Namɔ Baalɛ̀ Adesai Aweku lɛ?

TAAKƐ World Food Programme, (Jeŋ Niyenii Ahe Gbɛjianɔtoo) ni ji Jeŋmaji Ekomefeemɔ lɛ gbɛjianɔtoo ni wuɔ eshiɔ hɔmɔ lɛ akɔntaabuu tsɔɔ lɛ, hɔmɔ miiye gbɔmɛi akpekpei 800—ni amɛteŋ mɛi babaoo ji gbekɛbii. Nyɛsɛɛ nɛɛ, nakai gbɛjianɔtoo lɛ tsɔɔ mli akɛ, naagbai krokomɛi tamɔ awuiyeli ni akɛtutuaa mɔ lɛ haaa ni maji babaoo ni ená nɔyaa lɛ kɛ niyenii kɛ kwɛmɔ ni sa ni abaanyɛ amɛkɛye amɛbua kɛtsu shihilɛ nɛɛ he nii lɛ aha. Tsɛŋemɔ helai ni egbɛ eshwã lɛ ebawo naagba lɛ mli wu. Amaniɛbɔɔ ko ni gbɛjianɔtoo nɛɛ kɛha yɛ Global School Feeding Report lɛ mli lɛ wie Afrika maji ni AIDS hela lɛ egbɛ eshwã waa yɛ mli lɛ ahe akɛ: “Yinɔbii komɛi ni ji fɔlɔi ashishi miibule. Bei pii lɛ ashiɔ bii ni amɛshiɔ yɛ amɛsɛɛ lɛ koni amɛ diɛŋtsɛ amɛkwɛ amɛhe, ni amɛteŋ mɛi babaoo bɛ okwaayeli kɛ daa gbi shihilɛ ahe nilee ní bei pii lɛ yinɔ kome shiɔ ehaa yinɔ kroko lɛ eko.”

World Food Programme nitsumɔ lɛ miiwo nifeemɔ ko he hewalɛ, ni oti ni ma amɛhiɛ ji koni kɛ́ hooo lɛ, amɛha skulbii aniyenii shikome daa gbi. Oti ni ma amɛhiɛ lɛ jeee ní amɛkɛba hɔmɔ shi kɛkɛ, shi moŋ koni amɛtsɔ tsɔsemɔ ni akɛhaa yɛ skul lɛ nɔ amɛkɛje gbɛjianɔi krokomɛi ni amɛto koni akɛtsĩ HIV kɛ AIDS ni mɔmɔɔ oblahii kɛ oblayei lɛ naa.

Yɛ hei ni aatsu gbɛjianɔtoo nɛɛ he nii yɛ lɛ, ahaa gbekɛbii lɛ niyenii, atsɔɔ amɛ gbɔmɔtsoŋ falefalefeemɔ, ni ayeɔ abuaa amɛ yɛ gbɛ̀i krokomɛi anɔ hu. Ayɔse hu akɛ yɛ hei ni gbɔmɛi lɛ feɔ tsakemɔi yɛ amɛjeŋba mli yɛ lɛ, HIV kɛ AIDS hela lɛ gbɛɛ kɛ shwãmɔ baa shi.

Awerɛho sane ji akɛ, bei pii lɛ adesai amɔdɛŋbɔi lɛ nyɛɛɛ atsu naagbai lɛ ahe nii kwraa kɛmɔ shi. Shi Biblia lɛ kɛ hɔmɔ he naagba ní abaajie kwraa kɛya lɛ he shiwoo ni shɛjeɔ mɔ mii haa. Lala 72:16 kɛɔ akɛ: “Shikpɔŋ lɛ nɔ aaaba abele babaoo.” Yɛ Nyɔŋmɔ Maŋtsɛyeli lɛ mli lɛ, mɛi baanyɛ awie yɛ Yehowa Nyɔŋmɔ he akɛ: “Obasaraa shikpɔŋ lɛ ni . . . ohaa ebaa nii babaoo. Ni kɛ́ osaa shikpɔŋ lɛ nakai lɛ, ohaa amɛ abele.”—Lala 65:10.

[He ni Mfoniri ni yɔɔ baafa 32 lɛ Jɛ]

WFP/Y. Yuge