New World Translation lɛ Kɛhamɔ
1 “Esa akɛ mɔ fɛɛ mɔ aná New World [Translation] lɛ eko. Ekanyaa mɔ ni etamɔ wala, ni ehaa kanelɔ lɛ susuɔ nii ahe ni ekaseɔ nii. Ejeee Jeŋ Nilelɔi ni Wieɔ Shiɔ Biblia lɛ anitsumɔ, shi moŋ eji woloŋlelɔi ni kɛ woo haa Nyɔŋmɔ kɛ E-Wiemɔ lɛ anitsumɔ.” Nɛkɛ ji bɔ ni Hebri kɛ Hela saji ahe wielɔ ko ni ale jogbaŋŋ lɛ wie. Wɔkɛ lɛ kpãa gbee. Te wɔɔfee tɛŋŋ wɔnyɛ wɔye wɔbua mɛi krokomɛi ni amɛná hiɛsɔɔ ni tamɔ nakai nɔŋŋ kɛha New World Translation lɛ yɛ be mli ni wɔkɛ no kɛ Nilee wolo lɛ haa yɛ December mli lɛ?
2 Ekolɛ, mɛi komɛi baahere nɔ akɛ, “Miyɛ Biblia lɛ eko momo. Ekroko he ehiaaa mi.” Wɔnitsumɔ ji ni wɔye wɔbua amɛ ni amɛna akɛ, New World Translation lɛ jeee Biblia kroko ko kɛkɛ. Eji shishitsɔɔmɔ diɛŋtsɛ yɛ ŋmɛnɛŋmɛnɛ beaŋ wiemɔ mli ni baa shishinumɔ ni yɔɔ shishijee niŋmaa lɛ mli lɛ yi yɛ anɔkwale mli. Abaanyɛ afee bɔ ni enɔ kwɔ ha lɛ he nɔkwɛmɔnɔ kome kɛtsɔ bɔ ni akɛ wiemɔi tamɔ “shambles” (loo jara nɔ) (King James Version) kɛ “meat market” (loo jara nɔ) (New World Translation) tsu nii yɛ 1 Korintobii 10:25 lɛ ni akɛaato he lɛ nɔ.
3 Shi kɛlɛ, mɛi fioo ko kaneɔ Biblia lɛ, ni mɛi fioo pɛ nuɔ eshishitoo mlai kɛha daa gbi shihilɛ lɛ shishi. Ehe miihia ni amɛle akɛ Nyɔŋmɔ Wiemɔ lɛ baanyɛ aná amɛshihilɛ nɔ hewalɛ kɛya naanɔ, ni ákɛ emli ŋaawoo ni kɔɔ anɔkwayeli, jeŋba kpakpa, kɛ weku shihilɛ he lɛ kɛ nitsumɔ baanyɛ aye abua amɛ koni amɛdamɔ naagbai anaa. Mɛɛ gbɛ nɔ abaatsɔ atsu enɛ he nii?
4 Shiɛmɔ Wiemɔ ni Atsɔɔ: “Ani obaakpɛlɛ nɔ akɛ, yɛ ŋmɛnɛŋmɛnɛ beaŋ jeŋba kpakpai ni tsakeɔ oyayaayai kɛ bɔ ni nɔmimaa bɛ wɔsɛɛ be shihilɛ he lɛ hewɔ lɛ, shihilɛ mli gbɛtsɔɔmɔ ni anyɛɔ akɛ he fɔ̃ɔ nɔ he miihia wɔ? [Ŋmɛɛ gbɛ ni ewie.] Eyɛ mli akɛ eji wolo ní etsɛ fe fɛɛ moŋ, shi Biblia lɛ kɛ ŋaawoo ni anyɛɔ atsuɔ he nii haa yɛ ŋmɛnɛŋmɛnɛ beaŋ shihilɛ kɛ weku shihilɛ ni yɔɔ miishɛɛ he.” Agbɛnɛ gbelemɔ Nilee wolo lɛ yitso 2, ni okane kuku 10 lɛ kɛ klɛŋklɛŋ sane ni yɔɔ kuku 11 lɛ, ni okɛ 2 Timoteo 3:16, 17 afata he. Kɛ ajie miishɛɛ kpo lɛ, okɛ Nilee wolo lɛ aha, ní otsɔɔ wɔ shia Biblia mli nikasemɔ he gbɛjianɔtoo ni aheee nɔ ko lɛ mli, ni okɛ New World Translation lɛ aha. Kɛ onuɔ he akɛ ehi akɛ oooje nikasemɔ shishi yɛ Taoɔ wolo bibioo lɛ mli lɛ, obaanyɛ ofee nakai. Obaanyɛ ona hiɛkpamɔ wiemɔi krokomɛi ni sa lɛ yɛ Reasoning wolo lɛ mli yɛ baafai 9-15.
5 Nyɛhaa wɔjiea hiɛsɔɔ kpo kɛha New World Translation ni nɔ bɛ lɛ. Wɔbaanyɛ wɔfee enɛ kɛtsɔ ekãa ni wɔkɛaaha yɛ December mli lɛ nɔ.