Wolo Ni Jɛ Nɔyeli Kuu lɛ Dɛŋ
Suɔmɔ Nyɛmimɛi Yehowa Odasefoi:
Gbii nɛɛ ji miishɛɛ gbii diɛŋtsɛ! Ni kwɛ bɔ ni enɛ haa wɔnáa miishɛɛ! Akɛ wɔnyɛmimɛi hii kɛ yei ni wɔsumɔɔ jogbaŋŋ lɛ, eŋɔɔ wɔnaa waa akɛ wɔkɛ nyɛ efee ekome, ni kɛ́ wɔɔkɛɛ lɛ, wɔkɛ “gbee kome” miitsu nii kɛmiiye Yehowa, wɔŋwɛi Tsɛ lɛ he odase ni fe fɛɛ.—Zef. 3:9; Yoh. 14:12.
Miishɛɛ ni wɔkɛsɔmɔɔ Yehowa lɛ etsɔɔɔ akɛ wɔkɛ shihilɛi ni mli wawai ekpeee. Yɛ sɔɔmɔ afi ni ho lɛ mli lɛ, nyɛteaŋ mɛi komɛi na nɔ waa yɛ shikpɔŋhosomɔi, nu afuai, lasuogbelei, kɛ adebɔɔ naa osharai krokomɛi ni yɔɔ gbeyei lɛ ahewɔ. (Mat. 24:7) Mɛi babaoo hu naa nɔ daa gbi yɛ gbɔlɛ kɛ hela ni haa mɔ gbɔjɔɔ fiofio lɛ hewɔ. Wɔ fɛɛ wɔkɛ “kɔ̃ɔmɔi” lɛ ni mli yaa nɔ ewoɔ wu lɛ miikpe. (Mat. 24:8) Yɛ maji babaoo tamɔ Armenia, Eritrea, kɛ South Korea anɔ lɛ, awo wɔnyɛmimɛi lɛ ateaŋ mɛi babaoo tsuŋ yɛ amɛhemɔkɛyeli lɛ hewɔ.—Mat. 24:9.
Mɛni yeɔ ebuaa wɔ ni wɔnijiaŋ ejeee wui yɛ shihilɛi ni mli wawai nɛɛ fɛɛ sɛɛ? Afi ŋmalɛ kɛha afi 2010 lɛ kaiɔ wɔ oti ko ni he hiaa waa, akɛ: ‘Suɔmɔ toɔ etsui shi yɛ nii fɛɛ mli. Suɔmɔ sɛɛ efooo gbi ko gbi ko.’ (1 Kor. 13:7, 8) Hɛɛ, suɔmɔ ni wɔyɔɔ kɛha wɔhe—kɛ agbɛnɛ hu suɔmɔ ni wɔyɔɔ kɛha Yehowa—lɛ wajeɔ wɔ ni wɔmiaa wɔhiɛ kɛkpeɔ shihilɛi ni mli wawai anaa.
Mɛi babaoo ni tsɛɔ amɛhe Kristofoi lɛ anaa kpɛɔ amɛhe kɛ́ amɛna bɔ ni wɔshiɛmɔ nitsumɔ lɛ shwereɔ waa, kɛ bɔ ni wɔyaa nɔ wɔtsuɔ nitsumɔ nɛɛ yɛ jeŋ fɛɛ lɛ. Eyɛ mli akɛ ekolɛ amɛkɛ wɔ kpaŋ gbee yɛ wɔhemɔkɛyelii kɛ tsɔɔmɔi lɛ ahe moŋ, shi amɛteaŋ mɛi komɛi po wieɔ akɛ, “Nyɛji mɛi ni tsuɔ nitsumɔ ni kulɛ esa akɛ wɔtsu lɛ!” Mɛni ji nɔ kome ni haa Yehowa Odasefoi yaa nɔ amɛshiɛɔ be fɛɛ be lɛ? Shi kome ekoŋŋ lɛ, no ji suɔmɔ. Taakɛ wɔŋwɛi Tsɛ lɛ ji lɛ, wɔsumɔɔɔ akɛ mɔ ko mɔ ko hiɛ kpataa. (2 Pet. 3:9) Anaa bɔ ni wɔshweɔ akɛ mɛi fɛɛ atsake amɛtsui lɛ yɛ shiɛlɔi ayibɔ hee ni fe fɛɛ ni ji 7,508,050 ni aná yɛ nyɛsɛɛ sɔɔmɔ afi lɛ mli lɛ mli. Mɛɛ jamɔ gbɛjianɔtoo kroko yɔɔ ni yɔɔ mɛi babaoo ni jɛɔ amɛsuɔmɔ mli amɛkɛ ekãa shiɛɔ ni awooo amɛ nyɔmɔ?
Bɔ ni Yesaia gbalɛ nɛɛ yaa nɔ enáa emlibaa lɛ woɔ wɔ hewalɛ waa, akɛ: “Aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ, ni aaawo enɔ fe gɔŋkpɔi lɛ; ni jeŋmaji fɛɛ aaaho kɛaaba he.” ( Yes. 2:2-4.) Mɛi 294,368 ni abaptisi amɛ yɛ nyɛsɛɛ sɔɔmɔ afi lɛ mli lɛ fata mɛi babaoo ni keɔ yuu kɛbaa Yehowa we lɛ ahe. Wɔmiihere mɛi ni jara wa nɛɛ atuu kɛmiiba wɔ-Kristofoi aweku lɛ mli. Eba akɛ, wɔ-Kristofoi asuɔmɔ lɛ aaatsirɛ wɔ ni wɔya nɔ wɔye wɔbua amɛ ni amɛnyɛ amɛwu amɛshi Satan Abonsam tutuamɔi lɛ.—1 Pet. 5:8, 9.
Yibɔ ni fe fɛɛ ni aná ni ji, 18,706,895 ni ba Kaimɔ lɛ yɛ Jufɔ, March 30, 2010 lɛ tsɔɔ akɛ, mɛi akpekpei abɔ yɛ lolo ni baanyɛ abafata wɔhe kɛjá Yehowa. Eŋɔɔ wɔnaa waa akɛ Yehowa kɛ nibii agbɛjianɔtoo fɔŋ nɛɛ naagbee lɛ bako! Dani nakai be lɛ aaashɛ lɛ, suɔmɔ ni wɔyɔɔ lɛ yeɔ ebuaa wɔ ni wɔfĩɔ shi.—2 Tes. 3:5.
“Hii Yehowa Masɛi Daa!” Kpokpaa Wulu nɔ Kpeei ni afee emli babaoo yɛ afi 2010 mli yɛ jeŋ fɛɛ lɛ waje wekukpaa ni kã wɔ kɛ wɔŋwɛi Tsɛ, Yehowa teŋ lɛ waa. Kwɛ bɔ ni lalatsɛ lɛ wiemɔi lɛ ji anɔkwale ha: “Ajɔɔ maŋ ni Yehowa ji e-Nyɔŋmɔ lɛ!” (Lala 144:15) Ekɔɔɔ he eko nɔ ni wɔkɛbaakpe wɔsɛɛ lɛ, wɔyɛ nɔmimaa akɛ kɛ́ Yehowa yɛ wɔmasɛi lɛ, wɔsheŋ nɔ ko nɔ ko gbeyei. (Lala 23:4) Etsɛŋ ni Yehowa baatsɔ e-Bi lɛ nɔ “efite abonsam nitsumɔi lɛ.” (1 Yoh. 3:8) Lɛɛlɛŋ, wɔmiishwe nakai gbi lɛ waa! Shi dani nakai gbi lɛ aaaba lɛ, wɔyɛ nitsumɔ babaoo ni esa akɛ wɔtsu.—1 Kor. 15:58.
Nyɛnáa nɔmimaa akɛ ‘wɔfɔ̃ko’ sɔlemɔ kɛ nyɛ hamɔ dã. (Rom. 1:9) No hewɔ lɛ, nyɛyaa nɔ “nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuŋtsɔ Yesu Kristo mɔbɔnalɛ lɛ gbɛ, koni nyɛná naanɔ wala.”—Yuda 21.
Wɔsumɔɔ nyɛ naakpa!
Nyɛnyɛmimɛi,
Yehowa Odasefoi a-Nɔyeli Kuu