Nɔkwɛlɔi ni Nyiɛɔ Hiɛ—Onukpai Asɛinɔtalɔ Lɛ
1 Eji gbɛnaa nii ni hiɛdɔɔ yɔɔ mli akɛ aaasɔmɔ yɛ asafo lɛ mli akɛ nɔkwɛlɔ. (Bɔf. 20:28; 1 Tim. 3:1) Enɛ ji saji ni baatsara nɔ, ni baatsɔɔ Kristofoi onukpai anitsumɔi srɔtoi lɛ amli lɛ ateŋ klɛŋklɛŋ nɔ̃, bɔni afee ni wɔ fɛɛ wɔnyɛ wɔná hiɛsɔɔ wɔha nitsumɔ ni he hiaa ni amɛtsuɔ amɛhaa wɔ lɛ.
2 Asafo lɛ halaa onukpai asɛinɔtalɔ lɛ koni esɔmɔ daa. Yɛ be mli ni onukpai asɛinɔtalɔ lɛ kwɛɔ koni atsu saji ahe nii pɛpɛɛpɛ lɛ, enɛ yeɔ ebuaa onukpai koni amɛtsu nitsumɔi ni atu awo amɛdɛŋ lɛ jogbaŋŋ. (Our Ministry, bf. 42) Mɛni fata enɛ he?
3 Onukpai asɛinɔtalɔ lɛ nine shɛɔ woji ni aŋmalaa asafo lɛ nɔ ni ekɛhaa woloŋmalɔ lɛ amrɔ nɔŋŋ koni etsu he nii. Be mli ni onukpai asɛinɔtalɔ lɛ toɔ onukpai akpeei ahe gbɛjianɔ lɛ, ebiɔ onukpai lɛ asusumɔi yɛ saji ni he hiaa akɛ asusu he lɛ he, ni eŋmalaa ewoɔ wolo nɔ. Esɔmɔɔ akɛ sɛinɔtalɔ hu yɛ onukpai akpeei ashishi. Kɛ akpɛ yiŋ yɛ saji ahe lɛ, ekwɛɔ koni akɛtsu nii jogbaŋŋ. Ekwɛɔ Sɔɔmɔ Kpee lɛ he gbɛjianɔtoo nɔ, ni ekwɛɔ maŋshiɛmɔi ahe nitsumɔ nɔ. Ekpɛlɛɔ adafitswai fɛɛ ni akɛhaa asafo lɛ nɔ, ekɛ hegbɛ haa koni awo nibii fɛɛ ni akɛtsuɔ nii daa lɛ he shika ni afiteɔ lɛ he nyɔmɔ, ni ekwɛɔ koni akwɛ asafo lɛ shika mli daa nyɔji etɛ.
4 Ákɛ sɛinɔtalɔ lɛ, onukpai asɛinɔtalɔ lɛ kwɛɔ koni Asafoŋ Sɔɔmɔ Ajinafoi Akuu lɛ nitsumɔ lɛ aya nɔ pɛpɛɛpɛ. Kɛ Biblia mli nikaselɔ ko bi koni akpɛlɛ enɔ akɛ shiɛlɔ ni abaptisiko lɛ loo kɛ shiɛlɔ ni abaptisiko lɛ lɛ miisumɔ ni abaptisi lɛ lɛ, onukpai asɛinɔtalɔ lɛ toɔ gbɛjianɔ koni onukpai kɛ lɛ akpe. Onukpai asɛinɔtalɔ lɛ hu nyiɛɔ hiɛ kɛtoɔ kpokpaa nɔkwɛlɔ lɛ saramɔ he gbɛjianɔ bɔni afee ni asafo lɛ anyɛ aná otsi krɛdɛɛ lɛ mli nitsumɔ he sɛɛ jogbaŋŋ.
5 Onukpai asɛinɔtalɔ lɛ nitsumɔi fá ni eyɛ srɔtoi. Be mli ni ekɛ heshibaa tsuɔ egbɛnaa nii ahe nii ‘kɛ mɔdɛŋbɔɔ’ lɛ, wɔ fɛɛ wɔbaanyɛ wɔtsu wɔgbɛfaŋnɔ kɛtsɔ ekome ni wɔkɛ onukpai lɛ aaafee lɛ nɔ. (Rom. 12:8) Kɛ ‘wɔfee toiboo’ ni ‘wɔba wɔhe shi’ wɔha mɛi ni nyiɛɔ hiɛ yɛ wɔteŋ lɛ, amɛbaanyɛ amɛkɛ miishɛɛ babaoo diɛŋtsɛ atsu amɛnitsumɔ lɛ.—Heb. 13:17.