“Ewaa Mi Kɛyaa Nui ni He Jɔ lɛ Ahe”

YƐ SHIKPƆJI ni aŋmala Biblia lɛ yɛ nɔ lɛ ni kɔɔyɔŋ tsakemɔ lɛ mli dɔɔ yɛ jɛmɛ lɛ, ehe miihia ni too gwantɛŋi anu nu daa gbi. No hewɔ lɛ, tookwɛlɔ nitsumɔ lɛ fã ko ni he hiaa lɛ ji ni eha etooku lɛ nu. Bei komɛi lɛ tookwɛlɔi kɛ nubu mli nu haa amɛtooku lɛ, ni amɛtsɔɔ nu lɛ amɛwoɔ kooloi anunumɔnii amli koni too gwantɛŋi lɛ anyɛ anu. (1 Mose 29:1-3) Shi kɛlɛ, yɛ nugbɔnɛmɔ beaŋ titri lɛ, hei ni bɔle faai bibii ni hoɔ kɛ faai wuji lɛ haa anáa “hejɔɔmɔhei ni yɔɔ nu babaoo” ni jɛmɛ jɔɔ.—Lala 23:2, NW.

Esa akɛ tookwɛlɔ kpakpa ale he ni ebaaná nu kɛ kooloi aniyelihe kpakpa hu yɛ eha etooku lɛ. He ko kpakpa ni eeele bɔ ni jɛmɛ shihilɛ ji jogbaŋŋ lɛ haa etoo gwantɛŋi lɛ náa yibaamɔ. David ni kɛ afii babaoo lɛ̀ too gwantɛŋi yɛ Yudea gɔji lɛ anɔ lɛ kɛ Nyɔŋmɔ mumɔŋ gbɛtsɔɔmɔ lɛ to tookwɛlɔ ni kɛ etoo gwantɛŋi lɛ yaa kooloi aniyelihei kpakpai lɛ nɔ̃ kɛ agbɛnɛ nu ni haa mɔ wala lɛ he. David kɛɛ akɛ: “Ewaa mi kɛyaa nui ni he jɔ lɛ ahe.”—Lala 23:1-3.

Afii komɛi asɛɛ lɛ, Yehowa kɛ niiamlitsɔɔmɔ ko ni tamɔ nakai tsu nii kɛtsɔ egbalɔ Ezekiel nɔ. Ewo shi akɛ ebaabua ewebii anaa kɛjɛ shikpɔji ni agbɛ amɛ ashwã nɔ lɛ anɔ, tamɔ bɔ ni tookwɛlɔ buaa etoo gwantɛŋi anaa lɛ. Ema nɔ mi eha amɛ akɛ: “Makpala amɛ . . . [kɛba] amɛ diɛŋtsɛ amɛshikpɔŋ lɛ nɔ, ni malɛ̀ amɛ yɛ Israel gɔji lɛ anɔ, yɛ jɔɔi lɛ amli.”—Ezekiel 34:13.

Yehowa Nyɔŋmɔ susuɔ mumɔŋ nu ni ekɛaaha lɛ he hu waa diɛŋtsɛ. Kpojiemɔ wolo lɛ wie “wala nu faa” ni hoɔ kɛjɛɔ Nyɔŋmɔ maŋtsɛsɛi lɛ he lɛ he. (Kpojiemɔ 22:1) Ninefɔ̃ɔ ni akɛhaa koni abanu faa nɛɛ mli nu lɛ yashɛɔ gbɔmɛi fɛɛ aŋɔɔ. “Mɔ ni sumɔɔ lɛ, . . . [baanyɛ] ebayɛ wala nu lɛ yaka.”—Kpojiemɔ 22:17.

Nɛkɛ okadifeemɔŋ wala nu nɛɛ damɔ shi kɛha gbɛjianɔi ni Nyɔŋmɔ toɔ kɛhaa naanɔ wala lɛ. Mɔ fɛɛ mɔ baanyɛ abɔi nu ni tamɔ nɛkɛ lɛ numɔ kɛtsɔ ‘anɔkwa Nyɔŋmɔ kome lɛ, kɛ Yesu Kristo, mɔ ni etsu lɛ lɛ he nilee namɔ’ nɔ.—Yohane 17:3.