Nɔ ni Nyɔŋmɔ Baafee yɛ Efɔŋfeemɔ He

Biblia lɛ kɛɔ wɔ nɔ ni Yehowa kɛ e-Bi Yesu Kristo baafee yɛ nɔnaa ni Satan Abonsam kɛba lɛ he yɛ faŋŋ mli. Ekɛɔ akɛ, “Enɛ hewɔ Nyɔŋmɔ bi lɛ [Yesu] jie ehe kpo, koni efite abonsam nitsumɔi lɛ.” (1 Yohane 3:8) Abaafite amrɔ nɛɛ jeŋ gbɛjianɔtoo ni hiɛjoomɔ, hetsɛ̃ kɛ awuiyeli nifeemɔi eyi mli tɔ lɛ. Yesu ewo shi akɛ abaafã “je nɛŋ lumɔ lɛ” ni ji Satan Abonsam “ashɛ afɔ̃.” (Yohane 12:31) Akɛ jalɛ jeŋ hee ko ni Satan naŋ mɛi anɔ hewalɛ yɛ mli baaba, ni shikpɔŋ nɛɛ baafee he ko ni toiŋjɔlɛ yɔɔ.​—2 Petro 3:13.

Ni mɛi ni kɛ kuɛŋtimɔ kpoɔ akɛ amɛaatsake ni loloolo lɛ amɛkã he amɛmiifee nibii fɔji lɛ hu? Susumɔ shiwoo ni yɔɔ faŋŋ nɛɛ he okwɛ: “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ, shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:21, 22) Abaakpata adesai awuiyelɔi fɛɛ ahiɛ. Yɛ nakai jeŋ ni toiŋjɔlɛ yɔɔ mli lɛ mli lɛ, abaahã adesai ni feɔ toi lɛ aye amɛhe fiofio kɛjɛ emuu ni ayeee ni akɛfɔ amɛ lɛ mli.​—Romabii 6:17, 18; 8:21.

Mɛɛ gbɛ nɔ Nyɔŋmɔ baatsɔ ejie efɔŋfeemɔ yɛ nakai jeŋ hee lɛ mli? Efeŋ nakai kɛtsɔ heyeli ni ekɛduro wɔ ni wɔkɛhala nɔ ni wɔsumɔɔ lɛ ni eeehe yɛ wɔdɛŋ lɛ nɔ. No najiaŋ lɛ, ebaatsɔɔ adesai ni feɔ toi lɛ egbɛi lɛ, ni ebaaye ebua amɛ ni amɛtsake amɛsusumɔi kɛ nifeemɔi fɔji lɛ.

Mɛni Nyɔŋmɔ baafee yɛ osharai ni baa trukaa lɛ ahe? Ewo shi akɛ, etsɛŋ ni e-Maŋtsɛyeli lɛ baaye shikpɔŋ lɛ nɔ. Mɔ ni Nyɔŋmɔ ewo lɛ Maŋtsɛ yɛ nakai Maŋtsɛyeli lɛ nɔ ji Yesu Kristo, mɔ ni yɔɔ hewalɛ ni akɛtsaa hela lɛ. (Mateo 14:14) Yesu yɛ hewalɛ hu ni akɛkudɔɔ adebɔɔ nibii. (Marko 4:35-41) No hewɔ lɛ, nɔnai ni “nibii ni baa trukaa” lɛ kɛbaa lɛ fɛɛ baaho aya. (Jajelɔ 9:11) Yɛ Kristo nɔyeli lɛ mli lɛ, oshara ko kwraa baŋ adedai anɔ.​—Abɛi 1:33.

Mɛi akpekpei abɔ ni efeko efɔŋ ko ni egboi yɛ osharai amli lɛ hu? Dani Yesu baatee eshieŋtsɛ Lazaro shi lɛ, ekɛɛ akɛ: “Miji shitee lɛ kɛ wala lɛ.” (Yohane 11:25) Hɛɛ, Yesu yɛ hewalɛ ni ekɛaatee mɛi ashi, loo ni ekɛaahã mɛi ni egboi lɛ aba wala mli ekoŋŋ!

Kɛ́ onya susumɔ akɛ, abaahi shi yɛ jeŋ ko mli, ni nibii fɔji baŋ mɛi kpakpai anɔ dɔŋŋ lɛ he lɛ, mɛni hewɔ okɛfeee oti ni ma ohiɛ akɛ obaatsɔ Biblia lɛ nɔ okase anɔkwa Nyɔŋmɔ lɛ kɛ eyiŋtoi lɛ ahe nii babaoo? Yehowa Odasefoi ni yɔɔ okutso lɛ mli lɛ baaná he miishɛɛ akɛ amɛaaye amɛbua bo ni ole Nyɔŋmɔ he nii babaoo. Wɔmiiwo bo hewalɛ koni otao amɛ sɛɛgbɛ, aloo kɛ́ oosumɔ lɛ, ŋmaa oyahã mɛi ni fee wolo tɛtrɛɛ nɛɛ.