Sanebimɔ He

◼ Namɔ esa akɛ esɔle yɛ asafoŋ kpeei ashishi?

Asafoŋ sɔlemɔ ji wɔ jamɔ lɛ fã ko ni he hiaa. Mɛi krokomɛi anajiaŋ ní aaadamɔ yɛ Yehowa hiɛ lɛ ji hegbɛ ni jara wa kɛ gbɛnaa nii ni tsii. Yɛ bɔ ni ehe hiaa hewɔ lɛ, ehe miihia ni onukpai lɛ kɛ jwɛŋmɔ kpakpa atsu nii kɛ́ amɛmiihala nyɛmimɛi hii lɛ ateŋ mɔ ni sa akɛ esɔle yɛ kpeei ashishi lɛ. Esa akɛ nyɛmimɛi hii ni abaptisi amɛ ni damɔɔ asafo lɛ najiaŋ lɛ afee sɔɔlɔi Kristofoi ni edara yɛ mumɔŋ ni ale amɛ akɛ mɛi ni feɔ nɔkwɛmɔnɔ kpakpa ni yɔɔ bulɛ yɛ asafo lɛ mli. Esa akɛ amɛsɔlemɔ ni tsɔɔ jamɔ kɛ bulɛ lɛ ajie lɛ kpo akɛ wekukpaa kpakpa kã amɛ kɛ Yehowa Nyɔŋmɔ teŋ. Nikasemɔ ni ji “Praying Before Others With a Humble Heart” (Heshibaa Tsui ni Akɛaasɔle yɛ Mɛi Krokomɛi Ahiɛ) ni je kpo yɛ May 15, 1986 The Watchtower lɛ mli lɛ tsɔɔ shishitoo mlai ni he hiaa ni he baa sɛɛnamɔ waa kɛhaa mɛi ni damɔɔ asafo lɛ najiaŋ amɛsɔleɔ yɛ mɛi ahiɛ lɛ.

Onukpai lɛ halaŋ nyɛmi nuu ni ale lɛ akɛ mɔ ni mɛi ayiŋ feɔ amɛ kɔshikɔshi yɛ ejeŋba he loo ejeŋba tamɔ mɔ ni kɛ nii feɔ shwɛmɔshwɛmɔ lɛ ní esɔle. Ahalaŋ nyɛmi nuu ni nii esaaa ehiɛ loo esumɔɔ ni ekɛ mɛi ahiɛ sɔlemɔ atsu nii koni ekɛjie ekɛ mɔ ko teŋ mlifu kpo lɛ akɛ esɔle. (1 Tim. 2:8) Eyɛ mli akɛ nyɛmi nuu ni yeko afii nyɔŋmai enyɔ lɛ baanyɛ afee mɔ ni abaptisi lɛ moŋ, shi esa akɛ onukpai lɛ akwɛ koni amɛle kɛji mɔ lɛ eda yɛ mumɔŋ bɔ ni esa akɛ edamɔ asafo lɛ najiaŋ ní esɔle lo.—Bɔf. 16:1, 2.

Yɛ bei komɛi amli lɛ, ehe baahia ni nyɛmi yoo ni abaptisi lɛ lɛ asɔle yɛ kpeei kɛha shiɛmɔyaa lɛ shishi, kɛ́ nyɛmi nuu ni sa bɛ ni baadamɔ kuu lɛ najiaŋ asɔle. Ehe baahia ni ekɛ nɔ ko ni sa ahà eyi jogbaŋŋ. Kɛ eeenyɛ eba lɛ akɛ nyɛmi nuu ni sa bɛ kpeei kɛha shiɛmɔyaa lɛ shishi yɛ bei komɛi amli lɛ, no lɛ esa akɛ onukpai lɛ ahala nyɛmi yoo ko ni sa koni enyiɛ hiɛ.

Yɛ bei babaoo mli lɛ, mɔ ni feɔ sɛinɔtalɔ kɛhaa Maŋshiɛmɔ lɛ sɔleɔ kɛjeɔ shishi. Shi kɛlɛ, yɛ asafoŋ kpeei krokomɛi ashishi lɛ, kɛ́ nyɛmimɛi hii saŋŋ ni sa yɛ lɛ, abaanyɛ atsɛ mɔ ko ni esɔle kɛje shishi loo ni esɔle kɛkpa moŋ fe nɔ ni nyɛmi nuu ni gbeleɔ kpee lɛ aaasɔle loo fe nɔ ni mɔ ni akɛ naagbee nifeemɔ lɛ eha lɛ lɛ aaasɔle. Yɛ fɛɛ mli lɛ, esa akɛ aha nyɛmi nuu ni atsɛɔ lɛ koni ebasɔle yɛ asafoŋ kpee shishi lɛ ale kɛtsɔ hiɛ bɔni afee ni enyɛ esusu nɔ ni ebaakɛɛ lɛ he. Kɛkɛ lɛ ebaanyɛ esɔle sɔlemɔ ni yaa lɛ tɛ̃ɛ ni jɛ anɔkwayeli mli ni sa kɛha nakai kpee lɛ pɔtɛɛ.

Ehe ehiaaa ni sɔlemɔi ni tamɔ nakai lɛ feɔ kakadaŋŋ. Kɛ nyɛmi nuu sɔle yɛ mɛi ahiɛ lɛ, bei pii lɛ, abaanu esɔlemɔ lɛ shishi jogbaŋŋ kɛ́ edamɔ shi, koni ewó egbee nɔ bɔ ni sa, ní ewie kɛ naatselɛ lɛ. Enɛ baaha mɛi ni ebabua amɛhe naa lɛ fɛɛ anu sɔlemɔ lɛ, koni yɛ sɔlemɔ lɛ naagbee lɛ amɛjɛ amɛtsuiŋ amɛkɛɛ “Amen!”—1 Kron. 16:36; 1 Kor. 14:16.