Maŋtsɛyeli Jajelɔi Bɔ Amaniɛ

Ayana Anɔkwale lɛ yɛ He ko ni Akpaaa Gbɛ

NYƆŊMƆ suɔmɔnaa nii ji ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:3, 4) Bɔni afee ni amɛshɛ nakai oti lɛ he lɛ, Yehowa Odasefoi ekala ni amɛja Biblia lɛ kɛ Biblia kasemɔ woji akpekpei abɔ. Nɛkɛ woji nɛɛ eye ebua mɛi ni hiɛ tsui kpakpa lɛ ni amɛbale anɔkwale lɛ yɛ gbɛ̀i ni akpaaa gbɛ kwraa nɔ, yɛ bei komɛi amli. Yɛ enɛ gbɛfaŋ lɛ, Maŋtsɛyeli jajelɔi ni yɔɔ Freetown yɛ Sierra Leone lɛ bɔ niiashikpamɔ ni nyiɛ sɛɛ nɛɛ he amaniɛ.

Osman ji binuu ni ji enyɔ yɛ weku ko ni gbekɛbii nɛɛhu yɔɔ mli lɛ mli. Akɛni eda yɛ shia ko ni asumɔɔ Nyɔŋmɔ jamɔ yɛ mli hewɔ lɛ, ekɛ etsɛ yaa ni amɛyajáa daa. Shi kɛlɛ, Osman hao waa diɛŋtsɛ yɛ bɔ ni ejamɔ lɛ tsɔɔ hɛl shishi lɛ he. Enyɛɛɛ enu nɔ hewɔ ni Nyɔŋmɔ ni yɔɔ musuŋtsɔlɛ lɛ baapiŋ efɔŋfeelɔi kɛtsɔ shã ni eeeshã amɛ yɛ la mli lɛ nɔ lɛ shishi. Saji amlitsɔɔmɔi fɛɛ ni akɛye abua Osman koni enyɛ enu hɛl la tsɔɔmɔ lɛ shishi lɛ nyɛɛɛ aha ená jwɛŋmɔŋ toiŋjɔlɛ.

Beni Osman ye afii 20 lɛ, ena wolo bluu ko ni jwɛi etsĩ nɔ fioo yɛ jwɛinii ko mli gbi ko. Akɛni esumɔɔ woji waa hewɔ lɛ, ekɔ ni etsumɔ he, ni ena yitso ni ji—Anɔkwale ni kɛ mɔ yaa Naanɔ Wala Mli Lɛ.a

Osman susu he akɛ: ‘Mɛni ji nɛkɛ anɔkwale nɛɛ?’ Osman miisumɔ akɛ ele babaoo, no hewɔ lɛ ekɛ wolo lɛ tee shia ni ekane fɛɛ amrɔ nɔŋŋ. Kwɛ miishɛɛ babaoo ni ená akɛ eeele akɛ Nyɔŋmɔ yɛ lɛ diɛŋtsɛ egbɛi—Yehowa! (Lala 83:19) Osman kase hu akɛ Nyɔŋmɔ su ni nɔ kwɔ fe fɛɛ ji suɔmɔ, ni susumɔ akɛ aaapiŋ gbɔmɛi yɛ he ko ni la tsoɔ yɛ lɛ po ji nihiinii kɛha Lɛ. (Yeremia 32:35; 1 Yohane 4:8) Yɛ naagbee mli lɛ, Osman kane akɛ etsɛŋ ni Yehowa kɛ shikpɔŋ nɔ paradeiso ni gbɔmɛi baanyɛ ahi shi kɛya naanɔ yɛ mli lɛ baaba. (Lala 37:29; Kpojiemɔ 21:3, 4) Mɛɛ anɔkwale ni yɔɔ naakpɛɛ ni jɛ Nyɔŋmɔ ni yɔɔ musuŋtsɔlɛ kɛ suɔmɔ ŋɔɔ po nɛ! Osman jɛ etsui mli eda Yehowa shi akɛ eha ena anɔkwale lɛ yɛ he ko ni akpaaa gbɛ kwraa.

Yɛ nanemɛi komɛi ayelikɛbuamɔ naa lɛ, gbii fioo komɛi asɛɛ lɛ, Osman na he ni Yehowa Odasefoi a-Maŋtsɛyeli Asa lɛ yɔɔ ni etee eklɛŋklɛŋ nikasemɔ. Beni eyɔɔ jɛmɛ lɛ, ebi Odasefonyo ko ni ekɛ lɛ akase Biblia lɛ. Yɛ shitee-kɛ-woo ni mli wa ni weku lɛ kɛba enɔ lɛ fɛɛ sɛɛ lɛ, Osman tee nɔ ená mumɔŋ nɔyaa ni abaptisi lɛ. (Mateo 10:36) Ŋmɛnɛ, eesɔmɔ akɛ onukpa yɛ asafo lɛ mli. Kwɛ bɔ ni eyɔɔ naakpɛɛ akɛ enɛ fɛɛ ba mli kɛtsɔ Biblia he wolo ni ayana yɛ jwɛi nii ko mli lɛ nɔ!

[Shishigbɛ niŋmaa]