“Nyɛtsia Nyɛbɛŋkɛa Nyɔŋmɔ, ni Eeetsi Eeebɛŋkɛ Nyɛ”

Be ni Tsɔ Hiɛ kɛ No Sɛɛ—Shihilɛ Be Fɔŋ ni Eho, Wɔsɛɛ Be Kpakpa

“NYƆŊMƆ wiemɔ hiɛ kã ni eyɛ hewalɛ ni enaa ba fe klante kɛ enaa ŋta fɛɛ . . . ni eji tsuiiaŋ susumɔi kɛ jwɛŋmɔi lɛ akojolɔ.” (Hebribii 4:12) Nakai ji bɔ ni bɔfo Paulo wie yɛ hewalɛ ni yaa shɔŋŋ ni Nyɔŋmɔ shɛɛ sane lɛ yɔɔ lɛ he. Hewalɛ ni eyɔɔ ni ekɛshɛɔ tsui lɛ he lɛ je kpo faŋŋ, titri lɛ yɛ klɛŋklɛŋ afii 100 Ŋ.B. Yɛ hewalɛ fɔŋ ni anáa yɛ mɛi anɔ yɛ nakai be lɛ mli lɛ fɛɛ sɛɛ lɛ, mɛi ni batsɔmɔ Kristofoi lɛ wo gbɔmɔ hee lɛ.—Romabii 1:28, 29; Kolosebii 3:8-10.

Hewalɛ ni Nyɔŋmɔ wiemɔ lɛ yɔɔ ni ekɛtsakeɔ mɔ, taakɛ aŋma afɔ shi yɛ Biblia lɛ mli lɛ jeɔ kpo faŋŋ ŋmɛnɛ hu. Ákɛ nɔkwɛmɔnɔ lɛ, susumɔ nuu ko ni nɔ kwɔ ni yɔɔ hewalɛ ni atsɛɔ lɛ Richard lɛ sane lɛ he okwɛ. Akɛni Richard ji mɔ ko ni mli fuɔ oyayaayai hewɔ lɛ, enɔɔ yɛ emli ni aaafu fioo kɛkɛ lɛ hewɔ. Yiwalɛ nifeemɔi fite eshihilɛ waa. Richard kɛ ehe bɔ atswɛrɛnɔmɔ kuu ko po he. Ekɛ hiɛmiamɔ kase atswɛrɛnɔmɔ ni ebatsɔ atswɛrɛnɔmɔ kuu ni amɛmli tsii fe fɛɛ lɛ mli mɔ ni he wa fe fɛɛ yɛ Westphalia, Germany. Richard nuɔ dãa babaoo hu, ni bei pii lɛ ekɛ ehe woɔ béi ni naa wa mli. Agbe mɔ ko yɛ shihilɛ ni tamɔ nɛkɛ mli, ni shwɛ fioo ni awo Richard tsuŋ.

Ni Richard gbalashihilɛ lɛ hu? Richard gba akɛ: “Dani mi kɛ Heike baabɔi Biblia lɛ kasemɔ lɛ, no mli lɛ wɔteŋ mɔ fɛɛ mɔ feɔ nɔ ni esumɔɔ. Heike yeɔ bei babaoo yɛ enanemɛi yei lɛ aŋɔɔ, yɛ be mli ni mi hu mikɛ bei babaoo woɔ mihiɛtserɛjiemɔi amli—titri lɛ atswɛrɛnɔmɔ, tso kɛ ŋshɔ wumɔ, kɛ mele mumɔ.”

Beni Yehowa Odasefoi kɛ Richard kɛ Heike bɔi Biblia lɛ kasemɔ lɛ, Richard hiɛ fee lɛ yaa beni ená ele akɛ esa akɛ efee tsakemɔi ni etamɔ nɔ ni anyɛŋ afee, bɔni afee ni eshihilɛ kɛ shishitoo tɛi ni nɔ kwɔlɔ ni afolɔ ashwie yɛ Nyɔŋmɔ Wiemɔ lɛ mli lɛ akpa gbee lɛ. Shi kɛlɛ, beni Richard bale Yehowa Nyɔŋmɔ jogbaŋŋ lɛ, ená shwelɛ ni mli wa akɛ eeesa ehiɛ. Richard yɔse akɛ Nyɔŋmɔ ekpɛlɛɛɛ mɛi ni sumɔɔ awuiyeli nifeemɔi aloo mɛi ni kɛtsuɔ nii kɛjieɔ mɛi ahiɛtserɛ lɛ anɔ. Richard kase akɛ: “Mɔ fɛɛ mɔ ni sumɔɔ yiwalɛ lɛ, [Yehowa] susuma nyɛɔ lɛ.”—Lala 11:5, NW.

Kɛfata he lɛ, naanɔ wala shihilɛ yɛ paradeiso shikpɔŋ nɔ he hiɛnɔkamɔ lɛ ha Richard kɛ Heike fɛɛ mii shɛ amɛhe waa. Amɛmiisumɔ ni amɛ fɛɛ amɛhi jɛmɛ! (Yesaia 65:21-23) Ninefɔɔ akɛ “nyɛtsia nyɛbɛŋkɛa Nyɔŋmɔ ni eeetsi eeebɛŋkɛ nyɛ” lɛ ta Richard tsui mli waa diɛŋtsɛ. (Yakobo 4:8) Ena sɛɛnamɔ ni yɔɔ toiboo ni aaafee aha ŋaawoo ni jɛ mumɔŋ nɛɛ he lɛ akɛ: “Ohiɛ akakɔ̃ yiwalɔ ko nɔ, ni kaakɔ egbɛ̀i lɛ amli eko eko. Ejaakɛ Yehowa miihi kutumpɔfo; shi mɛi ni ja ekɛbɔɔ.”—Abɛi 3:31, 32.

Yɛ shwelɛ ni mli wa ni Richard yɔɔ akɛ ebaatsake egbɛ̀i lɛ fɛɛ sɛɛ lɛ, eyɔse akɛ enyɛŋ efee nakai yɛ lɛ diɛŋtsɛ ehewalɛ naa. Ebayɔse bɔ ni ehe hiaa ni etao Nyɔŋmɔ dɛŋ yelikɛbuamɔ yɛ sɔlemɔ mli. No hewɔ lɛ, efee enii yɛ Yesu wiemɔi ni ekɛha E-bɔfoi lɛ kɛ gbeekpamɔ naa akɛ: ‘Nyɛsɔlea be fɛɛ be, koni nyɛkabote kaa mli, mumɔ lɛ miikpɛlɛ moŋ, shi heloo lɛ egbede.’—Mateo 26:41.

Beni Richard ekase bɔ ni Nyɔŋmɔ buɔ yiwalɛ nifeemɔ kɛ mlifu ni naa wa ehaa lɛ sɛɛ lɛ, eyiŋ bafee lɛ faŋŋ akɛ atswɛrɛnɔmɔ ji shwɛmɔ ko ni esaaa. Kɛtsɔ Yehowa dɛŋ yelikɛbuamɔ kɛ hewalɛwoo ni jɛ mɛi ni kɛ Richard kase Biblia lɛ adɛŋ lɛ nɔ lɛ, etsi ehe kwraa kɛjɛ yiwalɛ nifeemɔi ahe. Ekpa atswɛrɛnɔmɔ kɛ béi ni naa wa lɛ, ni ekpɛ eyiŋ akɛ ebaaha eweku lɛ shihilɛ aya hiɛ. Richard, ni amrɔ nɛɛ eji nɔkwɛlɔ ko ni he jɔ ni yɔɔ Yehowa Odasefoi asafoi lɛ ateŋ ekome mli lɛ kɛɛ akɛ: “Anɔkwale lɛ ni mikase kɛjɛ Biblia lɛ mli lɛ eye ebua mi koni maŋmɛ mitsui shi, koni masusu nii ahe dani mifee he nɔ ko.” Ekɛfata he akɛ: “Amrɔ nɛɛ, shishitoo mla ni kɔɔ suɔmɔ kɛ bulɛ he lɛ kudɔɔ mi yɛ wekukpaa ni kã mi kɛ miŋa kɛ mibii lɛ ateŋ lɛ mli. Nɔ ni ejɛ mli kɛba ji akɛ, wɔweku lɛ efee ekome.”

Bei komɛi lɛ mɛi ni ehiɛɛɛ jwɛŋmɔ ni ja yɛ Yehowa Odasefoi ahe lɛ buɔ amɛ fɔ akɛ mɛi komɛi ni fiteɔ wekui. Shi kɛlɛ, aŋkroaŋkroi anɔkwɛmɔnɔ taakɛ Richard nɔ̃ lɛ ji lɛ haa amɛwiemɔi lɛ feɔ amale. Yɛ anɔkwale mli lɛ, Biblia mli anɔkwale lɛ baanyɛ aha toiŋjɔlɛ ahi shĩa lɛ mli ni ekɛ wɔsɛɛ be kpakpa baaha mɛi ni ehi shihilɛ fɔŋ mli tsutsu ko lɛ.—Yeremia 29:11.

[Wiemɔ ni akɔ ni akɛmiitsu nii ni yɔɔ baafa 9]

“Paradeiso shikpɔŋ he hiɛnɔkamɔ lɛ kanya mi koni matsake”

[Akrabatsa ni yɔɔ baafa 9]

Biblia Mli Shishitoo Mlai Miitsu Nii

Biblia lɛ baanyɛ aná hewalɛ ni naa wa yɛ gbɔmɛi awala shihilɛi anɔ. Naa Ŋmalɛ mli shishitoo mlai ni eye ebua aŋkroaŋkroi ni fee yiwalɛ nii ni amɛtsake lɛ ekomɛi:

“Mɔ ni mli fuuu mra lɛ ehi fe ekãalɔ, ni mɔ ni yeɔ emumɔ nɔ lɛ ehi fe mɔ ni wuɔ heɔ maŋ.” (Abɛi 16:32) Mlifu ni anyɛɛɛ nɔ aye lɛ ji shigbeemɔ he okadi, shi jeee hewalɛ he okadi.

“Gbɔmɔ ni yɔɔ jwɛŋmɔ lɛ, emli fũuu mra.” (Abɛi 19:11) Sɛɛyoomɔ kɛ niiashishinumɔ ni aaaná yɛ shihilɛ ko he lɛ yeɔ ebuaa mɔ ni ekwɛɔ nii kɛyaa shɔŋŋ fe hiɛaŋhiɛaŋ yiŋtoi ni kɛ sane naataamɔ lɛ ba lɛ, ni enyɛɔ etsĩɔ mlifu naa.

‘Okɛ mlilatsɛ akabɔ naanyo koni okakase egbɛ̀i lɛ.’ (Abɛi 22:24, 25) Kristofoi jɛɔ nilee mli amɛkpooɔ mɛi ni mli woɔ la ni amɛkɛ amɛ aaabɔ lɛ.