Nibii ni Wɔbaanyɛ Wɔfee Kɛkudɔ Wɔhenumɔi

ANI henumɔi gbohii náa onɔ hewalɛ yɛ bei komɛi amli? Ani oji mɔ ko ni etsɛɛɛ ni sane dɔɔ lɛ, ní mli fuɔ oyayaayai loo etsɛɛɛ ni enijiaŋ jeɔ wui? Ani shihilɛ mli yeyeeyefeemɔi náa onɔ hewalɛ ní oleee nɔ ni obaafee? Mɛni baaye abua bo ni onyɛ odamɔ shihilɛi nɛɛ fɛɛ anaa?

Henumɔ ni gbaa mɔ naa fata naagbai ni haoɔ adesai lɛ ahe. Kɛ́ anyɛ akudɔ henumɔi jogbaŋŋ lɛ, ehaa shihilɛ feɔ nɔ ni yɔɔ miishɛɛ. Shi, Biblia lɛ kɛɔ akɛ, “weiyeli hãa nilelɔ yeɔ sɛkɛ.” (Jajelɔ 7:7) Namɔ baanyɛ akɛɛ akɛ awuiyeli kɛ osharai ni fa babaoo ni yaa nɔ yɛ je lɛ mli lɛ eko esaaa ehe? Shi kɛlɛ, Ŋmalɛi lɛ kɛɔ hu akɛ: “Nɔ̃ kpakpa ko bɛ fe nɔ ni gbɔmɔ mii aaashɛ ehe yɛ enitsumɔi amli.” (Jajelɔ 3:22) Belɛ, kɛ́ wɔshihilɛ aaafee nɔ ni yɔɔ miishɛɛ babaoo lɛ, no lɛ ehe miihia koni wɔjɛ henumɔ kpakpa mli wɔfee nii. Te wɔɔfee tɛŋŋ wɔná henumɔi kpakpai, ni asaŋ wɔkudɔ henumɔi gbohii lɛ?

Bei pii lɛ, kɛ́ wɔbɔ mɔdɛŋ ákɛ wɔtsu naagba lɛ he nii diɛŋtsɛ lɛ, no baa wɔhenumɔi gbohii ni wɔyɔɔ lɛ ashi. Ákɛ nɔkwɛmɔnɔ lɛ, kɛ́ wɔhao yɛ saji komɛi ni wɔnyɛɛɛ he nii wɔtsu lɛ ahe lɛ, ani efeŋ nɔ ni hi jogbaŋŋ akɛ wɔɔtsake wɔdaa gbi nifeemɔi amli loo wɔtsake wɔshihilɛ mli moŋ fe nɔ ni wɔɔha sane lɛ agba wɔnaa? Ekolɛ, shisharamɔ fioo, lala ko ni ŋɔɔ toi ni wɔɔbo, wɔhe ni wɔkɛaawo kpɔiaŋgbɔlemɔ ko mli loo ní wɔɔfee mɔ ko ni ehia lɛ lɛ ejurɔ lɛ baaha wɔhe ajɔ wɔ bɔ ni sa, ni wɔná miishɛɛ hu.—Bɔfoi lɛ Asaji 20:35.

Shi kɛlɛ, hekɛnɔfɔɔ ní wɔɔná yɛ wɔ-Bɔlɔ lɛ mli lɛ ji gbɛ ni hi fe fɛɛ ni wɔɔtsɔ nɔ wɔye susumɔi gbohii anɔ kunim. Kɛji susumɔi gbohii tee nɔ ehao wɔ lɛ, no lɛ ebaabi ni wɔtsɔ sɔlemɔ nɔ ‘wɔshɛ wɔjatsu lɛ wɔfɔ̃ Nyɔŋmɔ nɔ.’ (1 Petro 5:6, 7) Biblia lɛ maa nɔ mi kɛhaa wɔ akɛ: “Yehowa bɛŋkɛɔ mɛi ni tsuii ekumɔ lɛ . . . Jalɔ amanehului faa babaoo, shi Yehowa jieɔ lɛ kɛjɛɔ fɛɛ mli.” (Lala 34:19, 20) Te wɔɔfee tɛŋŋ wɔná nɔmimaa akɛ Nyɔŋmɔ baafee ‘wɔ-Yelikɛbualɔ kɛ wɔ-Jielɔ’? (Lala 40:18) Wɔbaanyɛ wɔfee enɛ kɛtsɔ Biblia lɛ ni wɔɔkase, ni wɔjwɛŋ nɔkwɛmɔnii ni yɔɔ mli ni tsɔɔ bɔ ni Nyɔŋmɔ yɔɔ etsuji ahilɛ-kɛhamɔ he miishɛɛ diɛŋtsɛ lɛ anɔ lɛ nɔ.