Ha Oniiashikpamɔi Awo Mɛi Krokomɛi Hewalɛ
“Bɔ ni nuhɔ̃ɔ yɔɔ ha susuma ni kumai yeɔ lɛ lɛ, nakai ji sanekpakpa ni akɛjɛ maŋsɛɛ shɔŋŋ lɛ.” Kwɛ bɔ ni wiemɔi nɛɛ ni anaa yɛ Abɛi 25:25 lɛ ji anɔkwale ha! Ani wɔ fɛɛ wɔnáaa wɔnyɛmimɛi aniiashikpamɔi ni woɔ hemɔkɛyeli hewalɛ ni wɔnuɔ loo wɔkaneɔ lɛ ahe miishɛɛ? Ani niiashikpamɔi ni tamɔ nakai wooo wɔhemɔkɛyeli hewalɛ?—Rom. 1:8-12.
Eji anɔkwale akɛ, niiashikpamɔi ni yɔɔ 1998 Yearbook lɛ mli lɛ eye ebua bo, ni ona gbɛ̀i krokomɛi anɔ ni oootsɔ oya hiɛ yɛ osɔɔmɔ nitsumɔ lɛ mli. Te onu he oha tɛŋŋ beni okane gbekɛbii ni ‘jieɔ Yehowa gbɛi lɛ yi’ lɛ aniiashikpamɔi lɛ? (Baafai 14-16) Ani nɔ ni jɛ odase ni aye yɛ taksi tsɔne ko (baafa 53) kɛ lɛlɛ ko mli (baafa 64) ba lɛ esaaa otsui he?
Ani oná niiashikpamɔ kpakpa ko ni baanyɛ awo mɛi krokomɛi hewalɛ? Ekolɛ onyɛ oye mɔ ko ni tsutsu ko lɛ esumɔɔɔ ni eboɔ Yehowa Odasefoi atoi kwraa lɛ nɔ kunim. Aloo ekolɛ, obɔ mɔdɛŋ okɛ gbɛ hee ko ni anyɛɔ atsɔɔ nɔ ayeɔ odase etsu nii ni ewo yibii kpakpai. Ani Yehowa eye ebua bo ni odamɔ shihilɛ ko ni naa wa waa naa yɛ omanyeyeli mli? Ani oyɛ niiashikpamɔ ko ni tsɔɔ faŋŋ akɛ Yehowa mumɔ lɛ nyiɛ ohiɛ yɛ be pɔtɛɛ ko mli kɛtee mɔ ko ŋɔɔ ni okɛ lɛ yawie? Enɛɛmɛi kɛ niiashikpamɔi krokomɛi ni oyɔɔ lɛ baanyɛ afee nɔ ni he hiaa mɛi krokomɛi ni baawo amɛ hewalɛ. (Heb. 10:24, 25; Fil. 2:1, 2, 4) Mɛni obaanyɛ ofee koni mɛi krokomɛi aná oniiashikpamɔi lɛ ahe sɛɛ?
Esa akɛ niiashikpamɔ lɛ ajie oti ko kpo. Gbaa wɔ nɔ ni jɛ mli ba. Ani eha anyɛ aje Biblia mli nikasemɔ shishi? Ani mɔ lɛ ebatsɔ shiɛlɔ bianɛ? Ani abaptisi lɛ? Aloo eji nɔ ko ni kɔɔ mɔ ko ni ajie lɛ kɛjɛ gbalamlitsemɔ, dãatɔɔ, asɔshwɛmɔ, loo mɔ hegbee po mli? Ŋmalamɔ fɛɛ fɛfɛo ni okɛmaje nitsumɔhe nine lɛ ɔfis lɛ kɛtsɔ nyɛ asafo lɛ mli onukpai lɛ anɔ. Kɛji akɛ ewa kɛha bo akɛ oooŋma lɛ, ekolɛ onukpai lɛ ateŋ mɔ kome aloo nyɛmi nuu loo nyɛmi yoo ko baanyɛ aŋma aha bo.
Nyɛ asafo lɛ mli Sɔɔmɔ Ajinafoi Akuu lɛ mlinyo ko baakwɛ oniiashikpamɔ lɛ, ni lɛ hu ekɛ enine baawo shishi, ni ekɛmaje wɔ. Eeenyɛ efee akɛ, abaaŋma oniiashikpamɔ lɛ awo woji amli. Kaaha hegbɛ fɛfɛo ni baatsɔ hewalɛwoo jɛɛhe kɛha mɛi krokomɛi lɛ miiŋmɛɛ bo.