Sanebimɔi ni Jɛ Kanelɔi Adɛŋ

Ani gbohiiashitee he hiɛnɔkamɔ yɛ ha bi ni gbo yɛ enyɛ musuŋ dani afɔ lɛ lɛ?

Ebaawa eha mɛi ni bii gboiko yɛ nɛkɛ gbɛ nɔ pɛŋ lɛ akɛ amɛaanu bɔ ni fɔlɔi ni hɔ esharake loo amɛbii gboi yɛ musuŋ dani afɔ amɛ lɛ nuɔ he amɛhaa lɛ shishi. Fɔlɔi nɛɛ ateŋ mɛi komɛi yeɔ awerɛho waa diɛŋtsɛ. Yoo ko bii enumɔ gboi yɛ emusuŋ dani efɔ amɛ. Fee sɛɛ lɛ, efɔ bihii enyɔ ní gboiii, ni ekwɛ amɛ. Shi kɛlɛ, ekaiɔ ebii ni gboi lɛ fɛɛ. Yɛ ewala shihilɛ mli fɛɛ lɛ, ekaiɔ afii abɔ ni kulɛ ebii ni gboi yɛ emusuŋ lɛ kɛ mɛi ni sharake lɛ eye. Ani Kristofoi ni tamɔ nɛkɛ lɛ yɛ nɔ ko ni amɛaadamɔ nɔ amɛná hiɛnɔkamɔ akɛ abaatee amɛbii nɛɛ ashi?

Wɔleee sane nɛɛ hetoo tuuntu. Biblia lɛ ewieko nɔ ko pɔtɛɛ yɛ abifabii ni gboiɔ woɔ amɛnyɛmɛi amusuŋ loo amɛsharakeɔ lɛ ashitee he. Ni kɛlɛ, shishitoo mlai ni shɛjeɔ mɔ mii ní kɔɔ sane nɛɛ he lɛ yɛ Nyɔŋmɔ Wiemɔ lɛ mli.

Nyɛhaa wɔsusua sanebimɔi enyɔ komɛi ni kɔɔ sane nɛɛ he lɛ ahe wɔkwɛa. Klɛŋklɛŋ lɛ, yɛ Yehowa hiɛ lɛ, mɛɛ be adesa wala jeɔ shishi—hɔŋɔɔ mli loo beni afɔ mɔ lɛ? Nɔ ni ji enyɔ lɛ, te Yehowa buɔ abifao ni yɔɔ enyɛ musuŋ lɛ ehaa tɛŋŋ—ani ebuɔ lɛ akɛ adesa aloo ebuɔ lɛ akɛ wala yibii komɛi kɛkɛ ni yɔɔ yoo lɛ musuŋ? Biblia mli shishitoo mlai haa sanebimɔi enyɔ nɛɛ ahetoo faŋŋ.

Mose Mla lɛ tsɔɔ faŋŋ akɛ adesa wala jeɔ shishi kwraa dani be ni akɛfɔɔ lɛ lɛ shɛɔ. Yɛ mɛɛ gbɛ nɔ? Mla lɛ tsɔɔ akɛ kɛ́ mɔ ko gbe abifao ni yɔɔ enyɛ musuŋ lɛ, agbeɔ nakai mɔ lɛ hu. Kadimɔ nɔ ni mla nɛɛ kɛɛ lɛ: “Oŋɔ susuma oto susuma najiaŋ.”a (2 Mose 21:22, 23) No hewɔ lɛ, abifao ni yɔɔ musuŋ lɛ yɛ wala, ni eji wala susuma. Anɔkwa sane nɛɛ eye ebua Kristofoi akpekpei abɔ ni amɛkpoo musufitemɔ, ejaakɛ amɛle akɛ eji esha kpele ni afeɔ ashiɔ Nyɔŋmɔ.

Eji anɔkwale akɛ gbekɛ ni afɔko lɛ lɛ yɛ wala, shi te Yehowa buɔ nakai wala lɛ ehaa tɛŋŋ? Mla ni atsĩ tã kɛtsɔ hiɛ lɛ bi ní agbe mɔ ni ha abifao ni yɔɔ enyɛ musuŋ lɛ gbo lɛ. Enɛ tsɔɔ faŋŋ akɛ, abifao ni afɔko lɛ lɛ wala jara wa yɛ Nyɔŋmɔ hiɛ. Kɛfata he lɛ, saji babaoo yɛ Ŋmalɛ lɛ mli ni tsɔɔ akɛ Yehowa naa abifabii ni yɔɔ musuŋ lɛ akɛ adesai. Akɛ nɔkwɛmɔnɔ lɛ, akɛ mumɔ tsirɛ Maŋtsɛ David ni ewie Yehowa he akɛ: “Bo oshɔ̃ mi yɛ minyɛ musuŋ. . . . Beni miji lá kukuli kɛkɛ lɛ, ohiŋmɛii na; ni gbii ni atotoi . . . lɛ, aŋma fɛɛ yɛ owolo lɛ mli.”—Lala 139:13-16; Hiob 31:14, 15.

Yehowa naa sui pɔtɛɛi ní abifabii ni afɔko amɛ lɛ yɔɔ, kɛ nibii ni amɛbaanyɛ amɛfee wɔsɛɛ. Beni Isak ŋa Rebeka hiɛ haaji hɔ lɛ, Yehowa ha ale nɔ ni gbekɛbii enyɔ ní shimɔshimɔɔ amɛhe yɛ emusuŋ lɛ baafee wɔsɛɛ, ni tsɔɔ akɛ etsɔ hiɛ ena bɔ ni amɛsui lɛ baasa mɛi babaoo ashihilɛ he wɔsɛɛ.—1 Mose 25:22, 23; Rom. 9:10-13.

Sane ni kɔɔ Yohane Baptisilɔ lɛ he lɛ hu sa kadimɔ jogbaŋŋ. Luka Sanekpakpa lɛ kɛɛ akɛ: “Beni Elisabet nu Maria ŋamɔ lɛ, abifao lɛ tũ yɛ emusuŋ; ni Mumɔ krɔŋkrɔŋ yi Elisabet mli obɔ̃.” (Luka 1:41) Hela wiemɔ ni tsofafeelɔ Luka kɛtsu nii beni ewieɔ sane nɛɛ he lɛ, baanyɛ akɔ abifao ni afɔko lɛ loo abifao ni afɔ lɛ momo lɛ he. Ekɛ nakai wiemɔ lɛ nɔŋŋ tsu nii beni ewieɔ Yesu he akɛ abifao ni kã kooloi aniyeniianɔ mli lɛ.—Luka 2:12, 16; 18:15.

Yɛ saji ni wɔsusu he lɛ fɛɛ amli lɛ, ani Biblia lɛ tsɔɔ akɛ srɔtofeemɔ agbo yɛ abifao ni afɔko lɛ kɛ abifao ni afɔ lɛ ŋɛɛ lɛ teŋ? Etsɔɔɔ nakai. Adebɔɔ nibii ahe nilelɔi ni yɔɔ ŋmɛnɛ lɛ maa sane nɛɛ nɔ mi. Ákɛ nɔkwɛmɔnɔ lɛ, niiamlitaolɔi ekase akɛ abifao ni yɔɔ enyɛ musuŋ lɛ nyɛɔ enuɔ nibii ní yaa nɔ yɛ he ni enyɛ lɛ yɔɔ lɛ he, ni etsirɛɔ ehe. Belɛ, ebɛ naakpɛɛ akɛ wekukpaa ni yɔɔ gbagbalii bakãa nyɛ ni hiɛ hɔ lɛ kɛ gbekɛ ni daa yɛ emli lɛ teŋ.

Esoro bei ni abifao fɛɛ abifao yeɔ yɛ enyɛ musuŋ dani afɔɔ lɛ. Susumɔ nɔkwɛmɔnɔ nɛɛ he okwɛ: Yoohɔlɔ ko fɔ trukaa ni ebe shɛko, shi abifao lɛ gbo yɛ gbii fioo sɛɛ. Nyɛ kroko hu hiɛ musu kɛyashi ebe shɛ, shi gbekɛ lɛ gbo etsɛɛɛ ni efɔ lɛ. Ani klɛŋklɛŋ mɔ lɛ baanyɛ aná hiɛnɔkamɔ akɛ abaatee ebi lɛ shi akɛni efɔ lɛ dani egbo lɛ, shi mɔ ni ji enyɔ lɛ nyɛŋ ana hiɛnɔkamɔ ni tamɔ nakai?

Yɛ kukufoo mli lɛ, Biblia lɛ tsɔɔ faŋŋ akɛ wala jeɔ shishi yɛ hɔŋɔɔ mli, ni akɛ Yehowa naa abifao ni afɔko lɛ lɛ akɛ adesa ni jara wa. Yɛ Ŋmalɛ mli anɔkwalei nɛɛ hewɔ lɛ, mɛi komɛi baakɛɛ akɛ ejaaa gbɛ akɛ akɛɔ akɛ gbohiiashitee he hiɛnɔkamɔ ko bɛ kɛha abifabii ni gboiɔ dani afɔɔ amɛ lɛ. Yɛ anɔkwale mli lɛ, ekolɛ amɛbaanu he po akɛ susumɔ ni tamɔ nɛkɛ lɛ teɔ shi ewoɔ jwɛŋmɔ ni wɔhiɛ yɛ hɔjiemɔ he lɛ, akɛni Ŋmalɛ mli anɔkwalei nɛɛ nɔŋŋ anɔ wɔdamɔ wɔkɛɔ akɛ hɔjiemɔ ehiii lɛ.

Be ko ni eho lɛ, Buu-Mɔɔ lɛ tee sanebimɔi komɛi ashi ni tsɔɔ akɛ ateŋ abifabii ni gboi dani afɔ amɛ lɛ ashi. Akɛ nɔkwɛmɔnɔ lɛ, ani Nyɔŋmɔ kɛ lá kukuli ni ebɔi abifao tsɔmɔ lɛ aaawo yoo ko fɔmɔ kotoku mli yɛ Paradeiso? Shi kɛlɛ, nii amli ni Nɔyeli Kuu lɛ pɛi jogbaŋŋ kɛ sɔlemɔ kɛ nibii anɔ jwɛŋmɔ lɛ eha amɛmu sane naa akɛ susumɔi nɛɛ kɛ gbohiiashitee he hiɛnɔkamɔ lɛ bɛ tsakpaa. Yesu kɛɛ akɛ: “Aaanyɛ nii fiaa afee yɛ Nyɔŋmɔ gbɛfaŋ.” (Mar. 10:27) Yesu fɔmɔ mli sane lɛ maa wiemɔ nɛɛ nɔ mi; ajie ewala kɛjɛ ŋwɛi kɛbawo oblayoo fro ko fɔmɔ kotoku mli—nɔ ko ni yɛ adesai asusumɔ naa lɛ anyɛŋ afee kɔkɔɔkɔ.

Belɛ, ani enɛɛmɛi fɛɛ tsɔɔ akɛ Biblia lɛ miitsɔɔ akɛ abaatee abifabii ni gboi dani afɔ amɛ lɛ ashi? Biblia lɛ haaa sanebimɔ nɛɛ hetoo tɛɛ, no hewɔ lɛ wɔnyɛŋ wɔma nɔ mi doo akɛ abaatee amɛ shi loo ateŋ amɛ shi. Abaanyɛ abi saji srɔtoi babaoo yɛ sane nɛɛ he. Yɛ anɔkwale mli lɛ, ebafeŋ nɔ ni sa akɛ wɔkɛ wɔ diɛŋtsɛ wɔjwɛŋmɔ aaatsɔɔ sane lɛ naa. Nɔ ni wɔle ji akɛ: Yehowa Nyɔŋmɔ ni mlihilɛ kɛ mɔbɔnalɛ fa babaoo lɛ ji mɔ ni baatsɔɔ. (Lala 86:15) Ŋwanejee ko bɛ he akɛ, eeshwe akɛ ebaajie gbele yɛ shihilɛ mli kɛtsɔ gbohiiashitee lɛ nɔ. (Hiob 14:14, 15) Wɔbaanyɛ wɔná nɔmimaa akɛ efeɔ nɔ ni ja be fɛɛ be. Ebaajɛ esuɔmɔ mli eha e-Bi lɛ ‘afite Abonsam nitsumɔi lɛ’ ní etsa hejaramɔi fɛɛ ni nibii agbɛjianɔtoo fɔŋ nɛɛ kɛba wɔ nɔ yɛ shihilɛ mli lɛ.—1 Yoh. 3:8.

[Shishigbɛ niŋmaa]

[Mfoniri ni yɔɔ baafa 13]

Yehowa baatsa hejaramɔi fɛɛ