“Mabɔle Ofɔleshaa Latɛ lɛ, Yehowa”
“MAFƆ midɛ yɛ bemyeli mli, ni mabɔle ofɔleshaa latɛ lɛ, Yehowa.” (Lala 26:6) Maŋtsɛ David ni hi shi yɛ blema lɛ kɛ nɛkɛ wiemɔi nɛɛ jaje ehetuu-kɛhamɔ kɛha Yehowa. Shi, mɛni hewɔ ‘ebaabɔle’ Yehowa afɔleshaa latɛ lɛ he lɛ, ni yɛ mɛɛ shishinumɔ naa?
Kɛha David lɛ, Yehowa jamɔ shikwɛ̃ɛhe lɛ ji kpee buu kɛ emli afɔleshaa latɛ ni akɛ akɔɔble ehà he, ni yɔɔ Gibeon, yɛ Yerusalem kooyigbɛ yɛ enɔyeli be lɛ mli lɛ. (1 Maŋtsɛmɛi 3:4) Afɔleshaa latɛ lɛ shɛɔ aaafee mitai 2.2 koji ejwɛ dalɛ, ni ji bibioo kwraa fe afɔleshaa latɛ agbo ni abaama yɛ Salomo sɔlemɔtsu lɛ kpoteŋ lɛ.a Shi kɛlɛ, David mii shɛ ehe babaoo yɛ kpee buu lɛ kɛ emli afɔleshaa latɛ, ni ji Israel jamɔ krɔŋŋ shikwɛ̃ɛhe lɛ he.—Lala 26:8.
Ashãa shãa afɔlei, niyenii afɔlei, kɛ sɔ̃ afɔlei yɛ afɔleshaa latɛ lɛ nɔ, ni daa afi Kpatamɔ Gbi lɛ jieɔ afɔlei ni ashãa yɛ maŋ lɛ gbɛfaŋ lɛ kpo. Afɔleshaa latɛ lɛ kɛ enɔ afɔlei lɛ yɛ shishinumɔ ko kɛha Kristofoi ŋmɛnɛ. Bɔfo Paulo tsɔɔ mli akɛ afɔleshaa latɛ lɛ damɔ shi kɛha Nyɔŋmɔ suɔmɔnaa nii, ni no mli E-kpɛlɛɔ afɔleshaa ni sa kɛha adesai akpɔmɔ nɔ yɛ. Paulo wie akɛ: “Nakai suɔmɔnaa nii lɛ mli atsuu wɔhe yɛ kɛtsɔ Yesu Kristo gbɔmɔtso ní ekɛha shikome nyɔŋlo lɛ nɔ.”—Hebribii 10:5-10.
Kɛ osɔfoi lɛ miiba ni amɛbasɔmɔ yɛ afɔleshaa latɛ lɛ he lɛ, nɔ ni amɛfɔɔ feemɔ ji akɛ amɛfɔɔ amɛniji ahe yɛ nu mli ni amɛkɛtsuuɔ amɛhe. Belɛ, esa akɛ Maŋtsɛ David afɔ eniji ahe “yɛ bemyeli mli” dani ‘enyiɛ kɛbɔle afɔleshaa latɛ lɛ he.’ Efee nii “yɛ tsui ni eye emuu kɛ jalɛ mli.” (1 Maŋtsɛmɛi 9:4) Eji efɔɔɔ edɛŋ yɛ nɛkɛ gbɛ nɔ kulɛ, akpɛlɛŋ ejamɔ—‘afɔleshaa latɛ ni ebɔleɔ’ he—lɛ nɔ. Eji anɔkwale akɛ, David jeee Levinyo, ni ebɛ hegbɛ ni ekɛaatsu osɔfoi anitsumɔ yɛ afɔleshaa latɛ lɛ he. Eyɛ mli akɛ maŋtsɛ ji lɛ moŋ, shi aŋmɛɛɛ lɛ gbɛ ni eya kpee buu lɛ kpoteŋ. Shi kɛlɛ, akɛ Israelnyo anɔkwafo lɛ, ebo Mose Mla lɛ toi, ni ekɛ efɔleshaa nii lɛ baa afɔleshaa latɛ lɛ he daa. Enyiɛ kɛbɔle afɔleshaa latɛ lɛ he kɛ shishinumɔ akɛ eha eshihilɛ bɔle jamɔ krɔŋŋ he.
Ani wɔbaanyɛ wɔnyiɛ David nɔkwɛmɔnɔ lɛ sɛɛ ŋmɛnɛ? Hɛɛ. Kɛji wɔná hemɔkɛyeli yɛ Yesu afɔleshaa lɛ mli, ni ‘wɔniji ahe bɛ muji ko ni wɔtsui amli tse,’ ni wɔkɛ tsui muu fɛɛ sɔmɔ Yehowa lɛ, no lɛ, wɔ hu wɔbaanyɛ wɔfɔ wɔdɛ yɛ bemyeli mli ni wɔshi ako kɛbɔle Nyɔŋmɔ afɔleshaa latɛ lɛ he.—Lala 24:4.
[Shishigbɛ niŋmaa]
a Nakai afɔleshaa latɛ lɛ shɛɔ aaafee mitai 9 koji ejwɛ dalɛ.
[Mfoniri ni yɔɔ baafa 23]
Afɔleshaa latɛ lɛ feɔ Yehowa suɔmɔnaa nifeemɔ he mfoniri, no nɔ etsɔɔ ekpɛlɛɔ afɔleshaa ni sa kɛha adesai akpɔmɔ lɛ nɔ