Wɔbaaja Maŋtsɛyeli Sane ni Ji 38 lɛ yɛ December Mli!
1. Mɛɛ saji mɛi biɔ yɛ gbohii lɛ ahe, ni mɛɛ gbɛ nɔ abaatsɔ aha nakai sanebimɔi lɛ ahetoo yɛ December mli?
1 Gbele ji adesai fɛɛ ahenyɛlɔ, ekɔɔɔ he eko nɔ ni amɛheɔ amɛyeɔ. (1 Kor. 15:26) Mɛi babaoo biɔ akɛ, ‘Nɛgbɛ gbohii lɛ yɔɔ, ni ani abaanyɛ ana amɛ ekoŋŋ?’ Enɛ hewɔ lɛ, asafoi ni yɔɔ jeŋ fɛɛ lɛ kɛ nyɔɔŋ kome baaja Maŋtsɛyeli Sane ni Ji 38 lɛ, ni yitso ji “Ani Gbohii lɛ Baanyɛ Ahi Shi Ekoŋŋ Lɛɛlɛŋ?” Abaaje tafaa krɛdɛɛ nɛɛ shishi December 1. Kɛ́ agbe tafaa krɛdɛɛ nɛɛ naa lɛ, akɛ Maŋtsɛyeli Sane ni Ji 38 lɛ baatsu nii yɛ shiɛmɔ nitsumɔ lɛ mli akɛ dɛhiɛmɔ wolo.
2. Te afee Maŋtsɛyeli Sane ni Ji 38 lɛ aha tɛŋŋ?
2 Bɔ ni Afee Lɛ Aha: Afee Maŋtsɛyeli Sane ni Ji 38 lɛ koni kɛ́ adɔ mli kakadaŋŋ lɛ esaneyitso ni teɔ mɔ miishɛɛ shi lɛ kɛ wiemɔi ni ji “Ani obaakɛɛ . . . hɛɛ? dabi? ekolɛ?” lɛ abaje ehiɛgbɛ. Kɛ́ mɔ ni baakane Maŋtsɛyeli Sane lɛ gbele mli lɛ, ebaana hetoo ni Biblia lɛ kɛhaa sanebimɔ ni ji saneyitso lɛ kɛ nɔ ni shiwoo ni yɔɔ Biblia lɛ mli lɛ baanyɛ atsɔɔ kɛha lɛ. Ebaana nɔ hewɔ ni esa akɛ ehe Biblia lɛ eye lɛ hu. Akɛ sanebimɔ ko ni teɔ mɔ miishɛɛ shi ewo Maŋtsɛyeli Sane lɛ sɛɛ koni mɔ lɛ ajwɛŋ he, ni ewoɔ mɔ lɛ hewalɛ koni ekase babaoo kɛfata he.
3. Te abaaja Maŋtsɛyeli Sane ni Ji 38 lɛ aha tɛŋŋ?
3 Bɔ ni Abaaja Lɛ Aha: Abaaja woji nɛɛ tamɔ bɔ ni ajaa Kaimɔ lɛ kɛ kpokpaa wulu nɔ kpee lɛ he ninefɔ̃ɔ woji lɛ nɔŋŋ. Taakɛ atsɔɔ yɛ April 1, 2013 wolo ni aŋma kɛha onukpai lɛ mli lɛ, onukpai lɛ baatsɔɔ bɔ ni nyɛbaatsu nyɛsafo lɛ shikpɔŋkuku lɛ mli nii nyɛha. Asafoi ni shikpɔŋkukuji daraaa lɛ baanyɛ abi ni amɛye amɛbua asafoi ni bɛŋkɛ amɛ ni shikpɔŋkukuji dara lɛ. Kɛ́ oyaakɔlɔ Maŋtsɛyeli Sane ni Ji 38 lɛ eko lɛ, kaimɔ ni okɔlɔ bɔ pɛ ni okɛbaatsu nii yɛ otsi lɛ mli. Beni tafaa lɛ yaa nɔ lɛ, kɛ́ wɔja woji lɛ yɛ shĩai ni aha wɔ lɛ fɛɛ amli wɔgbe naa lɛ, wɔbaanyɛ wɔja eko kɛ́ wɔmiiye odase yɛ maŋ. Kɛ́ aja Maŋtsɛyeli Sane lɛ fɛɛ dani nyɔɔŋ lɛ gbo lɛ, esa akɛ akɛ wolo ni akɛhaa yɛ nyɔɔŋ lɛ mli lɛ aha. Yɛ klɛŋklɛŋ Hɔɔ lɛ nɔ lɛ, wɔkɛ wɔjwɛŋmɔ baama tafaa krɛdɛɛ lɛ nɔ, moŋ fe ni wɔɔje Biblia mli nikasemɔi ashishi. Esa akɛ wɔkɛ woji tɛtrɛbii lɛ hu aha Hɔɔ kɛ Hɔgbaa kɛ́ shihilɛ lɛ baaŋmɛ gbɛ. Ani ooto gbɛjianɔ koni okɛ ohe awo tafaa krɛdɛɛ nɛɛ mli kɛmɔ shi?