‘Ba ni Obanyiɛ Misɛɛ’
1. Mɛɛ hegbɛ Asafoŋ Biblia Nikasemɔ lɛ baaha wɔná yɛ nyɔji ni kãmɔ wɔhiɛ lɛ mli?
1 Sanekpakpai ejwɛ ni wieɔ Yesu shihilɛ yɛ shikpɔŋ lɛ nɔ lɛ he lɛ haa wɔleɔ saji babaoo ni kɔɔ Nyɔŋmɔ Bi lɛ he. Akɛni esa akɛ Kristofoi ‘anyiɛ enanemaahei lɛ asɛɛ’ kpaakpa hewɔ lɛ, wɔbaasumɔ ni wɔsaa wɔhe ní wɔbo saji atoi jogbaŋŋ beni wɔkaseɔ ‘Ba ni Obanyiɛ Misɛɛ’ wolo lɛ yɛ Asafoŋ Biblia Nikasemɔ lɛ shishi kɛjɛ otsi ni jeɔ shishi March 1 lɛ. (1 Pet. 2:21; Mar. 10:21) Hei ni esa akɛ wɔkɛ hiɛdɔɔ asusu he ji Yesu shihilɛ gbɛ̀i ni baanyɛ awo wɔ hewalɛ yɛ shiɛmɔ nitsumɔ lɛ mli.
2. Mɛɛ gbɛ nɔ tsuishitoo he nɔkwɛmɔnɔ ni Yesu fee lɛ he baanyɛ aba sɛɛnamɔ kɛha wɔ?
2 Nɔkwɛmɔnɔ ni Yesu Fee: Ani okɛ mɔ ko ekpe yɛ shĩa kɛ shĩa shiɛmɔ nitsumɔ lɛ mli ní ehereee bo hiɛmɛɛ pɛŋ? Kɛ́ wɔkɛ shitee kɛwoo ni tamɔ nɛkɛ kpe lɛ, Yesu wiemɔi nɛɛ baa mli anɔkwale akɛ: “Kɛ́ amɛwa mi yi lɛ, amɛaawa nyɛ hu yi.” (Yoh. 15:20) Eji anɔkwale akɛ jeee shitee kɛwoo fɛɛ ji yiwaa. Shi fɛɛ mli lɛ, nyamɔ ni kã Yesu hiɛ lɛ ji nɔ ni ha enyɛ edamɔ kaai kɛ yiwaai srɔtoi fɛɛ naa lɛ. Wɔ hu wɔbaanyɛ wɔkɛfee oti ni ma wɔhiɛ akɛ wɔbaafee nibii ni baaha Yehowa akpɛlɛ wɔ nɔ ni ejɔɔ wɔnɔkwayeli lɛ nɔ. Enɛ baaye abua wɔ ‘koni ekaje wɔtsine ni wɔsusumai lɛ anijiaŋ miije wui.’ (Heb. 12:2, 3; Abɛi 27:11) Beni wɔmiaa wɔhiɛ yɛ shiɛmɔ nitsumɔ lɛ mli lɛ, wɔbaanyɛ wɔná hekɛnɔfɔɔ akɛ Kristo Yesu baafi wɔsɛɛ.—Mat. 28:20.
3. Mɛɛ gbɛ nɔ wɔbaanyɛ wɔtsɔ wɔkase bɔ ni Yesu tsu shiɛmɔ nitsumɔ lɛ?
3 ‘Ejaakɛ Enɛ Hewɔ Atsu Mi’: Maŋtsɛyeli shiɛmɔ nitsumɔ lɛ ji nitsumɔ titri ni Yesu tsu yɛ eshihilɛ mli. (Luka 4:43) Ejɛ esuɔmɔ mli ekɛ ehe ha kɛtsu shiɛmɔ nitsumɔ lɛ. Ekɛ hiɛdɔɔ tsu, ni be fɛɛ be lɛ, etaoɔ gbɛ̀i anɔ ni eeetsɔ ewie Maŋtsɛyeli lɛ he. Akɛni wɔji Yesu sɛɛnyiɛlɔi hewɔ lɛ, mɛni enɔkwɛmɔnɔ lɛ sɛɛ ni wɔnyiɛɔ lɛ haa wɔfeɔ? Beni wɔtsuɔ wɔdaa gbi shihilɛ mli nibii ahe nii lɛ, ani mɛi komɛi yɛ ni wɔbaanyɛ wɔkɛ amɛ agba sanekpakpa lɛ he sane? Eba akɛ Kristo suɔmɔ lɛ baatsirɛ wɔ ní wɔshiɛ sanekpakpa lɛ yɛ hei babaoo bɔ ni wɔɔnyɛ!—2 Kor. 5:14.
4. Mɛɛ gbɛ̀i anɔ wɔbaanyɛ wɔtsɔ wɔha wɔshiɛmɔ nitsumɔ lɛ amɔ̃ shi?
4 “Bɔ ni Gbɔmɔ Nɛɛ Wieɔ lɛ, Mɔ Ko Ewieko Nakai Dã”: Bɔ ni Yesu tsɔɔ nii eha lɛ ha etoibolɔi lɛ ahe jɔ̃ amɛhe. (Yoh. 7:46; Mat. 7:28, 29) Mɛni ha efee srɔto yɛ tsɔɔlɔi krokomɛi ahe lɛ? Esumɔɔ anɔkwalei ni etsɔɔ lɛ, ni esumɔɔ mɛi ni etsɔɔ amɛ nii lɛ, ni etsɔ gbɛ̀i srɔtoi anɔ etsɔɔ mɛi anii. Kɛ́ wɔkase Tsɔɔlɔ Kpele lɛ, wɔbaanyɛ wɔha wɔshiɛmɔ nitsumɔ lɛ amɔ̃ shi.—Luka 6:40.
5. Mɛɛ oti esa akɛ wɔkɛma wɔhiɛ beni wɔkaseɔ ‘Ba ni Obanyiɛ Misɛɛ’ wolo lɛ?
5 Enɛɛmɛi ji nibii krɛdɛɛi fioo komɛi ni wɔbaanyɛ wɔkase yɛ Yesu he. Mɛɛ nibii krɛdɛɛi krokomɛi hu obaanyɛ ona? Beni osusuɔ Yesu shihilɛ he yɛ Asafoŋ Biblia Nikasemɔ lɛ shishi lɛ, ha efee oti ni ma ohiɛ akɛ ‘obaale Kristo suɔmɔ’ lɛ kɛtsɔ ewiemɔi kɛ enifeemɔi ní oookase lɛ nɔ.—Efe. 3:19.