Ani Okɛ Nilee Tsuɔ Nii?

BENI Mose woleɔ kojolɔi ni baaye Israel nɔ lɛ, ebɔ mɔdɛŋ koni ená “hii ni le nii ni yɔɔ jwɛŋmɔ kɛ niiashikpamɔ.” (5 Mose 1:13, NW) Niiashikpamɔ ni anáa kɛjɛɔ afii ni mɔ ko eye lɛ mli lɛ, jeee taomɔ nii titri tsɔ. Nilee kɛ jwɛŋmɔ ji nɔ ko hu ni he hiaa.

Mɔ ni yɔɔ nilee jieɔ jwɛŋmɔ kpakpa kpo yɛ wiemɔ kɛ jeŋba mli. Taakɛ Webster’s Ninth New Collegiate Dictionary lɛ tsɔɔ lɛ, mɔ ni yɔɔ nilee ji mɔ ko hu ni “nyɛɔ ekɛ enilee toɔ.” Hɛɛ, “wiemɔ be yɛ,” ni “dioofeemɔ be yɛ,” ni mɔ ni yɔɔ nilee kɛ srɔtofeemɔ nɛɛ tsuɔ nii. (Jajelɔ 3:7) Bei pii lɛ, ayɛ yiŋtoo kpakpa hewɔ ni esa akɛ afee dioo, ejaakɛ Biblia lɛ kɛɔ akɛ: “Wiemɔ babaoo yɔɔ nɛɛ, nɔtɔmɔ kpaaa yɛ mli; shi mɔ ni mɔɔ enaabu mli lɛ, nilelɔ ni.”—Abɛi 10:19.

Esa akɛ Kristofoi akwɛ amɛhe nɔ jogbaŋŋ yɛ bɔ ni amɛkɛ mɛi krokomɛi yeɔ haa lɛ mli. Mɔ ni fɔɔ wiemɔ, aloo mɔ ni kɛ wiemɔ nyɛɔ mɛi anɔ lɛ, ebafeee mɔ ni he hiaa waa be fɛɛ be aloo mɔ ni kɛ anaaa lɛ lɛ anyɛɛɛ nɔ ko afee. Kaimɔ akɛ, Mose yɛ “hewalɛ yɛ wiemɔi” amli, shi enyɛɛɛ enyiɛ Israel maŋ lɛ hiɛ jogbaŋŋ aahu kɛyashi be mli ni ekase tsuishitoo, heshibaa, kɛ henɔyeli. (Bɔfoi lɛ Asaji 7:22) No hewɔ lɛ, esa akɛ mɛi ni atuu hegbɛ awo amɛdɛŋ koni amɛkwɛ mɛi krokomɛi anɔ lɛ titri abɔ mɔdɛŋ ni amɛba amɛhe shi ni amɛjie mɔ he susumɔ mumɔ kpo.—Abɛi 11:2.

Atsɛɔ mɛi ni Yesu Kristo etuu “enibii lɛ” ewo amɛdɛŋ yɛ Nyɔŋmɔ Wiemɔ lɛ mli akɛ, ‘anɔkwafoi kɛ nilelɔi.’ (Mateo 24:45-47) Amɛkɛ henɔwomɔ enyiɛɛɛ Yehowa hiɛ, ni amɛfeee nɔ ko kɛkɛ ni amɛsusuuu he; asaŋ amɛshashaooo shi yɛ gbɛtsɔɔmɔ ni yɔɔ faŋŋ ni Nyɔŋmɔ kɛha yɛ sane ko he lɛ he. Amɛle akɛ wiemɔ be yɛ, kɛ be ni esa akɛ akɛmɛ koni akɛgbála saji amli babaoo hu. Jeee amɛhemɔkɛyeli lɛ he nɔkwɛmɔnɔ pɛ kɛkɛ esa akɛ Kristofoi akase, shi esa akɛ amɛtsɔɔ akɛ amɛji mɛi ni yɔɔ nilee taakɛ tsulɔ kuu lɛ ji lɛ.—Hebribii 13:7.