Sanebimɔ He

◼ Mɛɛ hesaamɔ sa kɛha wielɔi yɛ kpokpaa nɔ kpeei kɛ kpokpaa wulu nɔ kpeei ashishi wiemɔ kpokui anɔ?

Shishitoo mla ni yɔɔ 1 Timoteo 2:9 lɛ kɔɔ Nyɔŋmɔ tsuji ahe yɛ bei fɛɛ mli akɛ he fɛɛ he ni wɔyɔɔ lɛ, esa akɛ wɔwula wɔhe kɛ “atade ni sa kɛ hiɛ ni gboɔ nɔ kɛ jwɛŋmɔ ni sa.”

Esa akɛ atade lɛ afee nɔ ni sa kɛha be lɛ. Akɛ nɔkwɛmɔ nɔ lɛ, efeŋ nɔ ni sa akɛ okwaafonyo aaawo ehewulamɔ atadei ni ekɛyahu yɛ eŋmɔ mli, shi ebaahi kɛji ewo nakai atade lɛ yɛ shia aloo yɛ maŋ beni eyaa enanemɛi asaramɔ lɛ. Yɛ nakai gbɛ nɔ nɔŋŋ lɛ, efeŋ nɔ ni sa akɛ mɔ ko baawo koot kɛyawu ŋshɔ, shi atade ni tamɔ nɛkɛ baafee nɔ ni sa kɛha Maŋtsɛyeli Asa lɛ nɔ yaa.

Agbojee ni yɔɔ nifeemɔ loo be lɛ he lɛ hu kɔɔ atade ni sa jogbaŋŋ ni sa akɛ awo kɛha nakai be lɛ he. Eji adebɔɔ su akɛ kɛji mɛi miiya nifeemɔ ko ni he hiaa waa shishi lɛ, amɛbɔɔ mɔdɛŋ ni ‘amɛwo atade ni yɔɔ fɛo waa.’ Ni kɛlɛ, esa akɛ Kristofoi aŋmɛ pɛpɛɛpɛ ni amɛkasaa amɛhe, kɛ “atade ni jara wa,” kɛha bei ni tamɔ nɛkɛ po.​—⁠1 Tim. 2:9b.

Akaiɔ wɔ akɛ beni Maŋnyɛ Ester yapue yɛ maŋtsɛ lɛ hiɛ lɛ, no mli lɛ ewo “emaŋ­nyɛ atadei” lɛ. (Est. 5:⁠1) Yɛ nɛkɛ shishitoo mla nɛɛ he susumɔ mli lɛ, aakpa wielɔi ni kwɔɔ wiemɔ kpoku lɛ yɛ nɛkɛ bei ni he hiaa tamɔ kpokpaa nɔ kpeei kɛ kpokpaa wulu nɔ kpeei ashishi nɛɛ mli lɛ agbɛ ni amɛha bɔ ni agbojee yɔɔ nakai be lɛ he aje kpo yɛ amɛhesaamɔ mli. Yɛ maŋ nɛɛ mli lɛ, abaanyɛ awie akɛ kpokpaa nɔ kpeei kɛ kpokpaa wulu nɔ kpeei ashishi wielɔi ni woɔ koot aloo amɛwoɔ wɔmaŋ hesaamɔ atadei ni sa jogbaŋŋ lɛ esaa amɛhe bɔ ni sa, ni amɛbaanyɛ amɛkɛ toibolɔi lɛ awie. Yɛ Ghana kooyigbɛ, ni ji Northern kɛ Upper Region kpokpai anɔ nɛkɛ lɛ, abuɔ fugu loo batakari akɛ amɛmaŋ hesaamɔ ni sa jogbaŋŋ. Enɛ hewɔ lɛ abaanyɛ aŋmɛ fugu loo batakari gbɛ kɛha wielɔi yɛ nakai hei lɛ.

Mɛi komɛi ebi akɛ ani mɛi ni ahaa amɛ maŋshiɛmɔ yɛ asafo lɛ mli lɛ baanyɛ awo political suit (ni atsɛɔ lɛ French suit hu lɛ) lo. Hetoo lɛ ji hɛɛ. Yɛ asafo lɛ mli lɛ, sɛinɔtalɔ kɛha maŋshiɛmɔ lɛ hu baanyɛ awo political suit (loo French suit). Shi kɛlɛ, aŋmɛɛɛ gbɛ ni wielɔi ni baaya wiemɔ kpoku lɛ nɔ yɛ kpokpaa nɔ kpee loo kpokpaa wulu nɔ kpee shishi lɛ awo political suit loo French suit. Mɛi ni yɔɔ nifeemɔi krokomɛi, tamɔ nɔkwɛmɔ nii afeemɔ aloo mɛi ni akɛ amɛ baagba sane yɛ kpokpaa nɔ kpee loo kpokpaa wulu nɔ kpee lɛ shishi wiemɔ kpoku lɛ nɔ lɛ baanyɛ awo political suit loo French suit, shi esa akɛ wielɔ lɛ diɛŋtsɛ awo koot diɛŋtsɛ aloo wɔmaŋ he­saa­mɔ ni sa jogbaŋŋ lɛ eko, aloo, kɛha mɛi ni yɔɔ Northern kɛ Upper Region kpokpai wuji lɛ anɔ lɛ, fugu loo batakari ni he tse taakɛ wɔtsɔɔ kɛtsɔ hiɛ momo lɛ.

Yɛ asafoi pii amli lɛ, nyɛmimɛi hii ni ahaa amɛ wiemɔi, akɛ nɔkwɛmɔ nɔ lɛ, yɛ Teokrase Sɔɔmɔ Skul lɛ aloo Sɔɔmɔ Kpee lɛ mli lɛ, kwɔɔ wiemɔ kpoku lɛ ní amɛwo shɛɛt ní amɛfi tai pɛ. Abuɔ enɛ hu akɛ esa jogbaŋŋ kɛha nifeemɔ lɛ.

“Afee nii fɛɛ bɔ ni yɔɔ fɛo kɛ gbɛnaa gbɛnaa,” yɛ bei fɛɛ mli.​—⁠1 Kor. 14:40.