Fɔlɔi ni Amɛmli Filiɔ Amɛ!
1 Kɛ odako ni oyɛ Kristofoi ashia mli lɛ, gbɛ krɛdɛɛ ko yɛ ni obaanyɛ otsɔ nɔ oha ofɔlɔi ana miishɛɛ. Kɛ otiu jalɛ sɛɛgbɛ lɛ, ‘otsɛ kɛ onyɛ mii aaashɛ amɛhe.’ (Abɛi 23:22-25) Eji adebɔɔ naa nifeemɔ akɛ ofɔlɔi aaasumɔ ni oná nii ni hi fe fɛɛ. Nɔ ko kwraa bɛ ni baaha amɛmii ashɛ amɛhe fe ni amɛaana akɛ oha anɔkwale lɛ etsɔ onɔ̃ ni ojɔɔ owala nɔ oha Yehowa.
2 Obaanyɛ oda shi akɛ oyɛ fɔlɔi ni yɔɔ anɔkwale lɛ mli. Kɛjɛ ofɔmɔ be mli ni ámɛha bo niyenii, ámɛwo bo atade, ni ámɛha bo shihilɛ he ni ámɛkwɛ onɔ hu kɛtsɔ helai amli. Nɔ ni fe fɛɛ po lɛ, amɛbɔ mɔdɛŋ amɛtsɔɔ bo Yehowa kɛ ejalɛ gbɛi lɛ ahe nii; enɛ ji tsɔsemɔ ni baanyɛ aha bo nɔmimaa akɛ obaana naanɔ wala. (Efes. 6:1-4) Mɛɛ gbɛ nɔ obaatsɔ otsɔɔ akɛ ohiɛ esɔ?
3 Ha Anɔkwale lɛ Atsɔ Onɔ̃: Ofɔlɔi ebɔ mɔdɛŋ amɛtsɔɔ bo nii koni okɛ hiɛdɔɔ atsu anɔkwale lɛ he nii, koni oya hiɛ yɛ mumɔŋ ni oya nɔ obɛŋkɛ Yehowa gbɛjianɔtoo lɛ. Obaanyɛ otsɔɔ hiɛsɔɔ kɛtsɔ miishɛɛ ni ooona yɛ weku nikasemɔ mli lɛ nɔ, ni esaaa akɛ anyɛɔ onɔ dã. Tsɔɔmɔ akɛ oyɛ suɔmɔ akɛ obaaya kpeei, ni bo diɛŋtsɛ otsɔ hiɛ osaa ohe koni weku lɛ anyɛ ayashɛ jɛmɛ mra. Okɛ ofɔlɔi atara he kome beni kpeei lɛ yaa nɔ lɛ, ni obo sane toi jogbaŋŋ kɛtsɔ wolo ni akaseɔ lɛ sɛɛnyiɛmɔ nɔ. Bɔɔ mɔdɛŋ ona kpeei lɛ amli gbɛfaŋnɔ kɛtsɔ sane hetoohamɔ nɔ. Jiemɔ ohe kpo akɛ mɔ ni miisumɔ ni etsu nɔ ko yɛ Teokrase Sɔɔmɔ Skul lɛ mli, ni okpɛlɛ nifeemɔi anɔ ni obɔ mɔdɛŋ fɛɛ ni ooonyɛ ni otsu amɛhe nii. Okɛ ohe aha koni oye obua kɛtsu Maŋtsɛyeli Asa ni oyelikɛbuamɔ he baaba sɛɛnamɔ yɛ jɛmɛ lɛ he nii. Nitsumɔi ni tamɔ nɛkɛ ni okɛ ohe aaawo mli lɛ baanyɛ aha okɛ otsui ama nɔ ni hi kɛha bo yɛ mumɔŋ lɛ nɔ.
4 Okɛ Otii ni Kɛ Nɔyaa Baa lɛ Amamɔ Ohiɛ: Yaa hiɛ koni ona shiɛmɔ nitsumɔ lɛ mli gbɛfaŋnɔ kɛ shishinumɔ, ni otsɔɔ akɛ oosumɔ ni ohe asa akɛ shiɛlɔ. Yaa nɔ ni okɛ daa otsi Biblia kanemɔ lɛ atsu nii, loo nɔ ni hi fe fɛɛ po lɛ, bo diɛŋtsɛ kanemɔ Biblia muu lɛ fɛɛ. Too oyiŋ akɛ obaasumɔ ni oshɛ taomɔ nii kɛha henɔjɔɔmɔ kɛ baptisimɔ lɛ he. Ofɔlɔi baanyɛ aye abua bo ni oto nibii ni okaseɔ yɛ skul lɛ ahe gbɛjianɔ jogbaŋŋ kɛ jwɛŋmɔ akɛ obaaná tsɔsemɔ ni baawaje bo kɛha Yehowa sɔɔmɔ lɛ mli gbɛfaŋnɔ kɛmɔ shi. Okɛ ojwɛŋmɔ ama su pɔtɛɛ lɛ ni baaha mɛi krokomɛi ajie oyi kɛha hegbɛi krɛdɛɛi tamɔ gbɛgbamɔ loo Betel sɔɔmɔ lɛ nɔ. (Bɔf. 16:1, 2) Otii ni onine baashɛ nɔ lɛ baanyɛ aye abua bo koni ‘oyoo nii ni hi titri lɛ, koni jalɛ yibii ayi omli obɔ.’—Fil. 1:10, 11.
5 Obalahii kɛ obalayei bibii abe ji be kɛha nikasemɔ, niiashikpamɔ námɔ, kɛ hesaai ni abaana yɛ bɔ ni akɛ mɛi krokomɛi aaaye aha lɛ mli. Eji be ni obaanyɛ okɛna shihilɛ mli ŋɔɔmɔ ni nɔnyɛɛi kɛ gbɛnaa nii fɛɛ ni bakãa mɔ nɔ beni etsɔ onukpa lɛ fataaa he. Salomo kɛɛ: “Obalanyo, ha omii ashɛ ohe yɛ obalahiiaŋ, ni ona tsuijurɔ yɛ obalahiiaŋ gbii lɛ amli.” (Jaj. 11:9) Kɛ okɛ otsui ma Yehowa sɔɔmɔ nɔ beni odako nɛɛ, obaakpa jɔɔmɔi ni baahi shi kɛya naanɔ.—1 Kron. 28:9.
6 Kɛ ‘otiu jalɛ sɛɛ’ moŋ fe ‘obalahiiaŋ asɛɛdii nii lɛ,’ obaajie ofɔlɔi kɛaajɛ yeyeeye-feemɔ kɛ tsuiŋdɔlɛ he jatsu ni tsii lɛ shishi. (2 Tim. 2:22) Obaaha bo diɛŋtsɛ otsui anyã. (Abɛi 12:25) Nɔ ni fe fɛɛ lɛ, obaaha o-Bɔlɔ lɛ, Yehowa Nyɔŋmɔ, mli afili lɛ.—Abɛi 27:11.