Teokrase Henaabuamɔi Amli Jɔɔmɔi Wuji ni Anáa
1 Be fɛɛ be ni Yehowa kɛ ewebii yeɔ lɛ, etsɔɔ amɛ nii ni ehaa amɛkpeɔ kutuu daa kɛfeɔ ekome yɛ jamɔ mli. Amɛhe ni amɛtuɔ amɛwoɔ sɔlemɔ kɛ sane nɔjwɛŋmɔ mli yɛ bei nɛɛ amli lɛ kɛ mumɔŋ jɔɔmɔi babaoo eba. Eyiŋtoi ahe la ni fa lɛ ekpɛ, ni etsu nii akɛ nɔ ni kanyaa mɔ kɛha sɔɔmɔ krɔŋkrɔŋ.
2 Bɔni afee ni ana jɔɔmɔi ni jɛɔ Nyɔŋmɔ teokrase gbɛjianɔtoo lɛ mli kɛbaa lɛ mli ŋɔɔmɔ lɛ, esa akɛ aŋkroaŋkroi kɛ wekui aye gbɛtsii nii anɔ koni amɛhi henaabuamɔi nɛɛ ashishi. Hebri Ŋmalɛi lɛ haa aleɔ akɛ henyɛlɔi amaji ebɔle Yudafoi lɛ ahe kɛkpe ni esa akɛ amɛwuu yɛ be fɛɛ mli koni amɛhiɛ amɛ heyeli mli. Filistibii, Arambii, kɛ maji krokomɛi lɛ fɛɛ ahiɛ kɔ̃ɔ Palestina shikpɔŋ lɛ nɔ. (2 Mose 34:24) Yɛ hegbeyeiwoo nɛɛ fɛɛ sɛɛ lɛ fɔlɔi Israelbii pii bu kpeei nɛɛ akɛ sɛɛnamɔ yɛ he waa diɛŋtsɛ aahu akɛ amɛyaa Yerusalem be fɛɛ be, ni amɛkɛ amɛbii lɛ hu yaa. Bo lɛ feemɔ mɔdɛŋbɔɔ ni akpaa gbɛ koni afa gbɛ lɛ fɛɛ eko lɛ he mfoniri okwɛ, ni titri lɛ nyiɛmɔ sɔŋŋ ni! Ni kɛlɛ mɛɛ gbɛfaa ni kanyaa mɔ, ni yɔɔ miishɛɛ eji kɛha weku lɛ nɛkɛ, ni mɛɛ hewalɛ ni sɛɛ tsɛɔ enaa yɛ gbekɛbii anɔ nɛkɛ!
3 Akpa gbɛ yɛ Mose Mla lɛ shishi akɛ, weku fɛɛ weku mli nyo ahi Yerusalem yɛ bei komɛi amli. (2 Mose 23:14-17; 5 Mose 31:10-13; Luka 2:41-50) Esa akɛ agbe nuu fɛɛ nuu ni he tse ni kuɔ ehiɛ efɔɔ Hehoo lɛ yeli nɔ lɛ. (4 Mose 9:9-14) Kwɛ bɔ ni Yehowa kɛ hiɛdɔɔ buɔ hiɛ ni akuɔ afɔɔ mumɔŋ henaabuamɔi anɔ!
4 Mra Be Mli Kristofoi Akpeei: Yesu Kristo ha efee esubaŋ akɛ ekɛ gbɔmɛi akui aaakpe kɛha Yehowa jamɔ. (Mat. 5:1–7:29) Yɛ be mli ni enɛɛmɛi jeee kpeei ni aje gbɛ ato he gbɛjianɔ krɛdɛɛ lɛ, yɛ bei komɛi amli lɛ amɛsɛɛ tsɛɔ bɔ ni sa ni baaha anyɛ aha asafoi babaoo ni ebua amɛhe naa lɛ niyenii, shihilɛ ko ni Yesu kɛ niyenii ni fa babaoo ha yɛ naakpɛɛ gbɛ nɔ lɛ. (Mat. 14:14-21; 15:29-38) Bei pii lɛ Kristo buaa ekaselɔi lɛ anaa ni etsɔɔ amɛ mumɔŋ nii dani etsuɔ amɛ kɛyaa ni amɛyashiɛ Maŋtsɛyeli lɛ he sane.
5 Yɛ egbele sɛɛ lɛ, esɛɛnyiɛlɔi lɛ tee nɔ amɛkpe kutuu, taakɛ eji yɛ Pentekoste 33 Ŋ.B. gbi lɛ nɔ lɛ. (Bɔf. 2:1-4) Bei komɛi lɛ, “mɛi babaoo” bakpeɔ yɛ amɛ henaabuamɔ hei lɛ. (Bɔf. 11:26) Yɛ Yesu shitee lɛ sɛɛ lɛ, etsɔɔ kpeei ni yɔɔ miishɛɛ tamɔ nɛkɛ ni amɛ yibɔ aaashɛ sɛɛnyiɛlɔi 500 lɛ anii yɛ Galilea, ni ekɛ gbɛtsɔɔmɔ ni he hiaa lɛ ha amɛ.—1 Kor. 15:6; Mat. 28:19, 20.
6 Ŋmɛnɛŋmɛnɛ Beaŋ Kpeei: Taakɛ Yehowa to gbɛjianɔ kɛha ewebii ni yɔɔ yɛ blema beaŋ koni amɛye gbijuji ni amɛkpe yɛ kpee hei ni yɔɔ krɔŋkrɔŋ, ni nɔ ni jɛ mli kɛba ji mumɔŋ jɔɔmɔi lɛ, nakai nɔŋŋ etoɔ he gbɛjianɔ ehaa ewebii ŋmɛnɛ. Nakai hiamɔ nii lɛ nɔŋŋ yɔɔ kɛhaa Kristofoi koni amɛbabua amɛhe naa yɛ kpeei ni tswaa mɔ emaa shi ni yɔɔ miishɛɛ lɛ ashishi. Shii etɛ yɛ afi fɛɛ afi mli lɛ, Yehowa Odasefoi a-Nɔyeli Kuu lɛ toɔ mumɔŋ hejɔɔmɔi ahe gbɛjianɔ yɛ kpokpai anɔ kpeei, kpee krɛdɛɛ gbii, kɛ kpokpaa wulu nɔ kpeei ni amɛkwɛɔ nɔ lɛ mli.
7 Yehowa webii ni yɔɔ ŋmɛnɛ lɛ tsɔɔ hiɛsɔɔ ni mli kwɔ kɛhaa hegbɛi ni anaa kɛhaa naanyobɔɔ ni tswaa mɔ emaa shi nɛɛ. Amɛŋmɛɛɛ gbɛ ni amɛ diɛŋtsɛ amɛnaagbai atsi amɛnaa ni amɛkaya. Shi moŋ, amɛkɛ miishɛɛ yaa, ni amɛhereɔ mɛi heei amɛwoɔ amɛ kuu lɛ mli. (1973 Yearbook, bf. 165 kk. 9 kɛyashi bf. 166 kk. 2) Enɛ sa yijiemɔ waa diɛŋtsɛ!
8 Shi kɛlɛ, Asafo lɛ nine yaa nɔ eshɛɔ amaniɛbɔi anɔ akɛ nɔ ni nyɛmimɛi komɛi fɔɔ feemɔ ji henaabuamɔi wuji nɛɛ ni amɛkwaa. Asafoi komɛi amli bii fioo ko yadamɔɔ amɛnajiaŋ, yɛ be mli ni weku yitsei komɛi yaa ni amɛshiɔ weku lɛ yɛ sɛɛ. Yɛ shihilɛi komɛi amli lɛ, onukpai lɛ ateŋ mɔ ko kwraa bɛ jɛmɛ. Ani oji mɛi ni feɔ amɛnii yɛ nɛkɛ gbɛ nɔ lɛ ateŋ mɔ ko? Kɛ nakai ni lɛ, ani onaagba lɛ ji shika he naagba? Yehowa wo Israelbii lɛ hewalɛ ni amɛkɛ shika ato kɛha amɛ gbijuji ni baa yɛ bei komɛi amli lɛ. (5 Mose 14:22-27) Odasefoi babaoo yɛ ŋmɛnɛ ni amɛnyiɛɔ shishitoo mla nɛɛ sɛɛ kɛtsɔɔ amɛ gbɛhamɔi ahe gbɛjianɔ ni amɛtoɔ, kɛ shika ni amɛkɛtoɔ koni weku muu lɛ fɛɛ anyɛ aya kpeei lɛ nɔ. Yɛ gbɛ kroko nɔ lɛ, ani obaanyɛ oye obua nyɛmi ko ni ehia lɛ lɛ koni eya eko kɛtsɔ tsɔne mlitamɔ loo niyenii he shika ni okɛaaye obua lɛ lɛ nɔ?—Gal. 6:10.
9 Mɛi komɛi eyaaa yɛ hiɛsɔɔ ni amɛbɛ kɛha nɛkɛ gbɛjianɔ kpakpai ni atoɔ nɛɛ hewɔ. Bɔfo Paulo na akɛ ehe miihia ni ekɛ nɛkɛ wiemɔi nɛɛ afata ŋaawoo ni ekɛha yɛ kpeeyaa he lɛ he, akɛ: “Ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Heb. 10:25) Akɛni Satan ewo Yehowa webii ni etutuaa amɛ lɛ mli wu hewɔ lɛ, nyɛhaa wɔtea shi wɔwoa nibii fɛɛ ni baatsi wɔnaa kɛaajɛ Yehowa mumɔŋ nibii amli ŋɔɔmɔ ni wɔɔna kɛmɔ shi, yɛ teokrase henaabuamɔi lɛ fɛɛ mli lɛ.—Kpoj. 12:7-17; 2 Pet. 3:7; Lala 133:1, 3.