Afrikanyo Heshibalɔ ko ní Sumɔɔ Nyɔŋmɔ Wiemɔ Lɛ

BEI pii lɛ gbɔi ni yasaraa Afrika lɛ anaa kpɛɔ amɛhe yɛ bɔ ni ewaaa ákɛ akɛ gbɔmɛi ni yɔɔ jɛmɛ lɛ aaaje Biblia mli sanegbaai ashishi lɛ hewɔ. Ewaaa akɛ sanebimɔi tamɔ, “Mɛni ji Nyɔŋmɔ Maŋtsɛyeli lɛ?” loo “Ani tsabaa diɛŋtsɛ yɛ kɛha naagbai tamɔ hɔmɔ, hela, ta, kɛ awuiyeli?” aha mɛi abo sane lɛ toi. Mɛi babaoo kɛ miishɛɛ ŋmɛɔ gbɔi agbɛ koni amɛjɛ Biblia lɛ mli amɛha amɛ hetoo. Bei pii lɛ enɛ haa ajeɔ daa Biblia mli nikasemɔ shishi. Ni kɛ́ nikaselɔi lɛ tee amɛhiɛ yɛ mumɔŋ lɛ, amɛbatsɔmɔɔ Kristofoi ni abaptisi amɛ.

Atsĩ Afrikabii lɛ ateŋ mɔ klɛŋklɛŋ ni fee enii yɛ gbɛ ni tamɔ nɛkɛ nɔ lɛ tã yɛ Biblia lɛ mli, yɛ Bɔfoi lɛ Asaji 8:26-40 lɛ. Eji Etiopianyo ní fã gbɛ kɛtee Yerusalem koni eyajá Yehowa, ni ji anɔkwa Nyɔŋmɔ lɛ.

Taakɛ atsɔɔ yɛ mfoniri ni yɔɔ shishigbɛ lɛ mli lɛ, Etiopianyo lɛ ta eshwiili mli kɛmiiku esɛɛ kɛmiiya shia, ni eekane wolokpo ko. Gbɔ ko ba eŋɔɔ ni ebabi lɛ akɛ: “Ani oonu nɔ ni okaneɔ lɛ shishi lo?” Etiopianyo lɛ kɛ heshibaa kpɛlɛ nɔ akɛ yelikɛbuamɔ he miihia lɛ, ni ekpá gbɔ lɛ, ni ji Kristofonyo sanekpakpa jajelɔ Filipo fai koni ebata eshwiili lɛ mli. No sɛɛ lɛ ebi koni Filipo atsɔɔ lɛ Ŋmalɛ ni ekane lɛ shishi. Filipo tsɔɔ mli akɛ eji gbalɛ ko ni kɔɔ Yesu Kristo, ni ji Mesia lɛ gbele ni ba etsɛko lɛ he. Filipo gba lɛ saji krokomɛi ni kɔɔ “Yesu he sanekpakpa lɛ,” ni ŋwanejee ko kwraa bɛ he akɛ Yesu shitee lɛ fata he lɛ he.

Akɛni Etiopianyo lɛ nu anɔkwalei ni yɔɔ miishɛɛ nɛɛ, ní eesumɔ ni ebatsɔ Yesu kaselɔ hewɔ lɛ, ebi akɛ: “Mɛni tsĩɔ mibaptisimɔ gbɛ?” Beni abaptisi Afrikanyo ni yɔɔ heshibaa nɛɛ sɛɛ lɛ, ekɛ miishɛɛ ku esɛɛ kɛtee shia, ni Biblia lɛ ewieee ehe sane dɔŋŋ.

Ŋmɛnɛ, Yehowa Odasefoi miiye kɛmiibua gbɔmɛi akpekpei abɔ yɛ jeŋ fɛɛ koni amɛkase “sanekpakpa” nɛɛ nɔŋŋ he nii. Amrɔ nɛɛ aafee shia Biblia mli nikasemɔi aaafee akpekpei ekpaa ní aheee nɔ ko.