Gbɛ ni Atsɔɔ Nɔ Anáa Wala Sɛɛkɛlɛ ni Miishɛɛ Yɔɔ Mli
“MƆ FƐƐ MƆ miisumɔ ni etsɛ yɛ jeŋ; shi mɔ ko mɔ ko sumɔɔɔ ni egbɔ.” Nakai ji bɔ ni afɔɔ kɛɛmɔ. Mɛi babaoo ni miibɛŋkɛ afi ni akɛbaa nitsumɔ mli hejɔɔmɔ lɛ ahiɛ kã nɔ akɛ amɛbaaná be babaoo amɛha amɛ diɛŋtsɛ amɛhe ni gbɛnaanii fioo ko pɛ baaka amɛnɔ. Kɛlɛ, amɛsheɔ gbeyei akɛ amɛbaatsɔmɔ mɛi ni bɛ yiŋtoo ko yɛ shihilɛ mli kɛ mɛi ni he bɛ sɛɛnamɔ. Amɛsheɔ shoofeemɔ, miishɛɛ ni anáaa, kɛ gbɔmɔtsoŋ hewalɛnamɔ ni baa shi lɛ hu gbeyei.
Belɛ, mɛni ji nɔ̃ diɛŋtsɛ ni kɛ shihilɛ ni yɔɔ miishɛɛ baa? Nanemɛi kpakpai kɛ weku ni suɔmɔ yɔɔ mli baanyɛ aha gbekɛbii kɛ onukpai fɛɛ aná miishɛɛ. Shi yelikɛbuamɔ ni mɛi krokomɛi baanyɛ amɛkɛha yɛ onukpa ko shihilɛ mli lɛ pɛ kɛkɛ faaa. Nɔ ni mɔ aŋkro ni eda lɛ baanyɛ atsu ni ekɛye ebua mɛi krokomɛi lɛ ji nɔ ni he hiaa fe fɛɛ.
Niiamlipɛimɔ ko ni he be kpalaŋŋ ni afee yɛ gbalashihilɛ mli hefatalɔi 423 ni edara lɛ ahe lɛ jie lɛ kpo akɛ, “yelikɛbuamɔ ni wɔkɛaaha mɛi krokomɛi lɛ baanyɛ aye abua ni eha wɔ diɛŋtsɛ lɛ wɔwala shihilɛ aya hiɛ.” Stephanie Brown, ni fee niiamlipɛimɔ lɛ tsɔɔ mli akɛ: “Nibii ni je kpo nɛɛ tsɔɔ akɛ, jeee nibii ni wɔnáa kɛjɛɔ wekukpaai amli lɛ haa wɔkɛ mɛi krokomɛi asharamɔ bafeɔ nɔ ni sɛɛnamɔ yɔɔ he; shi nɔ ni wɔkɛhaa lɛ haa sɛɛnamɔ baa he.” Nɔhamɔ ni tamɔ nɛkɛ lɛ baanyɛ afee mɛi krokomɛi ayelikɛbuamɔ yɛ shia nifeemɔ mli, gbekɛbii akwɛmɔ, nitsumɔi bibii ahe nii ni wɔɔtsu wɔha amɛ, mɛi krokomɛi ni wɔkɛ wɔ kar aaahole amɛ, loo ni wɔɔbo mɔ ko ni miitao agba sane lɛ toi.
Aaafee afii 2,000 ni eho nɛ lɛ, Yesu Kristo kɛɛ akɛ: “Nɔ hamɔ mli yɛ jɔɔmɔ fe hemɔ.” (Bɔfoi lɛ Asaji 20:35) Gbɛ ni atsɔɔ nɔ anáa wala sɛɛkɛlɛ ni miishɛɛ yɔɔ mli lɛ damɔɔɔ shika wulu ko ni ayɔɔ yɛ shikatoohe loo tsofafeemɔi kɛ niyenii ni baa gbɔlɛ shi lɛ anɔ. Yɛ no najiaŋ lɛ, edamɔ he ni aaakanya kɛ mɔ diɛŋtsɛ be, ehewalɛ, kɛ enyɛmɔ ni ekɛaaye ebua ni ekɛha mɛi krokomɛi ashihilɛ aya hiɛ lɛ nɔ.
Kɛlɛ, ebaabi babaoo fe nɔhamɔ kɛkɛ bɔni afee ni wɔye wɔhe kɛjɛ gbɔlɛ, hela, kɛ gbele he. Nyɔŋmɔ Maŋtsɛyeli lɛ pɛ baajie nibii ni tamɔ nɛkɛ lɛ kɛya. Yɛ enɔyeli shishi lɛ, hela sɛɛ baafo ni ‘gbele po ehiŋ shi dɔŋŋ.’ (Kpojiemɔ 21:3, 4; Yesaia 33:24) Yɛ anɔkwale mli lɛ, adesai ni feɔ toiboo lɛ baahi shi kɛya naanɔ yɛ miishɛɛ mli yɛ shikpɔŋ nɔ paradeiso ko mli. (Luka 23:43) Yehowa Odasefoi yɛ he miishɛɛ akɛ amɛaaha mɛi krokomɛi ale nɛkɛ gbɛ ni atsɔɔ nɔ anáa wala sɛɛkɛlɛ ni miishɛɛ yɔɔ mli ni Biblia lɛ kɛhaa lɛ.