Kpee Asa He Hiamɔ Nii

Lalatsɛ lɛ ná miishɛɛ babaoo beni afɔ̃ lɛ nine koni ebajá yɛ Nyɔŋmɔ jálɔi agwabɔɔ lɛ mli lɛ. (Lala 84:​12, 13Ga Bible) Nyɔŋmɔ webii ni yɔɔ ŋmɛnɛ lɛ hu yɛ bulɛ ni mli kwɔ nakai nɔŋŋ yɛ ejamɔhe lɛ he. Anaa enɛ yɛ mɔdɛŋ ni amɛbɔɔ koni amɛná Maŋtsɛyeli Asai kɛha henaabuamɔi bibii kɛ Kpeei Asai kɛha henaabuamɔi wuji lɛ mli.

Eji nɔ ni yɔɔ miishɛɛ akɛ wɔɔyɔse akɛ kpokpai babaoo miikpɛlɛ hewalɛwoo akɛ atao hei ni dara kɛha kpeei yɛ hei ni asai wuji ni ahaiɔ lɛ eko bɛ loo amɛjara wa lɛ mli lɛ nɔ. Enɛ sa yijiemɔ.

Yɛ be mli ni wɔhiɛ sɔɔ ŋaawoo akɛ wɔna kpeehei babaoo ni bɛŋkɛ nyɛmimɛi lɛ, esaaa akɛ wɔkuɔ wɔhiɛ wɔshwieɔ shika ni akɛaama Kpeei Asai lɛ nɔ. Yɛ shika lɛ he akɔntaabuu mli lɛ, ana akɛ ebafeŋ nɔ ni hi akɛ aaama Kpee Asa yɛ kpokpaa fɛɛ kpokpaa nɔ ejaakɛ nyɛmimɛi lɛ bɛ shika nyɛmɔ ni amɛkɛaafee nakai.​—⁠Luka 14:⁠28.

Yɛ nɔ ni yɔɔ ŋwɛigbɛ nɛɛ hewɔ lɛ, ebaafee nɔ ni hi ni nilee yɔɔ mli babaoo kɛ́ kpokpai babaoo fee ekome ni amɛma Kpee Asa kome yɛ he ni kpokpai lɛ fɛɛ ni ekɔɔ amɛhe lɛ baanyɛ aba kpeei yɛ mli. Eji anɔkwale akɛ, anyɛŋ atsu ŋaawoo ni akɛha yɛ ŋwɛigbɛ nɛɛ he nii yɛ hei fɛɛ. Kpokpai lɛ ekomɛi dara aahu akɛ esa akɛ ajara kpee lɛ mli A kɛ B. Shishinumɔ yɛ he akɛ ekolɛ nɛkɛ kpokpai nɛɛ nyɛŋ afata kpokpai krokomɛi ahe. Ni kɛlɛ, yiŋtoo lɛ ji akɛ koni wɔlɛte bɔ ni wɔkɛ shika kɛ nibii fioo ni wɔnine shɛɔ nɔ lɛ tsuɔ nii wɔhaa lɛ he bɔ ni wɔɔnyɛ, ní yɛ nakai beaŋ nɔŋŋ lɛ wɔma Kpeei Asai yɛ oyaiyeli mli.