Bɔ ni Amɛfeɔ Amɛdamɔɔ Tipɛŋfoi Anɔnyɛɛ Naa

BƆ NI ashweɔ ní aná nɔkpɛlɛmɔ lɛ náa mɛi pii anɔ hewalɛ koni amɛkɛ amɛtipɛŋfoi akpã gbee yɛ amɛsusumɔi kɛ nifeemɔi amli. Oblahii kɛ oblayei titri ji mɛi ni hewalɛ he ehia amɛ koni amɛnyɛ amɛtsi amɛhe kɛjɛ nifeemɔi gbohii, tamɔ tsofai fɔji kɛ nitsumɔ kɛ bɔlɛnamɔ mli jeŋba shara ni akɛ he aaawo mli lɛ he. Te amɛ aaafee tɛŋŋ amɛdamɔ tipɛŋfoi anɔnyɛɛ naa?

Nyɛsɛɛ nɛɛ gbekɛbii yei enyɔ ni yeko afii nyɔŋmai enyɔ, ni yɔɔ Poland lɛ ŋma akɛ: “Anaa je lɛŋ mumɔ lɛ faŋŋ yɛ wɔtipɛŋfoi lɛ ateŋ mɛi pii ahe. Amɛjuɔ yɛ amɛ skul kaai amli, amɛkɛ yakayaka wiemɔ tsuɔ nii, ni amɛsumɔɔ hesaamɔi ni akpɛlɛɛɛ nɔ kɛ jeŋba shara lalai ni naa wa. Kwɛ bɔ ni wɔyɔɔ miishɛɛ akɛ wɔyɛ saji ni wieɔ wɔ ni ji gbekɛbii hii kɛ yei lɛ ahe ni ebuɔ wɔhe kɛjɛɔ hewalɛ ni mɛi ni yeko afii nyɔŋmai enyɔ ni mii shɛɛɛ amɛhe ní tseɔ atua lɛ náa yɛ wɔnɔ lɛ he!

“Anyɛŋ akɛ wiemɔi atsɔɔ bɔ ni wɔjieɔ shidaa kpo wɔtsɔɔ Buu-Mɔɔ mli saji ní ená hewalɛ yɛ wɔnɔ akɛ ákɛ oblahii kɛ oblayei lɛ wɔhe miihia ni hiɛ sɔɔ wɔ. Biblia mli ŋaawoo ni wɔnine eshɛ nɔ lɛ eye ebua wɔ koni wɔfamɔ wɔnaji jogbaŋŋ bɔni afee ni wɔya nɔ wɔsa Yehowa Nyɔŋmɔ hiɛ. Wɔheɔ wɔyeɔ akɛ anɔkwayeli mli ni aaajɛ asɔmɔ Yehowa lɛ ji shihilɛ gbɛ ni hi fe fɛɛ.”

Hɛɛ, oblahii kɛ oblayei baanyɛ adamɔ tipɛŋfoi anɔnyɛɛ naa. Kɛtsɔ amɛ “jwɛŋmɔŋ nyɛmɔi” ni amɛaatsɔse lɛ lɛ nɔ lɛ, Kristofoi oblahii kɛ oblayei kaseɔ bɔ ni afeɔ yiŋkpɛi ni nilee yɔɔ mli ni ejieee ‘je lɛ mumɔ lɛ’ kpo, shi moŋ ‘mumɔ ni jɛ Nyɔŋmɔ mli lɛ.’—Hebribii 5:14, NW; 1 Korintobii 2:12.