Maŋtsɛyeli Jajelɔi Bɔ Amaniɛ
“Nyɛle Biblia lɛ Mli Waa Diɛŋtsɛ”
BENI Yesu ni eye afii 12 lɛ kɛ ekãa wie etsɔɔ Yerusalem jamɔŋ hiɛnyiɛlɔi lɛ, “mɛi fɛɛ ni boɔ lɛ toi lɛ naa kpɛ amɛhe yɛ enilee kɛ ehetooi ni ehaa lɛ ahewɔ.” (Luka 2:47) Nakai nɔŋŋ hu ŋmɛnɛ lɛ, Yehowa tsuji oblahii kɛ oblayei babaoo kɛ ekãa wieɔ Nyɔŋmɔ kɛ Biblia lɛ he amɛtsɔɔ amɛtsɔɔlɔi kɛ nanemɛi skulbii, ni bei pii lɛ, nɔ ni jɛɔ mli baa lɛ ji miishɛɛ nɔ nakai nɔŋŋ.
Tiffany ni eye afii 14 lɛ yɛ klas beni akɛ sane ko ni asusuɔ he lɛ yakɔ Biblia mli gbalɛ ni kɔɔ otsii 70 ni yɔɔ afii amli ni anaa yɛ Daniel 9:24-27 lɛ he. Tsɔɔlɔ lɛ kɛ anɔkwalei fioo komɛi ni kɔɔ kukuji lɛ ahe lɛ ha, shi egbálaaa sane lɛ mli ni eŋmɛɛ he.
Klɛŋklɛŋ lɛ, Tiffany shashao shi akɛ eeewo enine nɔ. Ekɛɛ akɛ: “Shi yɛ yiŋtoi komɛi ahewɔ lɛ, egba minaa akɛ agbálaaa kukuji lɛ amli jogbaŋŋ kɛmɔɔɔ shi. Ni beni mihɛleɔ shi lɛ, minine yɛ ŋwɛi.” Efee tsɔɔlɔ lɛ naakpɛɛ akɛ mɔ ko hiɛ edɔ akɛ ebaawie sane nɛɛ he nɔ ko, ejaakɛ nikaselɔi lɛ ateŋ mɛi babaoo nuuu shishi.
Beni aŋmɛ Tiffany gbɛ ni ewie lɛ, ete shi edamɔ shi ni ekɛ amɛ wie ní ekwɛɛɛ wolo ko mli. Skultsu lɛ mli fee dioo diɛŋtsɛ beni egbe naa lɛ. Tiffany tsui fã fioo. Kɛkɛ ni skulbii lɛ tswa amɛdɛ amɛha lɛ aahu.
Tsɔɔlɔ lɛ kɛɛ shii abɔ akɛ: “Obɔ mɔdɛŋ waa diɛŋtsɛ, Tiffany, Obɔ mɔdɛŋ waa diɛŋtsɛ.” Ekpɛlɛ nɔ akɛ, ele akɛ saji babaoo yɛ ni kɔɔ nakai kukuji lɛ ahe, shi Tiffany ji klɛŋklɛŋ mɔ ni gbála mli etsɔɔ lɛ ni enu shishi jogbaŋŋ diɛŋtsɛ. Ní akpa lɛ, ebi Tiffany bɔ ni fee ni ele nibii babaoo nɛkɛ yɛ Biblia lɛ mli.
Eha hetoo akɛ: “Akɛni mi ji Yehowa Odasefoi lɛ ateŋ mɔ kome hewɔ. Ehe bahia ní mifɔlɔi agbála nakai gbalɛ lɛ mli amɛtsɔɔ mi shii abɔ dani minu shishi.”
Bɔ ni ele Biblia mli eha lɛ hu fee klasbii lɛ hu naakpɛɛ. Nikaselɔ lɛ eko kɛɛ Tiffany akɛ: “Kpaako mina nɔ hewɔ ni nyɛ Yehowa Odasefoi lɛ nyɛyashiɛɔ yɛ shia kɛ shia lɛ; ejaakɛ nyɛle Biblia lɛ mli waa diɛŋtsɛ.” Mɛi krokomɛi hu wo lɛ shi akɛ, amɛyeŋ ehe fɛo dɔŋŋ yɛ jamɔ mli ni eyɔɔ lɛ hewɔ.
Ní Tiffany yakɛɛ efɔlɔi nɔ ni ba lɛ, amɛwo lɛ ŋaa koni eyaha etsɔɔlɔ lɛ Nilee Ni Kɛ Mɔ Yaa Naanɔ Wala Mli wolo lɛ eko. Beni efee nakai ní ekɛ he ni gbálaa Daniel gbalɛ lɛ mli lɛ tsɔɔ etsɔɔlɔ lɛ, eŋɔ wolo lɛ amrɔ nɔŋŋ ni eda lɛ shi.
Lɛɛlɛŋ, kɛ Kristofoi oblahii kɛ oblayei kɛ ekãa jaje nibii ni amɛfɔlɔi etsɔɔ amɛ ni kɔɔ Nyɔŋmɔ kɛ Biblia lɛ he amɛtsɔɔ mɛi krokomɛi lɛ, amɛkɛjieɔ Yehowa yi ni amɛkɛwoɔ ehiɛ nyam ni ehaa amɛnáa jɔɔmɔ hu.—Mateo 21:15, 16.