Ani Ole?

Yɛ blema lɛ, kɛ́ mɛi miifã gbɛ lɛ, te amɛfeɔ tɛŋŋ amɛshɛreɔ la?

YƐ 1 Mose 22:6 lɛ, Biblia lɛ kɛɔ akɛ be ni Nyɔŋmɔ kɛɛ Abraham ni ekɛ Isak ayashã afɔle lɛ, “Abraham ŋɔ afɔleshaa lai lɛ etere ebi Isak, ni eŋɔ la lɛ kɛ kakla lɛ ehiɛ edɛ̃; ni amɛyi enyɔ lɛ fɛɛ amɛyiŋ amɛtee.”

Ŋmalɛi lɛ etsɔɔɔ wɔ bɔ ni mɛi feɔ amɛshɛreɔ la yɛ blema. Biblia mli nilelɔ ko wie yɛ Abraham sane lɛ he akɛ, ekpaaa shi akɛ Abraham kɛ Isak baanyɛ amɛhiɛ la diɛŋtsɛ kɛnyiɛ gbɛ kakadaŋŋ ni amɛfo kɛtee he ni abaashã afɔle lɛ yɛ lɛ. No hewɔ lɛ, eeenyɛ efee akɛ jeee la diɛŋtsɛ no mli lɛ Abraham hiɛ lɛ, shi moŋ nibii ni ebaanyɛ ekɛshɛre la.

Shi nilelɔi krokomɛi hu wieɔ akɛ, yɛ blema lɛ, etɔɔ mɛi waa dani amɛnyɛɔ amɛshɛreɔ la. No hewɔ lɛ, eeenyɛ efee akɛ, mɛi pii shɛreee la amɛ diɛŋtsɛ. Moŋ lɛ, amɛjeɔ lasrɛ̃mi kɛjɛɔ la ni amɛkutsoŋbii lɛ eshɛre momo lɛ mli ni no amɛkɛshɛreɔ la. Enɛ hewɔ lɛ, nilelɔi pii kɛɔ akɛ, Abraham je la ni amɛshɛre gbi gbɛkɛ ni enɔ jetsɛremɔ lɛ ekɛ Isak baafã gbɛ lɛ eko, ni ekɛwo gbɛ́ ko ni kɔsɔŋkɔsɔ yɔɔ he, loo nɔ kroko ni tamɔ nakai lɛ mli ni amɛkɛfã gbɛ lɛ. (Yes. 30:14) Kɛ́ enɛ Abraham hiɛ yɛ amɛgbɛfãa lɛ nɔ lɛ, no lɛ ewaaa akɛ amɛbaashɛre la kɛji amɛná tsei bibii fioo komɛi.