Hewolo Nɔ Su Mlijiemɔ Kɛ Jamɔ

MARK MATHABANE, ni ji woloŋmalɔ ko ni afɔ́ lɛ yɛ South Africa lɛ wie yɛ sanegbaa ko ní tee nɔ yɛ ekɛ Time magazine mli akɛ: “Beni miba U.S. yɛ afi 1978 lɛ, misusu akɛ Amerika ejaje ehewolo nɔ su mlijiemɔ naagbai lɛ jeeŋmɔ, ni tsɔɔ akɛ mɛi diji ji maŋbii ni yeɔ egbɔ pɛpɛɛpɛ. Yɛ gbɛ̀i babaoo nɔ lɛ, mina akɛ enɛ ji anɔkwale. Etamɔ nɔ ni U.S. nyiɛ South Africa hiɛ afii oha. Kɛkɛ ni miyɔse yɛ naakpɛɛ gbɛ nɔ akɛ, tsakemɔ tsɔ̃ ko bako yɛ gbɔmɛi lɛ atsui mli.” Mɛni kɛ nii ni ha enaa kpɛ ehe nɛɛ ba?

Mathabane kɛɛ akɛ: “Bei ni akɛgbálaa hewolo nɔ sui ateŋ fe fɛɛ yɛ Amerika lɛ ateŋ ekome ji Hɔgbaa leebi ŋmɛlɛ 11.” Ewie akɛ yɛ sɔlemɔi lɛ amli po lɛ, gbɔmɛi nyɛɛɛ amɛkɛ mɛi ni jɛ hewolo nɔ su kroko mli lɛ afee ekome yɛ jamɔ mli. Ebi akɛ: “Te amɛbaanu he amɛha tɛŋŋ yɛ otsii lɛ amli gbii krokomɛi amli.” Beni etsĩɔ tsɔsemɔ tã akɛ nɔ ni baaye abua kɛha tsakemɔ lɛ, Mathabane kɛɛ akɛ: “Ahaa oleɔ kɛjɛɔ tsɔsemɔ mli akɛ adesai fɛɛ yeɔ egbɔ.”

Yehowa Odasefoi kpɛlɛɔ nɔ akɛ tsɔsemɔ ji hetoo lɛ, shi titri lɛ, amɛjieɔ tsɔsemɔ ni damɔ Nyɔŋmɔ Wiemɔ lɛ nɔ lɛ yi. Hɛɛ, Biblia lɛ yeɔ ebuaa amɛ ni amɛkumɔɔ hewolo nɔ su he jwɛŋmɔ fɔŋ namɔ gbɛtsii nii lɛ​—⁠yɛ shikpɔji ni wiemɔ mli hetsɛ̃ fa yɛ mli lɛ po nɔ. Daa otsi yɛ amɛ Maŋtsɛyeli Asai anɔ lɛ, gbɔmɛi ni jɛ wekui kɛ maji srɔtoi amli buaa amɛhe naa koni akɛ Nyɔŋmɔ Wiemɔ, ni ji Biblia lɛ mli mlai kɛ shishitoo mlai atsɔse amɛ. Abiii ni mɔ ko aye too yɛ nɛkɛ kpeei nɛɛ ashishi. Wɔmiifɔ̃ bo nine koni oba!