Yelikɛbuamɔ Diɛŋtsɛ Kɛha Ohiafoi Lɛ

BENI Yesu Kristo, ni ji Nyɔŋmɔ Bi lɛ yɔɔ shikpɔŋ lɛ nɔ lɛ, ejie anɔkwa mɔ he susumɔ kpo etsɔɔ yɛ ohiafoi ni eye ebua amɛ lɛ mli. Mɔ ko ni kɛ ehiŋmɛii na Yesu sɔɔmɔ nitsumɔ lɛ kɛɛ yɛ he akɛ: “Shwilafoi miina nii, ni obubuafoi miinyiɛ; kpitiyelɔi ahe miitse, ni toimulɔi miinu nii; gbohii miite shi, ni ohiafoi lɛ, aajaje sanekpakpa aatsɔɔ amɛ.” (Mateo 11:5) Shi, ohiafoi akpekpei abɔ ni yɔɔ ŋmɛnɛ lɛ hu? Ani sanekpakpa ko yɛ kɛha amɛ? Hɛɛ, hiɛnɔkamɔ he shɛɛ sane ko yɛ!

Eyɛ mli akɛ bei pii lɛ, akuɔ hiɛ ashwieɔ ohiafoi anɔ ni hiɛ kpaa amɛnɔ yɛ je lɛŋ moŋ, shi Nyɔŋmɔ Wiemɔ, ni ji Biblia lɛ woɔ shi akɛ: “Ohiafo lɛ, jeee daa hiɛ aaakpa enɔ, ni nɔnalɔi ahiɛnɔkamɔ lɛ elaajeŋ kɛyaŋ naanɔ.” (Lala 9:19) Wiemɔi ni shɛjeɔ mɔ mii nɛɛ baaná amɛmlibaa beni Nyɔŋmɔ Maŋtsɛyeli, ni ji ŋwɛi nɔyeli diɛŋtsɛ lɛ ebaye adesai anɔyeli fɛɛ najiaŋ lɛ. (Daniel 2:44) Ákɛ nakai ŋwɛi nɔyeli lɛ nɔ Maŋtsɛ lɛ, Yesu ‘baana ohiafo kɛ mɔ ni efĩ lɛ lɛ mɔbɔ, ni ebaahere mɛi ni efĩ amɛ lɛ asusumai ayiwala. Eeekpɔ̃ amɛsusuma kɛaajɛ fĩfĩamɔ kɛ yiwalɛ mli, ni amɛlá jara aaawa yɛ ehiɛ.’—Lala 72:13, 14.

Te shihilɛ lɛ baatamɔ eha tɛŋŋ beni Kristo yeɔ shikpɔŋ lɛ nɔ lɛ? Mɛi ni yɔɔ Kristo jeŋ nɔyeli lɛ shishi lɛ baaná amɛninenaa nitsumɔi lɛ ahe sɛɛ. Biblia lɛ kɛɔ yɛ Mika 4:3, 4 akɛ: “Mɔ fɛɛ mɔ aaatá eweintso kɛ egbamitso shishi, ni mɔ ko woŋ amɛhe gbeyei; ejaakɛ Yehowa Zebaot naabu wie.” Nyɔŋmɔ Maŋtsɛyeli lɛ baatsu hela kɛ gbele he naagbai lɛ po he nii. (Yesaia 25:8) Mɛɛ jeŋ ni etsake po enɛ aaaji nɛkɛ! Wɔbaanyɛ wɔhe Biblia mli shiwoi nɛɛ wɔye ejaakɛ Nyɔŋmɔ diɛŋtsɛ jɛ mumɔŋ ewie.

Kɛfata hiɛnɔkamɔ he shɛɛ sane ni Biblia lɛ kɛhaa lɛ he lɛ, eyeɔ ebuaa wɔ hu koni wɔkpee daa gbi shihilɛ mli naagbai tamɔ bɔ ni wɔɔfee ni wɔye bulɛ ni anáaa kɛha wɔ lɛ nɔ yɛ ekolɛ ohia ni wɔyeɔ hewɔ lɛ naa. Kristofonyo ni ehia lɛ lɛ le kɛjɛ e-Biblia lɛ kasemɔ mli akɛ, ejara wa waa yɛ Nyɔŋmɔ hiɛ taakɛ bɔ ni Kristofonyo ni yɔɔ nii lɛ ji lɛ nɔŋŋ. Biblia mli wolo ni ji Hiob lɛ wie akɛ Nyɔŋmɔ “ebuuu niiatsɛ fe ohiafo; ejaakɛ eninenaa nitsumɔ ji amɛ fɛɛ kwa.” (Hiob 34:19) Nyɔŋmɔ sumɔɔ amɛ fɛɛ pɛpɛɛpɛ.—Bɔfoi lɛ Asaji 10:34, 35.