Adesai​—Ani Amɛji Kooloi ni Nɔ Kwɔlɔ Kɛkɛ?

“Ani srɔtofeemɔ ko yɛ nɔ ni wɔheɔ wɔyeɔ yɛ he ni wala jɛ kɛba lɛ he?”

Oblayoo ko ni eye afii 16 ni jɛ Brazil bi sane nɛɛ yɛ be mli ni ekpaa ewiemɔ ni yitso ji “Adesai—Ani Amɛji Kooloi ni Nɔ Kwɔlɔ Kɛkɛ?” lɛ hiɛ lɛ. Beni etsɔɔlɔ lɛ nine eshɛ June 22, 1998, Awake! lɛ ni wieɔ nakai sane lɛ he lɛ eko nɔ sɛɛ lɛ, tsɔɔlɔ lɛ fɔ̃ nikaselɔ nɛɛ nine koni ebawie sanebimɔ nɛɛ he etsɔɔ klas lɛ.

Odasefonyo gbekɛ lɛ ma bɔ ni sutsakemɔ tsɔɔmɔ ni damɔ jeŋ muu fɛɛ nihalamɔ nɔ lɛ efite nii eha lɛ nɔ mi. Ákɛ nɔkwɛmɔnɔ lɛ, mɛi babaoo nuɔ he akɛ, sutsakemɔ tsɔɔmɔ lɛ eha mɛi komɛi buɔ ta akɛ eji adebɔɔ naa naanɔ hepelemɔ kɛha yibaamɔ lɛ fã, ni egbele gbɛ kɛha Fasist kɛ Nazi nɔyeli lɛ shitee.

Nikaselɔ lɛ tsɔɔ akɛ gbɛ wulu kã adesai kɛ kooloi ateŋ. Ewie akɛ: “Adesai pɛ baanyɛ aná mumɔŋ nɔyaa. Adesai pɛ bɔɔ mɔdɛŋ ni amɛna shishinumɔ kɛ yiŋtoo ni yɔɔ shihilɛ sɛɛ. Adesai pɛ feɔ yeyeeye yɛ gbele he, amɛsusuɔ he ni amɛjɛ kɛba lɛ he, ni amɛ pɛ amɛyɔɔ suɔmɔ akɛ amɛaahi shi kɛya naanɔ. Kwɛ bɔ ni ehe hiaa akɛ wɔfiteɔ be koni wɔkɛtao he ni wɔjɛ kɛba lɛ he nii babaoo!”

Tsɔɔlɔ lɛ jie wiemɔ fɛfɛo ni akɛha lɛ yi. Etsɔɔ akɛ akɛni Odasefonyo oblayoo fioo nɛɛ sumɔɔ nikanemɔ hewɔ lɛ, omanyeyeli jɛ mli kɛba lɛ. Ale gbekɛ yoo lɛ yɛ skul akɛ mɔ ni kaneɔ Biblia he woji tamɔ Awake! kɛ Buu-Mɔɔ lɛ waa.

Yehowa Odasefoi susuɔ hewalɛ ni sutsakemɔ tsɔɔmɔ lɛ ená yɛ oblahii kɛ oblayei atsuii kɛ amɛjwɛŋmɔi anɔ lɛ he diɛŋtsɛ. Enɛ hewɔ lɛ, asafo ni gbekɛ yoo fioo nɛɛ kɛ ehe bɔɔ lɛ wo Odasefoi oblahii kɛ oblayei lɛ hewalɛ koni amɛkɛ June 22, 1998, Awake! wolo tɛtrɛɛ lɛ eko aha amɛtsɔɔlɔi kɛ amɛskulbii lɛ. Aja woji tɛtrɛbii 230 yɛ skul srɔtoi ni yɔɔ maŋtiase lɛ mli lɛ. Mɔ ni kwɛɔ Science Department lɛ nɔ yɛ skul nɛɛ ateŋ ekome mli lɛ shɛ Awake! wolo tɛtrɛɛ lɛ.

Hɛɛ, nɔ ni wɔheɔ wɔyeɔ yɛ he ni wala jɛ kɛba lɛ he miihia! Gbekɛyoo fioo nɛɛ kɛ enanemɛi lɛ etsɔɔ akɛ Bɔlɔ lɛ mli hemɔkɛyeli eha shishinumɔ diɛŋtsɛ eba amɛshihilɛ mli.