asraafoi atawuu tsɔne ko ma gbɛ lɛ afãgbɛ. Mikɛ akataŋwia ni mihiɛ lɛ tswa shinaa lɛ, ni asraafonyo ko je kpo. Mikɛ Buu-Mɔɔ ni aŋma yɛ sɛɛ akɛ, ‘Toiŋjɔlɛ he Bɔfoi​—⁠Namɛi Ni?’ lɛ ha lɛ. Asraafonyo lɛ kwɛ mi ni ebi akɛ, ‘Ojeee Yehowa Odasefoi lɛ ateŋ mɔ ko, aloo oji eko?’ Beni ená ele akɛ eko ji mi lɛ, eha hetoo akɛ, ‘Miheee miyeee; nyɛyɛ biɛ hu lo! Ani he ko yɛ, yɛ je lɛ mli ni Odasefoi bɛ jɛmɛ lo?’ ”[1]

Bɔfo Paulo wo ŋaa akɛ: “Shiɛmɔ wiemɔ lɛ, kã he, yɛ be ni hi jogbaŋŋ mli, yɛ jaramɔ be mli.” (2 Timoteo 4:⁠2, NW) Taakɛ amɛnanemɛi heyelilɔi ni yɔɔ jeŋ fɛɛ lɛ ji lɛ, Yehowa Odasefoi ni yɔɔ Sarajevo lɛ miifee nakai po kɛmiijɛ saatso he kɛmiiya saatso he kɛ asraafoi atawuu tsɔne he kɛmiiya asraafoi atawuu tsɔne he!