Mligbɛ Hefɛo Hiɛ Naanɔ Sɛɛnamɔi

KRISTOFONYO ANƆKWAFO KO NI EGBƆ LƐ KƐƐ AKƐ: “OBLANYO KƐ HEFƐO TOƆ JEŊBA KPAKPA HE AKƐ NƆ KOME TOO.”

Hɛɛ, adesai kɛ be babaoo egbala jwɛŋmɔ ni fe nine kɛma kponɔgbɛ hefɛo nɔ, ni eha abu mligbɛ hefɛo he sɛɛnamɔi yɛ gbɛ ni ejaaa nɔ. Shi kɛlɛ, wɔ-Bɔlɔ lɛ kwɛɔ bɔ ni wɔji yɛ mligbɛ diɛŋtsɛ, ekɔɔɔ he eko bɔ ni wɔ kponɔgbɛ su ji. Yɛ nɛkɛ gbɛ nɔ lɛ, efee nɔkwɛmɔnɔ ni hi fe fɛɛ ni kɔɔ shishinumɔ ni sa he efɔ̃ shi. Taakɛ Biblia lɛ tsɔɔ lɛ, Nyɔŋmɔ diɛŋtsɛ kɛɛ akɛ: “Yehowa kwɛɛɛ nii tamɔ gbɔmɔ; ejaakɛ gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!”—1 Samuel 16:7.

Nyɔŋmɔ ji hefɛo ni adesai yɔɔ diɛŋtsɛ lɛ Jɛɛhe, ni e-Wiemɔ lɛ jieɔ lɛ kpo akɛ, kɛji eekwɛ mɔ ko salɛ nii lɛɛlɛŋ lɛ, mumɔŋ sui ji nɔ ni ebuɔ lɛ titri. Biblia lɛ kɛɔ akɛ: “Hiɛnyam lɛ lakamɔ ni, ni hefɛo hu lɛ yakayaka nɔ̃ ni; shi yoo ni sheɔ Yehowa gbeyei lɛ, aaakafo lɛ!” (Abɛi 31:30) Eji anɔkwale akɛ, kponɔgbɛ hefɛo baanyɛ atsĩmɔ mligbɛ nii ni yɔɔ taŋ lɛ nɔ. (Ester 1:10-12; Abɛi 11:22) Eyɛ mli akɛ gbɔmɔtsoŋ hefɛo baanyɛ atã yɛ be ko mli moŋ, shi mligbɛ hefɛo—tsui lɛ sui kpakpai—lɛ baanyɛ ada ni etsɛ.

No hewɔ lɛ, kwɛ nilee ni eji akɛ wɔɔná sui tamɔ suɔmɔ, miishɛɛ, toiŋjɔlɛ, tsuishitoo, mlihilɛ, ekpakpafeemɔ, hemɔkɛyeli, mlijɔlɛ, kɛ henɔyeli! (Galatabii 5:22, 23) Kɛkɛ lɛ, wɔbaanyɛ wɔná mligbɛ hefɛo ni he yɔɔ sɛɛnamɔ diɛŋtsɛ, ní sɛɛ tsɛɔ hu lɛ.—1 Petro 3:3, 4.