Sanebimɔ He
◼ Mɛɛ gbɛ nɔ wɔɔtsɔ wɔha saji ahetoo ni mɔɔ shi jogbaŋŋ yɛ kpeei ashishi?
Wɔmiikpa gbɛ akɛ wɔɔbua wɔhe naa yɛ daa otsi asafoŋ kpeei lɛ ashishi. Jɛmɛ ji he ni wɔyɔɔ hegbɛ akɛ wɔɔjie wɔ hemɔkɛyeli lɛ kpo wɔtsɔɔ yɛ, ni wɔwo mɛi krokomɛi ahewalɛ kɛtsɔ saji ahetoohamɔ nɔ. (Abɛi 20:15; Heb. 10:23, 24) Esa akɛ wɔbu saji ahetoohamɔ akɛ hegbɛ ni wɔna, ni wɔbɔ mɔdɛŋ wɔna mli gbɛfaŋnɔ daa. Mɛɛ gbɛ nɔ wɔɔtsɔ wɔfee enɛ jogbaŋŋ kɛmɔ shi?
Hesaamɔ ji klɛŋklɛŋ nifeemɔ. Nikasemɔ lɛ ni wɔɔtsɔ hiɛ wɔkane ni wɔjwɛŋ nɔ lɛ he miihia. Bɔɔ mɔdɛŋ ni oná mumɔ loo shishinumɔ ni yɔɔ nɔ ni akaseɔ lɛ sɛɛ lɛ. Eyɛ mli akɛ ekolɛ atsɔ hiɛ asusu nikasemɔ lɛ he be ko moŋ, shi taomɔ saji otii krokomɛi babaoo ni fa loo eyeɔ ebuaa yɛ nɔ ni akɛhaa lɛ mli. Ha nikasemɔ lɛ he saneyitso muu lɛ ahi ojwɛŋmɔ mli. Kɛ ootao hetoo kɛmiijɛ wolo ko ni tsɔɔ Biblia mli wolo ko tamɔ Kpojiemɔ Naagbee wolo lɛ mli fitsofitso ni okɛsaa ohe lɛ, bɔɔ mɔdɛŋ ona bɔ ni kuku pɔtɛɛ ko lɛ kɔɔ kukuji ni bɔle he lɛ he ehaa. Ŋaawoi nɛɛ asɛɛnyiɛmɔ baakanya bɔ ni onyɛɔ osusuɔ saji ahe ohaa lɛ. Ebaaye ebua bo ni okɛ hetoohamɔi kpakpai asaa ohe ni omii ashɛ ohe yɛ ohe ni okɛwoɔ mli lɛ mli.
Hetooi ni hi fe fɛɛ lɛ yɛ kuku, ebɛ hwanyaŋŋ, ni edamɔ wolo ni akaseɔ lɛ nɔ. Esa akɛ klɛŋklɛŋ hetoohalɔ lɛ aha sanebimɔ lɛ hetoo tɛ̃ɛ, ni eshi saji otii krokomɛi eha ni mɛi krokomɛi atsɔɔ mli. Kwa sane hetoohamɔ ni bɔleɔ shi ni yeɔ be babaoo ni haaa mɛi krokomɛi anyɛ amɛkɛ amɛhe awo mli lɛ. Ha hetoo yɛ bo diɛŋtsɛ owiemɔ mli, fe ni oookane ohetoo lɛ tɛɛ kɛaajɛ wolo lɛ mli. Abaanyɛ akɛ otii ni awie he yɛ Ŋmalɛi ni aŋmalako emli wiemɔi lɛ amli lɛ afata hetooi ni yeɔ buaa lɛ ahe. Bo nɔ ni mɛi krokomɛi kɛɔ lɛ toi jogbaŋŋ koni onyɛ okwa hetoo ni atĩɔ mli bɔ ni esaaa lɛ.
Ehi akɛ ooowo onine nɔ shii abɔ shi jeee yɛ kuku fɛɛ kuku mli. Wɔmiifɔ nine kɛmiitsɛ gbekɛbii lɛ ni amɛna sane hetoohamɔ mli gbɛfaŋnɔ. Kɛ oshashaoɔ shi kɛ wiemɔ lɛ, obaanyɛ otsɔ hiɛ oha nikasemɔ nɔkwɛlɔ lɛ ale kuku ni obaasumɔ ni oha hetoo yɛ he lɛ, ni ekolɛ ebaanyɛ eha bo hegbɛ ni ofee nakai.
Esa akɛ wɔ fɛɛ wɔbɔ mɔdɛŋ waa ni wɔna nɔ ko wɔkɛɛ yɛ asafoŋ kpeei ni ekɔɔ toibolɔi ni amɛkɛ amɛhe aaawo mli lɛ he. Kaimɔ akɛ, omanye ni kpeei ni tamɔ nɛkɛ baaye lɛ damɔ suɔmɔ ni wɔyɔɔ akɛ wɔɔha hetoo ni wɔha emɔ shi lɛ nɔ babaoo.—Lala 26:12.