Hegbɛ ni Gbekɛbii Anine Baanyɛ Ashɛ Nɔ
1 Mɛi babaoo ni ji fɔlɔi amrɔ nɛɛ kɛ miishɛɛ kaiɔ hegbɛ ni amɛná mli ŋɔɔmɔ beni amɛji gbekɛbii ni daraa yɛ anɔkwale lɛ mli lɛ—Woji Tɛtrɛbii Ajaa Gbi nitsumɔ. Ato nakai nitsumɔ lɛ he gbɛjianɔ awo asafoi fɛɛ amli yɛ afi 1949. Ehe bahia ni mɔ fɛɛ mɔ kɛ ejwɛŋmɔ ama Buu-Mɔɔ kɛ Awake! lɛ jaa nɔ gbi kome yɛ otsi mli yɛ gbɛjegbɛi anɔ, kɛjɛ shia kɛ shia, yɛ shwapoi anaa, kɛ gbɛ̀i krokomɛi anɔ. Gbekɛbii ní amɛji shiɛlɔi titri ji mɛi ni kpa gbɛ akɛ amɛkɛ amɛhe aaawo nitsumɔ nɛɛ mli ejaakɛ eha amɛná hegbɛ koni amɛkɛ amɛhe awo nitsumɔ ni onukpai ni yɔɔ amɛsafo lɛ mli lɛ kɛ amɛhe woɔ mli lɛ nɔŋŋ mli. Ani enɛ ji anɔkwale yɛ ogbɛfaŋ beni oji gbekɛ lɛ?
2 Okɛ Obii lɛ Afata He: Gbekɛbii ni darako kwraa ni efeko klalo akɛ amɛaaje Ŋmalɛ naa sanegbaa shishi yɛ shinaa naa lɛ baanyɛ amɛkɛ woji tɛtrɛbii aha lolo. Ebaabi ni akase shiɛmɔ wiemɔ kuku ko kɛkɛ ni emli wiemɔi ni faaa lɛ asɛɛ kɛlɛɛɛ. Sane fioo ko ni awieɔ, ekolɛ nɔ ni kɔɔ mfoniri ni yɔɔ sɛɛ lɛ he lɛ baanyɛ afee nɔ ni fá. Shiatsɛmɛi babaoo heɔ woji lɛ kɛjɛɔ wɔbii lɛ adɛŋ amrɔ nɔŋŋ, bei pii lɛ amɛkɛ miishɛɛ wieɔ anɔkwa ni oblahii kɛ oblayei bibii nɛɛ yeɔ kɛ subaŋ kpakpa ni amɛjieɔ lɛ kpo lɛ he. Enɛ ji sɔɔmɔ ni gbekɛbii lɛ baanyɛ amɛkɛ amɛhe awo mli jogbaŋŋ diɛŋtsɛ, kɛ́ akɛ yelikɛbuamɔ fioo ko ha amɛ, ni amɛbaafata he koni akɛfĩ Maŋtsɛyeli shɛɛ sane lɛ gbɛɛ-kɛ-shwãmɔ lɛ sɛɛ jogbaŋŋ kɛmɔ shi. Shi yɛ anɔkwale mli lɛ, be mli ni gbekɛbii lɛ daraa lɛ, amɛfɔlɔi baasumɔ ni amɛye amɛbua amɛ koni amɛya amɛhiɛ be fɛɛ be koni amɛná hesaai kɛha odaseyeli nitsumɔ lɛ.
3 Manuel bɔi shinaai anaa shiɛmɔ nitsumɔ lɛ beni eye afii etɛ. Efɔlɔi tsɔɔ lɛ koni ekase shiɛmɔ wiemɔ kuku ko ewo eyitsoŋ. Efataa amɛhe ni ekɛ ekãa shiɛɔ, ni ehaa woji tɛtrɛbii, woji bibii kɛ dɛhiɛmɔ woji babaoo. Eyeɔ trukaa odase hu. Be ko beni efɔlɔi kɛ lɛ tee shwɛmɔhe ko koni amɛyajie amɛhiɛtserɛ lɛ, ekɛ hegbɛ lɛ tsu nii ni eha mɛi krokomɛi ni yɔɔ jɛmɛ lɛ dɛhiɛmɔ woji komɛi. Eyɛ mli akɛ Manuel edako kwraa lolo moŋ, shi ekãa ni eyɔɔ kɛha shiɛmɔ nitsumɔ lɛ ji hewalɛwoo diɛŋtsɛ jɛɛhe kɛha efɔlɔi lɛ kɛ asafo muu lɛ fɛɛ.—Abɛi 22:6.
4 Akadi Hɔɔ fɛɛ Hɔɔ akɛ “Woji Tɛtrɛbii Ajaa Gbi” yɛ 2000 Calendar of Jehovah’s Witnesses lɛ nɔ. Fɔlɔi, wɔmiiwo nyɛ hewalɛ koni nyɛná nitsumɔ nɛɛ he miishɛɛ ekoŋŋ, ní nyɛye nyɛbua nyɛbii lɛ koni amɛkɛ amɛhe awo sɔɔmɔ hegbɛ nɛɛ mli daa bɔ ni amɛaanyɛ.