‘Sɛɛnamɔ Yɛ Onikeenii Lɛ He Waa’

NƐKƐ ji bɔ ni tsutsu Belguim maŋ hiɛnyiɛlɔ ko wie wolo ni ji Gbɔmɔ ni Fe Mɔ Fɛɛ Mɔ ni Ehi Shi Pɛŋ lɛ he.a Beni nuu ko ni ekɛ lɛ yɔɔ akutso mli lɛ yasara lɛ ní eha lɛ wolo nɛɛ eko lɛ, eŋɔ. Fee sɛɛ lɛ, eŋma wolo ekɛda lɛ shi akɛ: “Mihiɛ sɔ saramɔ ni obasara mi lɛ, ni miná nikeenii ni sɛɛnamɔ yɔɔ he waa—ni ji wolo ni ajegbɛ aŋma kɛkɔ ‘Gbɔmɔ ni Fe Mɔ Fɛɛ Mɔ’ lɛ he lɛ—ní okɛha mi lɛ he miishɛɛ waa diɛŋtsɛ.”

Tsutsu maŋ hiɛnyiɛlɔ nɛɛ kane wolo lɛ jogbaŋŋ ni emu sane naa akɛ: “Kɛ mɛi baanyá shɛɛ sane ni yɔɔ sanekpakpa lɛ mli lɛ he ni amɛkɛ Yesu Kristo nitsɔɔmɔi baatsu nii lɛ, no lɛ je lɛŋ shihilɛ baatsake kwraa. Ni gbɛjianɔ ni jeŋmaji a-Ekomefeemɔ kuu lɛ eto koni akɛmɔ tawuu naa lɛ he ebahiaŋ wɔ; ni mɛi kɛ awuiyeli nibii eyatutuaŋ mɛi krokomɛi, ni basabasafeemɔ sɛɛ baafo yɛ je lɛŋ.” Eyɛ mli akɛ nuu nɛɛ kpɛlɛ nɔ akɛ etamɔ nɔ ni nibii ni eshweɔ nɛɛ nyɛŋ aba mli moŋ, shi eha efee faŋŋ akɛ ehiɛ esɔ saramɔ ni ekutsoŋnyo nɛɛ basara lɛ lɛ waa diɛŋtsɛ.

Etsa nɔ akɛ: “Kuu ni okɛ ohe eyadɔmɔ lɛ sa yijiemɔ, ni amɛyɛ mɛi ahe tsuijurɔ waa, ni jeee akɛ nyɛmiikpa nibii kpakpai loo nibii gbohii agbɛ shi moŋ nyɛheɔ nyɛyeɔ diɛŋtsɛ akɛ adesai baanyɛ aha aná shihilɛ kpakpa.”

Yehowa Odasefoi heɔ amɛyeɔ akɛ Nyɔŋmɔ ji mɔ ni baaha shihilɛ lɛ ahi shi jeee adesai. Amɛbɔɔ mɔdɛŋ koni amɛkase Yesu Kristo ni ji gbɔmɔ ni fe mɔ fɛɛ mɔ lɛ. Ani Yehowa Odasefoi eba oŋɔɔ nyɛsɛɛ nɛɛ? Obaanyɛ oná sane ni amɛkɛ bo aaagba kɛkɔ gbɔmɔ ni fe mɔ fɛɛ mɔ ni ehi shi pɛŋ lɛ he lɛ he miishɛɛ. Ni amɛbaaná he miishɛɛ akɛ amɛaaha bo wolo ní tsutsu maŋ hiɛnyiɛlɔ lɛ tsui mɔ lɛ waa lɛ eko.

[Shishigbɛ niŋmaa]