Te Obi lɛ Mumɔŋ Shidaamɔ Yɔɔ Ha Tɛŋŋ yɛ Skul?
1 Skul nɔkwɛlɔi le Yehowa Odasefoi abii yɛ amɛ jeŋba kpakpa ni akɛtsɔseɔ amɛ kɛ mɔdɛŋ ni amɛbɔɔ waa lɛ hewɔ. Nyɛ ko ni ji Kristofonyo lɛ mii shɛ ehe akɛ enine shɛ wolo ni nyiɛ sɛɛ nɛɛ nɔ kɛjɛ ebiyoo lɛ tsɔɔlɔ ŋɔɔ: ‘Etamɔ nɔ ni obiyoo bibioo lɛ ji obalayoo ko ni baa ejeŋ fe mɔ fɛɛ mɔ ni esubaŋ hi jogbaŋŋ ni mikɛkpe pɛŋ yɛ biɛ loo yɛ he kroko.” Yijiemɔ ni tamɔ nɛkɛ lɛ jeee hiɛnyam kɛha fɔlɔi edasefoi lɛ pɛ shi ekɛ yijiemɔ hu bahaa Yehowa. (1 Pet. 2:12) Shi, enɛ etsɔɔɔ akɛ wɔbii ni yaa skul lɛ kɛ naagbai ekpeee yɛ skul.
2 Yɛ maŋ saji ni akɛ he wooo mli he saji ni amɛkɛkpeɔ sɛɛ lɛ, jeee be fɛɛ be skul nɔkwɛlɔi ŋmɛɔ gbekɛbii Kristofoi agbɛ ni amɛkɛ asafoi ni yɔɔ amɛ akutso lɛ mli,ni kpeɔ yɛ skul lɛ sɛɛ lɛ abɔ. Skul nɔkwɛlɔi komɛi ŋmɛɔ edasefoi nikaselɔi agbɛ ni amɛya asafoŋ kpeei shikome pɛ yɛ nyɔŋ kome mli.Mɛi krokomɛi yɛ ni amɛŋmɛɛɛ gbɛ kwraa ni akɛ he awo Kristofoi anitsumɔi ni yaa nɔ yɛ skul lɛ sɛɛ lɛ mli.Nɔ ni ejɛ mli eba ji akɛ obalahii kɛ obalayei bibii ni agbaa amɛnaa nɛɛ kɛ amɛhe wooo asafoŋ kpeei loo shiɛmɔyaa mli yɛ skul nitsɔɔmɔ be kakadaŋŋ muu lɛ fɛɛ mli. No hewɔ lɛ, obalahii kɛ obalayei bibii komɛi bafeɔ shiɛlɔi ni jeee nyɔŋ fɛɛ nyɔŋ nɔ amɛbuɔ amɛshiɛmɔ nitsumɔ he akɔntaa, yɛ be mli ni mɛi krokomɛi laajeɔ amɛ mumɔŋ shidaamɔ po. Ayɔse hu akɛ, obalahii kɛ obalayei bibii komɛi haaa nyɛmimɛi ni yɔɔ jɛmɛ lɛ ale amɛ koni akɛ yelikɛbuamɔ ni he hiaa lɛ aha amɛ, titri lɛ yɛ tipɛŋfoi anɔnyɛɛ hewɔ. Mɛni gbekɛbii nɛɛ afɔlɔi baanyɛ afee yɛ shihilɛi ni tamɔ nɛkɛ mli?
3 Yɛ klɛŋklɛŋ nitsɔɔmɔ be kakadaŋŋ lɛ shishijee mli lɛ, fɔlɔi baanyɛ atsɔ ŋaa gbɛ nɔ abi koni skul nɔkwɛlɔi lɛ aŋmɛ amɛbii agbɛ koni amɛna teokrase gbɛjianɔtoi amli gbɛfaŋnɔ. Bei pii lɛ, kɛ fɔlɔi lɛ diɛŋtsɛ bi he sane lɛ, ebafeɔ mlɛo akɛ aaakpɛlɛ hegbɛ ni tamɔ nɛkɛ ni abiɔ lɛ nɔ. No sɛɛ lɛ, esa akɛ fɔlɔi lɛ ayana onukpai ni yɔɔ jɛmɛ asafo lɛ mli lɛ yɛ he ni skul lɛ yɔɔ lɛ, koni aye abua obalahii kɛ obalayei bibii ni tamɔ nɛkɛ lɛ daa.Ekolɛ ebaahi po akɛ aaanyɛ abi gbɛ koni afee kpeei lɛ ekomɛi yɛ skul lɛ mli aha nikaselɔi lɛ. Gbekɛbii Odasefoi diɛŋtsɛ ebua amɛhe naa ni amɛfee ekome kɛbi enɛ ni yɛ no hewɔ lɛ, aŋmɛ amɛ gbɛ yɛ nɛkɛ gbɛ nɔ. Shi kɛlɛ, eji fɔlɔi agbɛnaa nii titri akɛ amɛbɛŋkɛ skul nɔkwɛlɔi lɛ yɛ saji ni tamɔ nɛkɛ mli. Ebafeɔ sɛɛnamɔ kɛì yɛ be kɛ bei amli lɛ fɔlɔi yasaraa amɛbii yɛ skul, koni amɛle bɔ ni amɛmumɔŋ shidaamɔ yɔɔ ha kɛfata nibii krokomɛi ahe. Enɛ maa bɔ ni ehe hiaa akɛ fɔlɔi aaaha amɛbii aya skul ni ayɔɔ wɔɔhe yɛ jɛmɛ, ni bɛŋkɛ shiÞagbɛ lɛ nɔ mi, kɛ eeehi.
4 Esa akɛ gbekɛbii Kristofoi lɛ ahiɛ ahi amɛhe nɔ ni amɛjɔɔ amɛha Yehowa lɛ nɔ, ni amɛkɛ hegbɛ ni akɛhaa amɛ akɛ amɛya kpeei lɛ eko kwraa akatsu nii yɛ gbɛ fɔŋ nɔ. Esa akɛ amɛkɛ hegbɛi fɛɛ ni amɛaana lɛ atsu nii koni amɛkɛfa amɛ hemɔkɛyeli lɛ he yɛ faŋŋ mli. (1 Pet. 3:15; okɛto 2 Maŋtsɛmɛi 5:1-14 he.) Kɛ fɔlɔi, skul gbɛkɛbii, kɛ onukpai ni yɔɔ jɛmɛ lɛ fɛɛ tsu nii yɛ ekomefeemɔ mli lɛ, abaanyɛ aye abua gbekɛbii Odasefoi lɛ ni amɛka he amɛhe awa yɛ mumɔŋ kɛ amɛshi shia kɛtee shɔŋŋ po.—Dan. 1:3, 4, 8-19.