Sanebimɔ He
◼ Ani obaaya “Kaimɔ he okpɔlɔŋmɛɛ” shishi?
Kɛha anɔkwa Kristofoi lɛ, Kaimɔ lɛ ji miishɛɛnamɔ be kpele ko! Mɛni hewɔ? Emaa nɔ ni Kristo gbele lɛ damɔ shi kɛha lɛ nɔ mi yɛ Yehowa yiŋtoo he nitsumɔ mli—efãa Yehowa Nyɔŋmɔ he akɛ Bɔlɔ kɛ Jeŋ Muu Fɛɛ Nɔyelɔ, ni ekɛ kpɔmɔ nɔ ni he hiaa lɛ haa adesai. (Yoh. 3:16; 1 Mose 1:28) Yesu kɛ ebɔfoi anɔkwafoi 11 lɛ fee nɔkwɛmɔ nɔ kpakpa yɛ miishɛɛ ni ajieɔ lɛ kpo nɛɛ mli.—Mat. 26:30.
Yɛ nɔkwɛmɔ nɔ nɛɛ sɛɛnyiɛmɔ mli lɛ, Kristofoi pii jwɛŋɔ nɔ ni gbijurɔ ni soro no kwraa nɛɛ damɔ shi kɛha lɛ nɔ, gbɛkɛ lɛ, yɛ Kaimɔ lɛ sɛɛ. Mɛi krokomɛi hu naa nanemɛi Kristofoi ni amɛkɛ amɛ bɔɔ kɛnaa miishɛɛ lɛ mli ŋɔɔmɔ, ni amɛlaa Maŋtsɛyeli lalai ni amɛgbaa niiashikpamɔi ni tswaa mɔ maa shi.
Kaimɔ lɛ yeli yɛ nɛkɛ gbɛ nɔ lɛ haa esoroɔ no kwraa yɛ je lɛŋ jamɔŋ gbijurɔyelii tamɔ Blonya lɛ he—okpɔlɔŋmɛɛ kɛ joo ni yaa nɔ fe nine nyiɛɔ sɔlemɔ lɛ gbijurɔyelii asɛɛ. Kɛ afeee enɛɛmɛi kɛtsaraaa nɔ lɛ, mɛi ni kɛ amɛhe woɔ mli lɛ baana akɛ gbijurɔyeli lɛ yeko emuu, ni akɛ eŋɔɔɔ hu. Ani nakai ji bɔ ni esa akɛ anɔkwa Kristofoi akwɛ Kaimɔ lɛ yeli amɛha? Amaniɛbɔɔi tsɔɔ akɛ yɛ asafoi komɛi amli lɛ, kɛ agbe Kaimɔ lɛ naa nɔŋŋ pɛ lɛ, nyɛmimɛi yaa “okpɔlɔŋmɛ̃ɛi” ashishi ni anuɔ dãa atɔɔ kpɔtɔɔ ni atswaa je lɛŋ lalai ajoɔ aahu kɛboteɔ nyɔɔŋ. Yɛ okpɔlɔŋmɛɛ ni tamɔ enɛ eko mli lɛ, shiɛlɔi enyɔ kɛ amɛhe wo jeŋba shara mli, beni ámɛnu dãa babaoo ni hiɛshikamɔ bɛ mli ámɛgbe naa lɛ. Kwɛ bɔ ni eyɔɔ awerɛho ha!—Okɛto 2 Mose 32:5, 6, 17-19 he; Bɔf. 7:41-43.
Henaabuamɔi ni dãa ni anuɔ lɛ babaoo fa yɛ shishi, ni ayaa nɔ atswaa je lɛŋ lalai ni gbɛ́ɔ waa fe nine, yɛ be mli ni ajoɔ basabasa lɛ ji je lɛŋ okpɔlɔŋmɛɛ, ni gbɛi ni bulɛ yɔɔ he ni akɛaatsɛ enɛ lɛ kɔɔɔ he eko. Anɔkwa Kristofoi kɛ amɛhe ewo miishɛɛnamɔ ni yɔɔ hoo ni tamɔ nɛkɛ mli be saŋŋ, yɛ be ni eho lɛ mli, beni amɛleee Nyɔŋmɔ suɔmɔnaa nii kɛ eyiŋtoi ahe nɔ ko lɛ. Amɛsumɔɔɔ ni amɛkɛ amɛhe woɔ gbijurɔyeli ko ni nakai nifeemɔi kadiɔ nomɛi, loo etamɔ nomɛi lɛ amli. (1 Pet. 4:3; Yes. 5:11, 12) Te aaafee tɛŋŋ ni mɔ ko aaajwɛŋ Yehowa nifeemɔi ni yɔɔ nyam lɛ ahe (yɛ Kaimɔ lɛ sɛɛ) yɛ be mli ni eyeɔ nii ni enuɔ dãa babaoo hu, beni atswaa je lɛŋ lalai hoo lɛ?
Eyɛ mli akɛ henaabuamɔ ni ayaa shishi lɛ ji mɔ lɛ diɛŋtsɛ yiŋkpɛɛ moŋ, shi ehe miihia ni Yehowa tsuji aya nɔ asara yɛ mumɔŋ, ni amɛkwa je lɛŋ nifeemɔi fɛɛ. Esa akɛ bɔ ni amɛbaa amɛjeŋ amɛhaa yɛ Kaimɔ lɛ gbɛkɛ kɛ no sɛɛ lɛ, awo miishɛɛ Nyɔŋmɔ ni ji Yehowa hiɛ nyam, ni eha mɛi ni kwɛɔ enɛ yɛ anɔkwayeli mli lɛ akɛɛ akɛ: “Nyɔŋmɔ yɛ nyɛteŋ lɛlɛŋ.”—1 Kor. 14:25; Jaj. 3:1.