“Ekomefeemɔ He Nɔkwɛmɔnɔ”

NAKAI ji sane ko ni aŋma awo adafitswaa wolo ko ni yɔɔ Indaiatuba yɛ São Paulo, Brazil lɛ yitso. Namɛi fee nɔkwɛmɔnɔ lɛ? Niŋmalɔ lɛ tsɔɔ mli akɛ: “Yehowa Odasefoi ni to gbɛjianɔ koni amɛma ‘Maŋtsɛyeli Asa’ hee, taakɛ amɛtsɛɔ amɛsɔlemɔtsui aloo hei ni amɛkpeɔ yɛ lɛ miifee ekomefeemɔ ni anyɛŋ aku hiɛ afɔ̃ nɔ lɛ he nɔkwɛmɔnɔ kpakpa yɛ faŋŋ mli lɛ amɛmiifɔ̃ shi.”

Ekomefeemɔ ni yɔɔ Yehowa Odasefoi lɛ ateŋ lɛ jeɔ kpo faŋŋ yɛ bei ni tamɔ enɛɛmɛi amli. No hewɔ lɛ, wolo lɛ tsɔɔ akɛ: “Eji nɔ ko ni kanyaa mɔ waa akɛ ooona hii, yei, kɛ gbekɛbii ni kɛ amɛhe eha ni amɛmiitsu nii kutuu kɛmiijɛ amɛtsui mli koni amɛma tsũ ni amɛbaanyɛ amɛkpe yɛ mli kutuu ni amɛjá Nyɔŋmɔ.”

Yehowa Odasefoi feɔ nɔkwɛmɔnɔ kpakpa yɛ nibii krokomɛi amli hu. Wolo lɛ kɛfata he akɛ: “Kɛfata nikasemɔ kɛ sɔlemɔ he lɛ, amɛyeɔ amɛbuaa mɛi ni tɔɔ dãa kɛ mɛi ni kɛ tsofai fɔji tsuɔ nii, ni amɛhaa amɛleɔ gbɛ ni atsɔɔ nɔ afeɔ ekome kɛ gbɛ ni atsɔɔ nɔ ajieɔ suɔmɔ kpo atsɔɔ.” Te amɛfeɔ tɛŋŋ amɛtsuɔ enɛɛmɛi ahe nii? Odasefoi lɛ le akɛ Biblia kasemɔ kɛ ŋaawoo ni ekɛhaa lɛ ahe nitsumɔ yeɔ ebuaa mɔ ni eyeɔ ehe kɛjɛɔ nibii fɔji amli. No hewɔ ni amɛbɔɔ mɔdɛŋ koni amɛtsɔɔ mɛi krokomɛi nibii ni amɛkase kɛjɛ Biblia lɛ mli lɛ. Wolo lɛ mu naa akɛ, amɛnɔ lɛ ji “nɔkwɛmɔnɔ ko, ni ŋwanejee ko bɛ he akɛ, ehe miihia waa ni anyiɛ sɛɛ.”

Kpeei ni Yehowa Odasefoi lɛ feɔ lɛ yɛ kɛha mɔ fɛɛ mɔ, ni aheee shika yɛ mɔ ko mɔ ko dɛŋ. Akɛ miishɛɛ miifɔ̃ bo nine koni oya Maŋtsɛyeli Asa ni bɛŋkɛ bo lɛ mli.