Ani Oosumɔ ni Oná Nanemɛi Kpakpai?

MƐI babaoo sumɔɔ ni amɛná nanemɛi kpakpai. Niiashikpamɔi ni oyɔɔ ni okɛ nanemɛi ni bɛŋkɛ bo kpaakpa aaagba he sane lɛ baaha oná miishɛɛ yɛ shihilɛ mli. Shi te ooofee tɛŋŋ oná nanemɛi kpakpai? Aaafee afii 2,000 ni eho nɛɛ lɛ, Yesu tsɔɔ akɛ suɔmɔ ni ŋkomeŋfa su bɛ mli lɛ ji nɔ titri ni haa adesai yeɔ omanye yɛ amɛkɛ mɛi krokomɛi fɛɛ ateŋ sharamɔ mli. Etsɔɔ akɛ: “Bɔ ni nyɛtaoɔ akɛ mɛi afee aha nyɛ lɛ, nyɛ hu nyɛfea nakai nɔŋŋ nyɛhaa amɛ.” (Luka 6:31) Nɛkɛ wiemɔ nɛɛ tsɔɔ akɛ kɛ́ ootao oná nanemɛi lɛ, esa akɛ ofee mɔ ni haa mɔ nɔ̃, ní ejeee ŋkomeŋfatsɛ. Yɛ kukufoo mli lɛ, kɛ́ oosumɔ ni oná naanyo lɛ, belɛ esa akɛ bo hu ofee mɔ ni abaanyɛ akɛ lɛ abɔ naanyo. Yɛ mɛɛ gbɛ nɔ?

Anyɛŋ akɛ hiŋmɛitswaaoo ko afee naanyo ni bɛŋkɛ kpaakpa, ní haa anáa miishɛɛ. Yɛ anɔkwale mli lɛ, nanemɛi ni aaaná lɛ biɔ babaoo fe le ni aaale amɛ kɛkɛ. Nanemɛi ji aŋkroaŋkroi ni osumɔɔ amɛsane waa. Naanyobɔɔ ni ekomefeemɔ yɔɔ mli ni aaaná ni aha ehi shi daa lɛ biɔ mɔdɛŋbɔɔ. Bei pii lɛ naanyobɔɔ biɔ ni okɛ onaanyo lɛ hiamɔ nii aye nibii ni bo diɛŋtsɛ osumɔɔ waa lɛ hiɛ. Nanemɛi kɛ ekomefeemɔ hiɔ shi yɛ miishɛɛ bei amli kɛ agbɛnɛ hu yɛ haomɔ bei amli.

Okɛ onifeemɔ tsɔɔ akɛ oji naanyo kpakpa, titri lɛ kɛ́ ofee nɔ ko diɛŋtsɛ kɛye obua mɔ ko ni efĩ lɛ ni oha ená miishɛɛ lɛ. Abɛi 17:17 lɛ kɛɔ akɛ: “Naanyo sumɔɔ mɔ bei fɛɛ mli, ni afɔ lɛ akɛ nyɛmi ha haomɔ be.” Yɛ anɔkwale mli lɛ, wekukpaai ni kã nanemɛi ateŋ lɛ mli baanyɛ awa po fe wekukpaai ni yɔɔ weku mli bii komɛi ateŋ. Abɛi 18:24 lɛ kɛɔ akɛ: “Mɔ ni bɔɔ nanemɛi pii lɛ, ekã amane gbɛ; shi naanyo ko yɛ ni kpɛtɛɔ mɔ gbagbalii fe nyɛmi.” Ani obaasumɔ ni ole bɔ ni ooofee oná nanemɛi kpakpai ni tamɔ nɛkɛ lɛ he nii babaoo? Ani obaasumɔ ni ofata gbɔmɛi akuu ko ni ale amɛ jogbaŋŋ akɛ amɛsumɔɔ amɛhe lɛ ahe? (Yohane 13:35) Kɛ nakai ni lɛ, no lɛ Yehowa Odasefoi ni yɔɔ okutso lɛ mli lɛ baaná he miishɛɛ akɛ amɛaatsɔɔ bo bɔ ni ooofee oná nanemɛi kpakpai.