Okɛ Obii Lɛ Akane Nii

Taakɛ Brazilbii awolo tɛtrɛɛ Veja tsɔɔ lɛ, efɔɔ kaa akɛ mɛi ni fɔɔ nikanemɔ waa lɛ abii náa he miishɛɛ waa akɛ amɛaakane woji fe bɔ ni gbekɛbii ni afeee nikanemɔ he nɔkwɛmɔnɔ ni tamɔ nɛkɛ ahaaa amɛ yɛ shia lɛ feɔ. Martha Hoppe, gbekɛbii adalɛ he nikaselɔ ni he esa waa lɛ kɛɛ akɛ: “Ekome ni afeɔ kɛkaneɔ nii lɛ haa ekomefeemɔ ni yɔɔ fɔlɔi kɛ bii ateŋ lɛ mli waa ni ehaa gbekɛ lɛ nuɔ wolo lɛ mli saji lɛ ashishi jogbaŋŋ.”

Nii ni oookane lɛ waa otsɔɔ obii lɛ hu haa bo hegbɛ koni oha sanebimɔi ahetoo. Obaanyɛ ogba mfonirii fɛɛ ni kɔɔ sane lɛ he lɛ he sane. Hoppe kɛɛ akɛ: “Kɛ gbekɛ lɛ nu woji lɛ amli saji ashishi jogbaŋŋ lɛ, ebaakanya lɛ jogbaŋŋ koni etao woji lɛ kɛ́ eetao ni ele nibii babaoo.”

Fɔlɔi babaoo ni yɔɔ Yehowa Odasefoi ateŋ lɛ náa nii ni amɛkɛ amɛbii kaneɔ lɛ he miishɛɛ. Ekolɛ amɛbaakane woji tamɔ Mi-Wolo ni Gbaa Biblia Mli Saji, Tsɔɔlɔ Kple lɛ Toiboo, kɛ Gbɔmɔ ni Fe Mɔ Fɛɛ Mɔ ni Ehi Shi Pɛŋ.* Jeee akɛ woji ni tamɔ enɛɛmɛi yeɔ ebuaa gbekɛbii koni amɛtsɔmɔ nikanelɔi kpakpai kɛkɛ, shi koni eha miishɛɛ ni amɛnáa yɛ wolo ní aja fe fɛɛ yɛ je lɛŋ​—⁠Ŋmalɛ Krɔŋkrɔŋ lɛ he lɛ aya hiɛ hu. No hewɔ lɛ, kɛ́ oji fɔlɔ lɛ, feemɔ nɔkwɛmɔnɔ ofɔ̃ shi oha obii lɛ, kɛtsɔ ni ooofee ohe mɔ ni sumɔɔ Nyɔŋmɔ Wiemɔ lɛ kanemɔ waa lɛ nɔ. (Yoshua 1:​7, 8) Ni bɔ fɛɛ bɔ ni fee lɛ, too be koni okane nii otsɔɔ amɛ!

[Shishigbɛ niŋmaa]

Mɛi ni fee ji Watchtower Bible and Tract Society of New York, Inc.